Read Samburu Lburania 6 Bible Online

Lburania 6 - Samburu bible

Lburania 6

¹Naaku naa meyiere ake naaku mbaa ekue naayiere nikiyielou naaipirita Kristo eiteng'eni iyioo, kake keyiere nikipuo kue aabaki nkiteng'ena nairirikino ltung'ana botoro. Nimikingil aitoki aachukokino nkiteng'ena ekue naipirita nikinko tinikirriidu asat naayaki iyioo lkiye o nikinko tinikiruk Nkai.

²Nimikintoki sii aachukokino nkiteng'ena ekue naipirita nkipatisa o nkitelekinoto ee nkaik o mpiunoto ee lootuata o nkiguana ee ntarasi.

³Naaku ikipuo kue, echam Nkai, aabaki nkiteng'ena naairirikino ltung'ana ootobotorito.

⁴Amu meidimai payie echukuni lolo tung'ana meeirriidu, ootumo apa wong'an e Nkai neichamichamita nkichooroto enye naing'uaa chumata, netang'amaitie Ltau Sinyati. Keichamchamita ninche rerei supat le Nkai o ngolon e Nkai e ng'amata nalotu, neitoki aarriaa. Kore teneas nejia, naa keitorno tee ninche, amu inji etuwuana teneigilieki Nkerai e Nkai lmusalaba aache, neitami anyit tekue ltung'ana.

⁷Kore lchampa oamat nkare nachaki chiaake nchan, neitubulu ndaa naret laturoni naa ketum mayian e Nkai.

⁸Kake kore lchampa laa lkuku ake o ndeti naabulu naa meata tipat, netaa kedeki kore tesiedi nepejori.

⁹Sotuatin lainien lacham, kore abaki kijoito nchi, ikiata sipata naipirita ntae aajo irara ntae lchampa supat olang ilo, naa itumtum njeunoto.

¹⁰Kore Nkai naa keisiligai, merikino nitaasa o nchaman nintoduaita ninye, payie iretret ltung'ana lenyena sinyat, newuon ake ipuoitoto kue aaret ninche.

¹¹Kore nikiyieu oleng, naa metaa meatae hoo lobo linchi lemeitodolu ake inia nyuata payie kimbung ilo siligi odede likiata, ana metabai katukul te nkiting'oto.

¹²Mikiyieu niakuku ltung'ana oaachal, kake ikiyieu payie iduaayaya lolo laa kore to nkurukoto o te ng'iriata, naa ketum inia naitayia ꞉Nkai lekutuk ajo keicho ninche.

¹³Kore apa payie eitaki ꞉Nkai Abraam lekutuk, neitaki eipot nkarna enye koon amu meatae nkae arna nara kitok ta nkarna enye naaidim aitainyie lekutuk, nejo,

¹⁴<<Meata ajo maamayian iyie, naponaa ichoi ino aaitaa kitok.>>

¹⁵Neanyu Abraam te ng'iriata, netum inia naitaka ꞉Nkai lekutuk ajo kaicho.

¹⁶Amu kore ltung'ana naa keitai lekutuk eipot nkarn ee lolo oaara kutuaa tee ninche, neitededei inia natejo neiting'ie nchankar pooki naata.

¹⁷Nejia naa ake etiu, kore tankaraki keyieu apa Nkai neitodol katukul lolo ootum lekutuk lenye nchere meibelekenya yieuna enye, neitisipu inia bae eipot nkarna enye koon.

¹⁸Naaku kore aimu kuna baa are nemeibelekenya aikata naataasa Nkai, neitu taa esapicho Nkai, kore iyioo ooisigakita ninye, nikitum rreten kitok nikimbung'ie aaitirrichaki ele siligi otipikaki tekue iyioo.

¹⁹Ikiata ele siligi laa ltauja lang errapa neisiligai, netuwuana lgiitani ooenikino senkei nkue naenieki meli payie meya nkare. Kore ilo siligi naa keuno to Ng'oji sinyati naaisul pooki, te idia alo inia anka naor apa ng'oji sinyati o ng'oji sinyati nalang pooki ta nkaji e Nkai,

²⁰inie netijing'a apa Yeso oituruko tekue iyioo ta mpaach ang. Ketaa ninye laitainoni kitok la lasar ntarasi ana neikununo apa Melkisedek.