Read Samburu Mbolunoto 10 Bible Online

Mbolunoto 10 - Samburu bible

Mbolunoto 10

¹Naitoki adol likae lmalaika kitok edou eing'uaa chumata eimulumulakino ꞉nkidis ana nanka, netii siomo nkue enye. Neilu nkomom enye ana ndama, netuwuana nkejek enyena ana lng'opeta ooilu ana nkima.

²Neibung'uta ta nkaina enye nkini buku nabolo, kore te nkeju enye e tetene neidach mpaso, neidach tene kidienye nkop.

³Nebuak to ltoilo kitok otuwuana nkupurroto e lng'atuny. Kore payie ebuak, neiro ꞉ndarat sapa too ltoilochi lenche.

⁴Naa kore payie eiro nenia ꞉darat sapa, najo aiger inia natining'o, naajoki ltoilo oing'uaa chumata, <<Milikoo inia natejo ꞉ndarat sapa, niminger.>>

⁵Neiliepie laduo malaika oitache ta mpaso o to nkop nkaina enye e tetene aing'urie chumata.

⁶Neitai lekutuk ta nkarna e Nkai, inia Ai naichu ntarasi o ntarasi, naitibira chumata o nkop o mpaso o ntoki pooki natii atua ninche nejo, <<Merekure eatae nkata!

⁷Kore payie ebau nkata nakut lmalaika le sapa mowuo, neitabaya Nkai inia kipirte enye apa naisudoro, ana natilika apake laisiaayiak oibonok lenyena.>>

⁸Naaitoki ilo toilo oing'uaa chumata airorie ajoki, <<Chomo tang'amai inia buku ta nkaina e lmalaika oitache te nkeper e mpaso o te nkeper e nkop.>>

⁹Nalo netii ilo malaika, najoki maichoo inia kini buku. Nejo, <<Iwa tama, kedua to nkocheke ino, kake kore to nkutuk ino, kemelok ana naicho ee lotoro.>>

¹⁰Naya inia buku ta nkaina e ilo malaika, nanya. Kore to nkutuk ai, neaku kemelok ana naicho ee lotoro, kake kore payie aijoo neduaru te nkocheke ai.

¹¹Naajokini, <<Meata ajo mintai aitoki naibon naipirita loreren o lochon o ltung'ana loo nkutukie naapaachpaacha o lkinkii kumo.>>