Read Samburu Tito 2 Bible Online

Tito 2 - Samburu bible

Tito 2

¹Kake kore iyie, nteng'enicho mbaa naaichiaari e nkiteng'ena nadede,

²intaarriyian lpayiani arrarrin metaa looiririki mbaa, neiririkino nkanyit, netem mbaa, neichiaari mbaa to nkurukoto o te nchaman neata ng'iriata nairirikino.

³Nejia sii nkuna ntomonok arrarrin, ntaarriyiana metaa naawueni to lwuenet oicho Nkai rrepet. Nemeitarruo lkulie tung'ana nkarn, anaa eaku rrindiki e merai, kake keichiaakino neiteng'enicho mbaa supati,

⁴payie etum aaitaarriyiana ntomonok leleru metachama lpayiani lenche o nkera enche.

⁵Ntaarriyiana ninche metaa naatem mbaa, neaku ntomonok sinyat, naas siaatin taa nkang'ite enche, neichiaari, neitodoyio ate taa lpayiani lenche, payie medeki rerei le Nkai.

⁶Nejia aitoki nkuna lewa leleru, ntaarriyiana metaa lootemu mbaa.

⁷Kore taa mbaa pooki, ntodolu koon aaku nkitanyanyukoto naduaari taa asat supati. Tininteng'enicho, nteng'enicho ta nkanyit metii ndala,

⁸neichiaari nkuroroto ino nemeata ntoki nakurrieki, metaa kore lolo likimbooyo, nenya anyit meata mbae torno najo naipirita iyioo.

⁹Nteng'ena rrindiki meitodoi ate too lkutuaa lenche taa mbaa pooki, neiting'id ninche nemeitooliki,

¹⁰namara looirrapirrapicho, kake payie eitoduaaya nchere keisiligai katukul, metaa kore taa mbaa pooki, nerrepi nkiteng'ena e Nkai, Laitejeunoni lang.

¹¹Amu /keibalunyieki munyani e Nkai, payie eyau njeunoto ee ltung'ana pooki.

¹²Naa keiteng'enita iyioo inia munyani matany mbaa nemetii uriata e Nkai o ng'uarrat e nkop, payie kibik kitem mbaa, nikiwueni te sipata nikiurie Nkai tana kop,

¹³kianyuta siligi lang omayiana, meitabari tenelioii nkitoo ee Nkai aang kitok, nara Laitejeunoni lang Yeso Kristo.

¹⁴Keichorua koon anang iyioo payie elaku iyioo too ntorrok ang, neituk iyioo payie kiaku ltung'ana lenyena le tipat oonyok aas mbaa supati.

¹⁵Kore inteng'enicho kuna baa, ntaarriyiana ltung'ana, ning'ode ninche te nkitoria pooki niata. Mincho hooyia ltung'ani kimenu.