Read Samburu Lburania 4 Bible Online

Lburania 4 - Samburu bible

Lburania 4

¹Naa kore ake ewuon etii lekutuk oitaka iyioo ꞉Nkai payie kitum nkiyeng'iyeng'ata enye, matodol ate payie meatae ake taa ntae lolau.

²Amu ketilikaki abaki iyioo Lomon Supati ana apake natilikaki ninche, kake eitu eret ninche lolo omon ootining'o tankaraki neitu eng'amaa to nkurukoto.

³Kore iyioo ooiruko naa iyioo oojing atua inia kiyeng'iyeng'ata enye. Netejo Nkai taa naipirita lkulie, <<Inia paa kore to ngoro, naimie te lekutuk nchere, <Mejing katukul atua nkiyeng'iyeng'ata ai> >>. Naa ketejo nejia abaki eidipe apake ntoki pooki payie eidip aitibira nkop.

⁴Amu keigero ta nkae ng'oji too lkigerot Sinyat neipirita mparri e sapa payie eidip Nkai aitibira nkop nchere, <<Kore ta mparri e sapa neyeng'iyang'a Nkai te siaai lenye pooki.>>

⁵Kake kore eyia ketejo tanaduo ng'oji, <<Mejing katukul atua nkiyeng'iyeng'ata ai.>>

⁶Keatae nkiyeng'iyeng'ata natum lbata, kake kore apa lolo ootining'o lomon supati neitu etum ninche tankaraki neitu ening Nkai.

⁷Naaku keinyiaaka Nkai agelu nkae parri, natejo <<Anapar>>, inia kata apa eima nkata naado, payie eicho Daudi rerei ojo ana naigero tanaduo ng'oji ajo, <<Kore tinining'ining anapar ltoilo lenye emintogol nkuechi inchi.>>

⁸Amu tanaa ketiriko ꞉Yochua ninche metijing'a atua nkiyeng'iyeng'ata, anata eitu eitoki Nkai aimaki tesiedi nkae parri.

⁹Naaku kewuon ake eatae nkiyeng'iyeng'ata natum ltung'ana le Nkai.

¹⁰Amu kore pooki ng'ae ojing atua nkiyeng'iyeng'ata e Nkai naa keyeng'iyeng'a abaki ninye te siaai lenye ana payie eyeng'iyeng'e Nkai.

¹¹Naaku matonyok aatum inia kiyeng'iyeng'ata, payie meatae ake lobo orria ana lolo apa oaatanya ening Nkai.

¹²Amu kore rerei le Nkai naa keichu neata ngolon. Kepi alang lalem opi mbat pukura, nerem arich nkurruk o nkichui o loik o ntolo, neidim atukurru mparrunot o yieunot e ltau naaisudoro.

¹³Nemeatae hoo ntoki naisudori tekue Nkai. Keibala ntoki pooki tekue nkonyek enyena, ilo laa ninye oipar iyioo mbaa pooki.

¹⁴Naaku kore amu ikiata Laitainoni kitok la lasar oiliepa aim keper ajing chumata, Yeso Kristo Nkerai e Nkai, maibung'a naa aitirrichaki inia kurukoto nikilimu aajo ikiata.

¹⁵Amu mara laitainoni kitok la lasar lemeiseyie ꞉nchalan ang ikiata iyioo, kake ikiata ilo otetemaki too nkoitieii pooki ana natemitae iyioo, kake neitu eas ng'oki.

¹⁶Naaku maotu tekue lorika le Nkai ang naata lng'ur mikiata ngureticho, payie kitum aatang'amai lng'ur o munyani naret iyioo ta nkata naichiaakino.