Read Samburu Yakobo 2 Bible Online

Yakobo 2 - Samburu bible

Yakobo 2

¹Lalachera o nkanachera ainien, emipik ngela nkurukoto e Laitoriani lang Yeso Kristo oata nkitoo.

²Amu tenelotu ltung'ani obo atua ntumo inchi oata lpete le saabu o nankan naapuyiapui, o tenelotu likae omena oata nankan naaiduruk,

³nintoomonmon ilo oichopito nankan supati, nijokiki, <<Towuana iyie tene ng'oji supat e nkanyit>>, kake nijokiki ilo omena, <<Ntacho iyie tende>> tanaa <<Towuana to nkop tankalo lorika laiteleki nkejek[2] ainien>>,

⁴mara naa intodolutata ngela taatua ntae niakuku ltung'ana oaaya mbaa ana nadol taa mparrunot enche torrok?

⁵Eng'ura ja lalachera o nkanachera ainien nacham! Amaa, mara ketegelua ꞉Nkai laisinak tana kop metaa lparakuo to nkurukoto, neaku lootum nkitoria enye naitayia Nkai lekutuk ajo keicho lolo oaacham ninye?

⁶Kake miatata nkanyit taa laisinak! Mara dei lparakuo ooironyokita ntae nkop, neya ntae meiguanareki?

⁷Mara dei ake ninche lolo oodek Kristo, laa inia arna enye e nkanyit eipotieki ntae?

⁸Kore tanaa imbung'utata ana kitanapata naaisul Nkitanapat pooki, inia najo Lkigerot, <<Tachama le latia ino ana koon>>, naaku iasitata mbae supat.

⁹Kake kore tanaa intodolulu taata ngela naaku iasitata ng'oki, naa keibala tee nkitanapat ajo irara lagilak loo nkitanapat.

¹⁰Amu kore pooki ng'ae oibung nkitanapat kake negil nabo, naaku keitorno ake ana lotigila pooki.

¹¹Amu kore ilo otejo, <<Miloloito>>, ninye siake aitoki otejo, <<Miar metua.>> Naaku kore tinimiloloito kake niar metua, naa itaa lagilani loo nkitanapat.

¹²Naaku kore to pooki niroro o niasias, entaparru nchere kedung'okini ntae nkiguana te inia kitanapata e nchaman naa ninye nalaku ntae.

¹³Amu kore lemeata lng'ur, naa meing'urrieki sii ninye tenedung'okini nkiguana, kake keikitok lng'ur alang nkiguana.

¹⁴Lalachera o nkanachera ainien, kaa tipat eata tenejo ltung'ani, <<Kaata nkurukoto>>, nemeitodolu taa asat enyena? Keitejeu ninye nkurukoto natiu nejia?

¹⁵Amaa tanaa keatae lalache tanaa nkanache nemeata nankan tanaa ndaa nanya,

¹⁶nejoki lobo linchi ninye, <<Enchom te seriani, enchopoto aaitibiraki ninyanya ndaa aaimu>>, kake nemeitoki inchocho naanya tanaa naaichop, nyo tipat e inia?

¹⁷Nejia sii etiu nkurukoto, kore tanaa meata asat naaku ketua.

¹⁸Kake keidim ltung'ani atejo, <<Keatae ltung'ani oata nkurukoto, neatae loata asat.>> Kake kore najo naa ana, <<Ntoduaaki ja ltung'ani oata nkurukoto nemeata asat, payie aaitodol nanu nkurukoto ai taa mbaa naas.>>

¹⁹Iruk iyie ajo kore Nkai naa nabo ake. Keisupat inia! Kore abaki lairiruani naa keiruk inia, kake neikirikira to lputukuny.

²⁰Lotung'ani ele omada, iyieu nikintodoli aajo kore nkurukoto nemeata asat naa ketua?

²¹Amaa, mara keikenaki apa akuyia lang Abraam aajo loosipat payie ejo ntai layieni lenye Isaka metaa lasar te lperere la lasar?

²²Keibala ajo kore apa nkurukoto e Abraam o asat enyena naa kepuo tenebo, naa kore asat enyena neicho nkurukoto enye meisula.

²³Kore tankaraki natining'o ꞉Abraam Nkai, nebaya lolo Kigerot oojo, <<Keiruko ꞉Abraam Nkai, neikeni ninye aajo loosipat>>, neipoti sii aajo sotua le Nkai.

²⁴Naaku idol naa ajo kore ltung'ani, naa taa asat eikeni aajo loosipat, namara to nkurukoto apeny.

²⁵Kore sii aitoki, mara apa taa asat eikenaki milayoi naji Raab aajo neesipat, payie eitoomon lolo aikitalak ooterewuaki inia kop enche, neisigie meima nkae oitiei?

²⁶Kore ana natua sesen lemetii nkiyeng'et, nejia sii etiu, kore nkurukoto nemeata asat naa ketua.