Read Samburu 1 Timoti 6 Bible Online

1 Timoti 6 - Samburu bible

1 Timoti 6

¹Kore lolo pooki oaara rridiki, enchoo eya lkutuaa lenche aajo keichiaakino neichori nkajit to nkoitiei pooki, payie medeki nkarna e Nkai nememenuni nkiteng'ena ang.

²Naa kore lolo ooiruko ꞉lkutuaa lenche Kristo, naa meyiere payie emen ninche tankaraki nara lalachera lenche taatua Kristo. Kake kore nayiere naa payie enyok abaki oleng aasaki ninche siaai, amu kore lolo kutuaa ooretito naa lairukok oaachami. Nteng'enicho nintarrapicho kuna mbaa.

³Kore tenetii ltung'ani oiteng'enicho nkiteng'ena e sapare nemeiririkino rerei odede la Laitoriani Yeso Kristo o nkiteng'ena naicho Nkai nkanyit,

⁴naa koon ake eiliepie nemeitoki eyielo. Kecham ninye aichankarrai pecheu, nenya larrabal loo rereii. Neiu inia lom o larrabal o ldeketa o sarim torno

⁵o nchankar nemeichunye naing'uaa ltung'ana oaatarroitie nkuechi nemokure eata ndedei. Kejo ninche kore tiniyanyit Nkai naa nkoitiei naduporeki.

⁶Kake kore tiniyanyit Nkai, nikintiemu inia niata nimiata lderro, naa inia dupoto sapuk.

⁷Amu meatae ntoki nikuotuo ana kop kiata, naaku meatae sii nikindim nikiya.

⁸Kake kore tanaa ikiata ndaa e nkocheke o nkilani[1] naa keitiemu iyioo inia.

⁹Naa kore lolo tung'ana oong'uar payie eaku parakuo, naa kedoki atua ntemat o rruachet ee ng'uarrat kumo e madai naaricho, naayaki ninche lkiye o mutai.

¹⁰Amu kore lubo ee ropiyiani naa ninye eing'uaa ntorrok pooki. Kore ltung'ana lbata ereuta inia lubo ee ropiyiani, nepong'ori to nkurukoto neyaki ate sina kitok.

¹¹Kake kore iyie ltung'ani le Nkai, talama nenia pooki, ninyok aing'oru payie iaku ltung'ani loosipat, neyanyit Nkai, niaku loisiligai niata nchaman o ng'iriata o mborron.

¹²Tama larrabal supat le nkurukoto ang, nitilimua teinia limunoto supat nintayia tekue ltung'ana kumo, nimbung'a inia kichon ee ntarasi nikimpotokaki apa.

¹³Kore tekue Nkai naichoo ntokitin pooki nkichui o tekue Kristo Yeso oitayia limunoto supat tekue Pontio Pilato, kaaitanap iyie

¹⁴payie iimbung ana kitanapata meti rachata nemeti ng'orikinoto, ana metelioii Laitoriani lang Yeso Kristo tenechukunyie,

¹⁵tenabaya inia kata nategelua ꞉Ilo omayiana laa ninye apeny oitoreicho, Lkinkii loo Lkinkii o Laitoriani laa Laitoriak,

¹⁶oara ninye ake apeny lemeye, newuon to wong'an nemenyikakinoi, nemeata hooyia ltung'ani otodua ninye, nemeata looidim atoduaa. Metaa nenye nkanyit o nkitoria ee ntarasi. Aamin.

¹⁷Kore lolo parakuo taata tana kop, ntanapa payie meimer tanaa epik siligi lenche parakuoicho naaiting, kake payie epik siligi Nkai, naichoo iyioo ntoki pooki aitiemu te leng'on payie king'idakino.

¹⁸Ntanapa ninche metaasa supati, neparakuonu taa asat supati, neaku looleng neng'arichere lkulie.

¹⁹Naa kore teneas ana, neiturrurroki ate ntokitin supati ee nkolong'i naapuonu, payie eibung inia kichon nara nkichon nadede.

²⁰Timoti lai, irrita nenia pooki nikitipikaki nkaina. Talama nenia baa ena kop nemeata tipat o mbaa naapaachaa e sapare, naajo lkulie eji ng'eno,

²¹naa kore lbata, netopong'ori aaing'uaa nkurukoto tankaraki nairukurukore inia ng'eno. Metaa munyani e Nkai tenebo o ntae pooki.