Read Samburu 2 Timoti 4 Bible Online

2 Timoti 4 - Samburu bible

2 Timoti 4

¹Kaareki aitaarriyian iyie tekue Nkai o tekue Kristo Yeso, oiguanare looichu o lootuata, o tankaraki nalotu ninye aitoreicho ana Lkinkii, nchere

²tilikoi rerei le Nkai. Tonyuaa tilikoi ta nkata naichiaakino o ta nkata nemeichiaakino, tobuaaki ltung'ana, ntaarriyiana, nintogol. Taasa kuna baa, te ng'iriata kitok ninteng'enicho mbaa pooki.

³Amu kelotu kenya nkata nemeidimare ltung'ana nkiteng'ena nadede. Kore neas ninche, naa ng'uarrat enche erubare neiturrurroki ate laiteng'enak oojo mbaa naayieu nkiyiaa enche nening.

⁴Keiken nkiyiaa enche payie meitoki aaning ndedei, neinining nkatinin nemedede.

⁵Kake kore iyie Timoti, taa ltung'ani otem mbaa nkata pooki, ting'iria taatua sinaitin, taasa siaai oyiere neas ltung'ani olikoo Lomon Supati, nintabaya nkisiaayiare nikinchooki.

⁶Amu etabawua nkata naye, neisuari nkichui ai ana lasar.

⁷Atama larrabal supat, kakueta naidipa inia kuetata, naibung'a nkurukoto.

⁸Naa kaaiteng'elakaki nanu nkopiyia naichori loosipat, inia naaicho ꞉Laitoriani, oara ladung'oni le nkinguana, te inia parri. Namara nanu ake apeny eicho, kake keicho lolo pooki oaanyuta lotunoto enye te nchaman.

⁹Timoti, tonyuaa tesieku wou ene natii.

¹⁰Amu kore Demas, naa kaatung'ayie alo lkerenket le Tesalonike, tankaraki nacham mbaa e nkop. Nechomo Keresekenes nkop ee Lgalatia, nelo Tito nee Dalmatia.

¹¹Luka ake apeny otii ene tenebo o nanu. Tumo Marko, nilotu ene o ninye, amu laisiaayiani le tipat ninye te siaai lai le likoroto.

¹²Kairruayie Tikiko mechomo lkerenket le Epeso.

¹³Naa kore tinilotu, tichilu nanka ai sapuk e oriong natung'aka apa Karpo te lkerenket le Tiroa niyau sii nenia bukuii, naleng nenia e nchoni.

¹⁴Kore Alekisanda, ilo kunoni, naa kaitaasa mbaa torrok oleng. Keitalak ninye ꞉Laitoriani nenia baa naitaasa nanu.

¹⁵Tirripo abaki iyie koon te ninye amu kenyokita aiboyoo likoroto ang.

¹⁶Kore apa amituta koon aaiguanareki nkata ekue, naa meata hoo laayewuo ajing nkoriong. Kaatung'aitie ltung'ana pooki, naa oi siake meipari ninche inia!

¹⁷Kake kaatereto Laitoriani naaicho ngolon payie atum aidipa likoroto ai ee Lomon Supati, netum loreren pooki aatining. Naaku, aaitayiaki to nkutuk e lowuoru.

¹⁸Kaalaku nanu ꞉Laitoriani taatua mbae pooki torno, naaya nkitoria enye e chumata te seriani. Metaa nenye nkisisa ntarasi o ntarasi. Aamin.

¹⁹Roroki Prisika[2] o Akuila o nkaji e Onesiporo.

²⁰Etowuana Erasito te lkerenket le Korinto, natung'ayie Toropimo emuai te lkerenket le Mileto.

²¹Tonyuaa tesieku wou ene, ewuon eitu ebau ng'amata e nkijepe. Ikiroroki ꞉Eubulo o Puden o Lino o Kilaudia, o lalachera o nkanachera pooki naairuko Kristo.

²²Metaa Laitoriani tenebo o iyie, neaku munyani enye tenebo o ntae.