Read Samburu 1 Yoana 3 Bible Online

1 Yoana 3 - Samburu bible

1 Yoana 3

¹Eng'ura ja newua nchaman natachama iyioo Papa lang le chumata, payie eji iyioo nkera e Nkai! Naa ninche kira. Meyielo iyioo nkop tankaraki nemeyielo sii apa ninye.

²Lacham lainien, kore taata naa ikira nkera e Nkai, naa ewuon eitu eibalunyieki nikitiuu kenya. Ikiyielo aajo kore tenelioi Yeso, naa ikitiuu ana ninye amu ikidol ninye ana netiu.

³Naa kore pooki oata ilo siligi te ninye naa keitisiny koon ana payie era ninye sinyati.

⁴Kore pooki oas ng'ok naa lagilani loo nkitanapat, amu kore ng'ok naa ngilata ee nkitanapat e Nkai.

⁵Naa iyielolo ntae aajo keibalunyieki apa Yeso payie eoru iyioo ng'ok ang, nemeata ꞉ninye ng'oki.

⁶Kore pooki owuon taatua ninye naa meche aas ng'oki, amu kore ilo pooki oche ake aas ng'oki, naa eitu edol neitu eyielou ninye.

⁷Nakera ainien, emincho ltung'ani eitopong'oo ntae! Kore loche aas nadede naa loosipat, ana payie era ninye loosipat.

⁸Kore pooki oche aas ng'ok naa le Chitani, amu kore Chitani naa keasita ng'ok apake pee eji ninye ilo. Kore payie /eibalunyieki Nkerai e Nkai naa payie eitarruoo siaai e Chitani.

⁹Meatae hoo loino ta Nkai oas ng'oki, amu keti lantararai le Nkai atua ninye, nemeas ninye ng'oki amu keino ninye ta Nkai.

¹⁰Naa ana eyielounyieki nkera e Nkai o ne Chitani: kore pooki ng'ae lemeas sipat nemecham lalache lenye, naa mara le Nkai.

¹¹Ele naa lkilikuai litining'o apake ta ng'asunoto, nchere payie kichama iyioo,

¹²nimikiaku ana Kain oara le Chitani near lalache lenye metua. Naa amaa, aanyo payie etara ninye metua? Tankaraki kore asat enyena naa keitorrok, kake kore asat e lalache lenye naa neesipat.

¹³Eming'asia lalachera lainien tanaa keiba ntae nkop.

¹⁴Kore naa amu ikicham iyioo lalachera lang, naaku ikiyielo aajo ikitung'aitie iyioo lkiye nikijing atua nkichon. Amu kore ilo lemecham lalache lenye naa atua lkiye etii.

¹⁵Kore pooki oiba lalache lenye naa loar metua, naa iyielolo sii ntae aajo kore loar metua naa meti nkichui ee ntarasi atua ninye.

¹⁶Kore nikiteyielounyie aajo nyo nchaman nadede, naa nchere keitayia apa ꞉Yeso nkichui enye tankaraki iyioo. Naa keichiaakino sii nikintai iyioo nkichui ang tankaraki lkulikae.

¹⁷Amaa, tanaa keata ltung'ani ntokitin e ana kop naaichiwue, nemeing'urrie aicho lalache lenye oata sina, kaji eiko nchaman e Nkai tenetii atua ninye?

¹⁸Nakera ainien, mikiaku loaacham to nkutuk o te rerei ake, kake matacham taa asat o te ndedei!

¹⁹Kore tinikicham lkulie, nikiyielou aajo ikira le ndedei. Tana oitiei kincho ltauja lang metaa meata ngureticho tekue Nkai,

²⁰nchere kore tenedung'oki iyioo ltauja lang nkiguana ta mbae ake naje, ikiyielo aajo keikitok Nkai alang ltauja lang neyielo sii ntokitin pooki.

²¹Lacham lainien, kore tanaa medung'oki iyioo ltauja lang nkiguana, naa ikiata nkiteunoto nikintacheyie tekue Nkai,

²²nikitum pooki nikiomon Nkai amu ikimbung nkitanapat enyena nikias naiting'id ninye.

²³Naa ana nkitanapata enye, nchere payie kiruk nkarna e Nkerai enye Yeso Kristo nikichama likae o likae ana naitanapa ninye iyioo.

²⁴Kore ilo ooibung nkitanapat enyena newuon taatua ninye, newuon sii ꞉ninye taatua ilo. Naa te ilo Tau oichoo ꞉ninye iyioo kiyielou aajo kewuon ninye taatua iyioo.