Read Samburu 1 Petero 3 Bible Online

1 Petero 3 - Samburu bible

1 Petero 3

¹Natomonok, entodoi ate taa lpayiani linchi, paa kore abaki tenetii loaany eibung rerei le Nkai, neyietu lwuenet linchi metaa le Kristo tenedol ninkoko tiniwuenini te sinyaticho iyanyitnyit lpayiani linchi, eitu ijoijo ntae rerei.

³Emincho sikar inchi e sesen eaku, ne nkitibirata ee lpapit nipikaka masaa e saabu naagol nkinyiang'a, tanaa inchopchop nankan naaipaipai,

⁴kake enchoo sikar inchi eaku naa ltauja, inia sikar nemelioo nememutari, aa taa ltau oanana nebor, inia taa eiken Nkai ajo toki tekue ninye.

⁵Nejia sii eikuna ntomonok sinyat e apa naaisiligita Nkai teneisikarrie ate. Keitodoitie ate taa lpayiani lenche,

⁶ana apa Sara, naata nkanyit ta lpayian lenye Abraam neipot ajo <<Lkitok lai.>> Kore ntae naa irara nkera enyena iasitata sipat, niminchocho hoo ntoki eituria ntae.

⁷Kore sii ntae lpayiani, meata lemewuon tenebo o ntomononi enye, iyielolo aajo kechal ntomononi alang lpayian, ninchocho nkanyit payie meiboori nkomono inchi, amu ketum sii ninye tenebo o iyie nkichon ee ntarasi pecheu.

⁸Kaidip ana kitaarriyiana ajoki ntae payie iwuenini pooki inyanya nabo, niatata lng'er, nichamama ana lalachera o nkanachera, nenanaa ntae ochuaa, niborbor.

⁹Emilaaki ltung'ani ntorrok too ntorrok anaa ldeket te ldeket, kake entalaaki mayian amu inia eipotoka ntae Nkai payie itumtum mayian metaa ninchi.

¹⁰Amu kejo lkigerot sinyat, <<Kore ilo oyieu neng'idakino nkichon nedol mperot supati, naa keyiere payie eibooyo lng'ejep lenye pee meiro ntorroni, nemeimunyie nkutuk enye sapare.

¹¹Keyiere payie meitoki aas ntorrok, kake payie eas supati, neyiaya seriani, nenyok aing'oru.

¹²Amu kore nkonyek e Laitoriani naa loosipat eing'or, neinining nkiyiaa enyena nkomono enche. Kake netusuboka nkomom enye laasak loo ntorrok.>>

¹³Amaa, ng'ae sa oitaas ntae ntorno, tanaa inyoknyok aas supati?

¹⁴Kake kore abaki eitam ltung'ana ntae sina tankaraki nirara loosipat, naa imayianana. Emiata ngureticho tankaraki ninche, nimiirranana.

¹⁵Kake enkena taa ltauja linchi aajo keisinyati Kristo, oara sii Laitoriani linchi, nirretenana payie iwolikiki pooki ng'ae oipar ntae ajo nyo eitacheyie siligi linchi.

¹⁶Kake entaas inia to mborron o ta nkanyit, ining'ning taa ltauja linchi aajo kore inia niwolikitata naa kedede, paa kore lolo oodek ntae aaitarruoo nkarn tankaraki e lwuenet linchi supat taatua Kristo, neitami anyit.

¹⁷Amu naikach teneitami ntae sina iasitata supati, tanaa duaake yieunoto e Nkai inia, alang teneitami ntae sina iasitata ntorrok.

¹⁸Keitamaki naa Kristo sina nkata nabo tankaraki ng'ok, kera ninye loosipat netanang'a ltung'ana lamara loosipat, payie etum atirikoki iyioo Nkai. Ketua ninye te sesen kake neitipiuni ltau,

¹⁹nelo teinia pukunoto aliki ltauja ooyenaro[1] lomon lenyena,

²⁰amu kore lolo tauja naa ketanya apa ening Nkai, eanyuta ninche te ng'iriata ta nkata apa nachetita Noa meli. Lkuni tung'ana ake isiet ootijing'a, neitejeunyieki nkare.

²¹Kore inia naa maaji e nkipatisa naitejeu taata ntae. Meipirita taa inia ajo keituk sesen aoru latukuny, kake ntoki naitisipu ajo merekure etii ntoki niurie tekue Nkai tankaraki ketipiwua Yeso Kristo,

²²ilo oiliepa alo chumata, newuon ta nkaina e tetene e Papa etii lmalaikani o lolo oaata nkitoo o lolo oaata ngolon taabori ninye.