Read Samburu 1 Petero 2 Bible Online

1 Petero 2 - Samburu bible

1 Petero 2

¹Naaku naa enturrai mbaa pooki torrok, nipalpal saparia pooki, nipalpal lom, nimintaakinono, niminyanya meteteel hoo ta mbae naje.

²Kore ana nayieu nkera kunini naatiwuaki kule, entaa loaata yieuna e rerei osipa le Nkai, paa kore imatmat nibululu payie ing'amaa inia jeunoto,

³amu itoduaa aajo keisupat Nkai.

⁴Naaku kore ipuonunu netii Kristo, ilo soit oichu oaatanya ꞉ltung'ana, kake netegeluaki nera le tipat too nkonyek e Nkai,

⁵nirara sii ntae soito ooichu, nechetuni ntae payie iakuku nkaji e Nkai naitibira ꞉Ltau lenye. Nitumtum aataa lturrur laa laitainok sinyat la lasar, ooitai lasarri ooicharu ꞉Ltau Sinyati, oaang'amaroii ta Nkai tankaraki inia nataasa Yeso Kristo.

⁶Ana naigero too Lkigerot Sinyat ajo: <<Enteyielo aajo, kaun soit oirichiu nkaji te Sion, ogeluno naa le tipat. Kore pooki ng'ae oiruk ninye, nemenya aikata anyit.>>

⁷Naaku itumtum kenya ntae ooiruk rrepeta, kake kore too lolo lemeiruk nchi ejo lkigerot, <<Etaa ilo soit oaatanya ꞉lachetak soit oirichiu nkaji

⁸o soit orrorricho o ndadapoi narrekicho.>> Nerror ninche amu eitu eibung ilo rerei, ana nategelakaki apa ninche.

⁹Kake kore ntae naa irara ltung'ana oogeluno, lturrur loo laitainok la lasar ooisiaaita Lkinkii, nirara lorere sinyati, ltung'ana le tipat le Nkai, ooipuotua ta naimin apik atua inia wong'an enye e nking'asia, payie itumtum aatilikoi rrepeta enyena.

¹⁰Kore apa naa mirara ltung'ana le Nkai, kake kore taata irara ltung'ana lenyena, neitu apa eing'urrieki ntae, kake eing'urrie taata ntae Nkai.

¹¹Ltung'ana lainien lacham oaamanya ana kop eiching'a, nirara lapuayak, kaitarrap ntae payie iyanyany ng'uarrat ee seseni linchi naarere ltauja linchi neiminie ntae kenya.

¹²Entewueni to nkoitiei supat taatua lolo tung'ana lemeyielo Nkai, paa kore tenedek ntae aajo irara laitarruok, neisis kenya Nkai tankaraki nenia asat inchi supati, ta nkata e nkisabakinoto.

¹³Kore tankaraki Laitoriani, entodoi ate taabori rikore pooki nategeluaki to nkop, pee era lkinkii oitore nkop,

¹⁴tanaa laitoriak kutuaa ooreu ꞉ninye metipika ng'udi lolo oaas ntorrok, neicho rrepeta lolo oaas sipat.

¹⁵Amu keyieu Nkai payie intigirgir ltung'ana oamada ooiro mbaa nemedede, iasias sipat.

¹⁶Indimdim aataas inia eitu eisimakini ntae, kake emincho inia lakunoto inchi eaku nkoitiei niasiesie ntorrok, esiaayia Nkai ana Laitoriani linchi.

¹⁷Eyanyita ltung'ana pooki. Entacham lalachera o nkanachera inchi naairuko Yeso, niurieii Nkai, ninchocho lkinkii nkanyit.

¹⁸Kore ntae laisiaayiak, entodoi ate katukul too lkutuaa linchi, namara ake too lolo supati anaa lolo ooduaya ntae, kake abaki to lolo lemeas sipat.

¹⁹Amu kechamaa Nkai teneng'iri ltung'ani sina lemechiaakino neitami, eyielo ajo keti Nkai tenebo o ninye.

²⁰Kaa rrepet etum ltung'ani, ong'iri teneidong'i tankaraki nataasa ntorrok? Kake kore teneidong'i ntae iasitata sipat ning'iriri, naa kechamaa Nkai inia.

²¹Keipoto ntae Nkai payie ing'iriri kulo sinaitin, amu keimayie sii Kristo sina anang ntae, neitodol ntae ninkoko tininjipaa rriata lenye.

²²Eitu eas ninye ng'oki, neitu eimu nkutuk enye sapare.

²³Kore payie edeki ninye, eitu echukoki ninche toki, neitu eing'ode aituria ninche payie eitami sina, kake etung'aka ilo odung'oki nkiguana ee sipat mbaa enyena.

²⁴Ketanapa ninye ng'ok ang te sesen lenye to lmusalaba payie meitoki aikata ng'oki aata nkitoria tee iyioo. Netanapa payie kiwueni taatua sotua oipida o Nkai. Naa kore taa lbaa ootumo ninye, /neichiunyieki ntae.

²⁵Amu ipuoitoto apa kitala ana nkerra, kake kore taata naa imbelekenyakinete Lchekut linchi, ilo Airritani oirrita ntae.