Read Samburu Yakobo 4 Bible Online

Yakobo 4 - Samburu bible

Yakobo 4

¹Nyo nayau larrabali o nkarnyas taatua ntae? Mara ng'uarrat torrok naayau naara taatua seseni linchi?

²Iyieuu ntoki kake nimitumtum, nijoijo entar metua ning'uarrichocho kake nimitumtum inia niyieuu. Inkarnyasasa ninyanya larrabali nimiatata ntokitin niyieuu amu miomonunu ta Nkai.

³Naa kore tiniomonunu, mitumtum amu iomonunu to nkoitiei torno, iyieuu payie iasicherere taa mbaa naaiting'id seseni linchi.

⁴Lotung'ana kulo lemeisiligai! Amaa, miyielolo aajo kore tinichamumu ntokitin e ana kop niakuku lmang'ati le Nkai? Naaku kore pooki ng'ae oacham ntokitin e ana kop, neitaa koon lmang'antita le Nkai.

⁵Tana ijo iyie pecheu ejo Lkigerot Sinyat, <<Kore Ltau Sinyati oichorua Nkai metamanya atua iyioo naa keata lom>>?

⁶Kake kore eyia, keikitok munyani naichoo iyioo ꞉Nkai. Naaku kejo Lkigerot Sinyat, <<Keany ꞉Nkai looilach kake neicho loobor munyani enye.>>

⁷Entodoi naa ate tekue Nkai. Entany Chitani, naa keisig aing'uaa ntae.

⁸Entinyikaki Nkai, naa kenyikaki sii ninye ntae. Entukoi ntorrok pooki, ntae laasak loo ng'ok, nintisinyisiny ltauja linchi, ntae loaata lng'ach.

⁹Esinanioto, nibuakbuak, ninchirchir. Embelekenya nkuenia inchi metaa lkichiret o ng'ida metaa sina.

¹⁰Entodoi ate tekue Laitoriani, naa keiliepunyie ninye ntae.

¹¹Lalachera o nkanachera ainien, emiro ntorrok aakur lkulikae. Kore ilo oiro ntoki torno akur lalache tanaa nkanache enye tanaa eyiaya ake mbae nadung'okinyie nkiguana, naaku mbaa naagilunore inia najo nkitanapat eiro neinguanare nkitanapat. Naa kore tining'uanare nkitanapat, naaku mira loas najo nenia kitanapat, kake ira loiguan nkitanapat.

¹²Nabo ake inia Ai naichorua nkitanapat, naa ninye ake ladung'oni le nkiguana. Ninye ake oata ngolon naitejeunyie o namutie. Naaku ng'ae naa ira iyie payie idung'oki le latia ino nkiguana?

¹³Entining ana, ntae oojo, <<Kore anapar tanaa teisiere, ikipuo elde kerenket o elde, nikiwueni lari obo kinyiang'icho, nikimiricho payie kitum ropiyiani kumo.>>

¹⁴Amaa iyiololo ntae netiu nkichoni inchi teisiere! Kore nkichoni inchi, naa inji etuwuana ana mpuro nalio nkiti nkata, neikenyu meatae.

¹⁵Kore nairirikino nijoijo naa, <<Tanaa yieunoto e Laitoriani, newuon ake kinchu naa ikias ana o ana.>>

¹⁶Kake kore natiu, ilachlach ntae ninkarkar, naa kore nkilacha pooki naijio inia naa keitorno.

¹⁷Naaku kore pooki ng'ae oyielo sipata nayiere neas nemeas, naaku ng'oki te ninye.