Read Samburu 1 Petero 4 Bible Online

1 Petero 4 - Samburu bible

1 Petero 4

¹Kore naa amu ketumo Kristo sina te sesen lenye, entanapata sii ntae payie iimaa sina ana apa neikuna ninye. Amu kore ilo otumo sina te sesen lenye tankaraki Kristo, netumuta ajo meas ng'ok,

²payie eaku merekure aa ng'uarrat e ltung'ani naaitore, kake inia nayieu Nkai tee mperot naang'or e nkichon enye tana kop.

³Itara apa nkata naado iasias mbaa naayieu loreren lemeyielo Nkai neas. Kore apa inia kata, itowuana iasias mbaa e anyit, ning'uarrichocho, nimerara, nilubobo, nitumomo aamaticho, niasias ntabo aasai nkaitok e sapare.

⁴Kore naa amu merekure irukokinono inia oitiei apa e nchirkala tenebo o ninche, neing'asia ninche nedekicho.

⁵Kake keipari kenya ninche, tekue ilo oterretene payie eiguanare looichu o lootuata.

⁶Tankaraki ana payie etilikoyieki Lomon Supati aaliki sii lolo ootuata, paa kore abaki etudung'okaki apa nkiguana ewuon eichu ana nadung'okini ltung'ana neye, newueni eichu te nkiyeng'et ana naichu Nkai.

⁷Ketaa keichunye ntokitin pooki, naaku embooi ate, niakuku ltung'ana oaaparicho aaitibiraki payie itumtum aatoomon.

⁸Kore nalang pooki, entachamata katukul, amu kejutoo ꞉nchaman ng'ok kumo.

⁹Entoomonoto miatata long'unyung'unyi.

¹⁰Meata ltung'ani leitu eicho Nkai nkichooroto payie etum ataasichere aisiaayie lkulikae ana laing'urani oisiligai le munyani e Nkai, inia natelie too nkoitieii kumo.

¹¹Kore ilo olikoo rerei le Nkai, naa meata ajo melikoo ake inia najo ꞉Nkai. Kore ilo oisiaaicho naa meata ajo meeisiaaicho to ngolon naichoo ꞉Nkai, payie etumi aaichoo Nkai nkisisa to pooki toki aimu Yeso Kristo! Nenye nkisisa o nkitoo, ntarasi o ntarasi. Aamin.

¹²Ltung'ana lainien lacham, emintoki aaing'asia tankaraki niimaritata kuna baa naagol naasaanieki ntae, eji atuwuana ntoki neitu aikata ening'i natumuto ntae.

¹³Kake kore iimaritata sinaitin ootuwuana le Kristo enting'idata, paa kore teneibalunyieki nkitoo enye nitumtum ng'ida kitok oleng.

¹⁴Imayianana ntae tenedeki ntae tankaraki nirara le Kristo, amu kore ilo Tau le Nkai, oata nkitoo naa ketii tenebo o ntae.

¹⁵Enchoo metaa meatae hoo lobo linchi oitami sina tankaraki nara ltung'ani oricho anaa lopurrucho anaa laasani loo ntorrok anaa ltung'ani odoki mbaa nemeata nejo.

¹⁶Kake teneatae lobo linchi oitamaki sina tankaraki nara le Kristo, mincho edol anyit, kake nchoo eisis Nkai tankaraki naipotieki inia arna.

¹⁷Amu ketabawua nkata nang'asu nkiguana, naa keng'asunyie ltung'ana le Nkai. Naa amaa tanaa iyioo eng'asunyie, nyo naaku too lolo lemeyanyit Lomon Supati le Nkai?

¹⁸Naa, <<Kore tanaa pecheu eeim aras e kumojik ltung'ani loosipat, nyo naaku te ilo lemeurie Nkai, nera loo ng'ok?>>

¹⁹Naaku taa, enchoo lolo tung'ana ootum sina te yieuna e Nkai, epuo kue aas supati, nepik nkaik e Nkai nkichoni enche e taata o ne nkata nalotu, inia Ai naisiligai nera Nkai naitayia pooki toki.