Read Samburu 1 Timoti 5 Bible Online

1 Timoti 5 - Samburu bible

1 Timoti 5

¹Mikurrakino lpayian kitok te iyie, kake irorie ninye ana ninko papa lino. Ntaarriyiana ltung'ana leleru ana ninko lalachera linono,

²nirorie ntomonok arrarrin ana ninko ng'utunyi o ntomonok leleru ana ninko nkanachera inono, te sinyaticho pooki.

³Iyanyita nenia oilia nemeata ltung'ani oibung'uta.

⁴Kake teneata nkoiliai nkera anaa nkera ee nkera enyena, keyiere ang'as tekue neyielou ꞉nenia kera aajo keichiaakino neyanyita neret nkang enche, errinyoki nache lolo ooitubulutua ninche, amu ana naiting'id Nkai.

⁵Kore nkoiliai nemeata ltung'ani oibung'uta, natung'ayieki aa ninye apeny, naa ketipika siligi lenye Nkai elej neomon kuarie o parkiji meichoo reto.

⁶Kake kore inia nayieu newuon nkata pooki anya rraa e nkop naa ketua eichu.

⁷Ntarriyiana sii ninche nenia baa, payie meata kenya nakurrieki.

⁸Kake kore tanaa keatae lemeibung ltung'ana lenyena, nelus le nkang enye naa keiturrayie ninye nkurukoto, neaku keitorno alang leitu eiruk.

⁹Kore nkoilia naaichiaakino netum reto ta nkanisa, nchoo metaa nkoiliai naiputaka larin ntomoni ile inger, naa nayema apa lpayian obo.

¹⁰Netisipuaki aajo ketaasa mbaa supati: keitubulua nkera enyena aitibiraki, neitoomono lomon ta nkang enye, neituko nkejek ee sinyat le Nkai, netereto lolo oaata sina, netonyuaa aas ntoki pooki supat.

¹¹Kake tanya iinger nkoilia leleru, amu kore payie eitore ng'uarrat e sesen neitoorere ate Kristo, neyieuu neigili aayem.

¹²Naa kore tankaraki inia, neyaki ate nkiguana torno amu ketigila lekutuk lekue lenche oitaitua payie eigeri.

¹³Kore aitoki, neitomok ninche ate wuanata e pecheu erukurukoo nkajijik. Tapala duo abaki inia wuanata enche e pecheu, kake keitoki aaku nkaimeteteelok, neyieu neyielou mbaa namara nkunenche, neiro mbaa nemeyiere payie eiro.

¹⁴Naaku kayieu payie eigili aayem nkoilia leleru, netum nkera, neramat nkang'ite enche, payie metum ꞉lmang'antita mpaach naitamie ninche anyit.

¹⁵Amu, keidipa nkulie aaibelekenyata, neirukurukore Chitani.

¹⁶Tenetii ntomononi nairuko Kristo neata nkoilia ta nkang enye, nchoo enap ninche payie meicho nkanisa nkirochi, netum ꞉nkanisa atereto nenia naaichiaakino reto.

¹⁷Kore lolo payiani oorikorita nkanisa aaitibiraki naa keichiaakino neichori nkanyit neitokini aalak, nelus lolo oonyok aalikoo rerei le Nkai, neiteng'enicho.

¹⁸Amu kejo Lkigerot, <<Miyen lmong'o nkutuk emanaa aidong nkano>> nejo ta nkae ng'oji <<Kore laasani le siaai naa keichiaakino payie elaki.>>

¹⁹Ming'amaa ajo kedede rerei opiki lpayian le nkanisa, mara itumo sipata too ltung'ana oare tanaa okuni.

²⁰Kore ilo ochekino aas ng'ok, ng'odia tekue ltung'ana pooki payie euriei lolo kulie.

²¹Kaaitanap iyie katukul tekue Nkai o Kristo Yeso o lmalaikani oogeluno, payie iimbung kuna kitanapat, nimidung mbae nimisip, nimiata ngela.

²²Mimpirriki aiteleki ltung'ani nkaik apik rikore, nimichulare sii lkulie too ng'ok enche. Rrita koon payie iwuon taatua sinyaticho.

²³Mintoki amat nkare narok apeny, kake tamata sii nkini aichuo e lmusabibu tankaraki nkocheke o nchalan nikirrachu chiaake.

²⁴Keatae ltung'ana ooibala ng'ok enche, neiturukuto ng'ok enche meiguanareki, kake kore noo lkulikae naa keibalunyieki tesiedi.

²⁵Keibala sii chiaake asat supati, naa tenemeibala keibalunye ake.