Read Samburu Lburania 1 Bible Online

Lburania 1 - Samburu bible

Lburania 1

¹Kore apa naa keirorie ꞉Nkai lmakui lang nkatitin kumo o too nkoitieii kumo aimu loibonok lenyena,

²kake kore taata too kuna perot e siedi, naa /keirorie iyioo Nkai te Nkerai enye. Netegelua ꞉Nkai ninye metaa ntokitin pooki nenyena, naa te ninye sii apa eitibirua nkop.

³Kore Nkerai e Nkai naa ninye naitelioo nkitoo e Nkai, netiu to mpukunoto enye ana ake netiu Nkai, naa ninye oibung'uta ntokitin pooki to ngolon kitok e rerei lenye. Kore payie eidip aitibira nkoitiei naitukorieki ltung'ana ng'ok, newuon ta nkaina e tetene e ilo Ooisul pooki.

⁴Kore tankaraki nataa ninye kitok oleng alang lmalaikani, neichori nkarna kitok nalang nenche.

⁵Amu alo too lmalaikani etiaka aikata Nkai, <<Ira iyie nkerai ai, nataa anapar Papa lino?>> Nejo aitoki ta nkae ng'oji, <<Kaaku nanu Papa lenye neaku ninye nkerai ai.>>

⁶Naa kore aitoki payie eirriu ꞉Nkai inoti lenye oata nkitoria nkop nejo, <<Nchoo metasayia ꞉lmalaikani pooki le Nkai ninye.>>

⁷Kore taa naaipirita lmalaikani nejo, <<Keitaa lmalaikani oara laisiaayiak lenyena siwuo, neitaa nkima nailu.>>

⁸Kake nejo ta naipirita Nkerai enye, <<Kore nkitoo ino iyie Nkai, naa kewuon ntarasi o ntarasi, naa intoricho te kitoria ino te sipata.

⁹Itachama sipata nimba ntorrok. Naaku naa Nkai, kore tankaraki inia ikitegelua iyie Nkai ino, nikimput ng'ida aitalang lkulie pooki.>>

¹⁰Neinyiaka sii ajoki, <<Laitoriani, iyie apake oitibira nkop ta ng'asunoto, naa siaai laa nkaik inono keper.

¹¹Keidaari ninche, kake ibik iyie ntarasi, nemutari ninche pooki ana nanka musana.

¹²Ipiyae iyie ninche ana lkila, ninturraa ana nanka natumute, kake mimbelekenya iyie, nemeiting aikata larin linono.>>

¹³Kake amaa keatae aikata lmalaika lenye otiaka ꞉Nkai, <<Towuana ta nkaina ai e tetene ana maichoo lmang'ati linono ndacha murto?>>

¹⁴Amaa, mara lmalaikani pooki nkiyeng'eta naaisiai Nkai oorewi metereto lolo ootum kenya njeunoto?