Read Samburu Mbolunoto 11 Bible Online

Mbolunoto 11 - Samburu bible

Mbolunoto 11

¹Naaichori sobua naipimichiereki naajokini, <<Chomo mpima neba nkaji e Nkai o lperere la lasar, ninken ltung'ana oaasai Nkai teinie.

²Kake tung'ai mimpim neba wuata e aulo e nkaji e Nkai, amu keichooki inie lkulie oreren. Naa keroro ꞉ninche lkerenket sinyati lapatin 42 tanaa mperot 1,260.

³Naa kaicho loibonok lainien oare meitai naibon tee nenia perot 1,260, eichopito nkilani naaitodolu aajo keata lkichiret.>>

⁴Kore lolo oibonok oare naa lng'erriyio oare o ntokitin are naaitacheyie lkilang'ilang'eta ooitachoo tekue Laitoriani oitore nkop pooki.

⁵Kore pooki ojo tara ninche, nepuku nkima too nkutukie ee lolo oibonok nemut lolo mang'ati lenche. Naa nejia eikoni teneri metua pooki ng'ae ojo tara ninche.

⁶Keata ninche nkitoria naenie nchan, payie mecha to nkop inia kata pooki eitaita naibon. Neichori aitoki nkitoria naibelekenyie nkare metaa lodo, o nkitoria nayeunyie mpukunot pooki e mutai naar lolo pooki oaamanya nkop. Neas nejia nkata pooki nayieu neas.

⁷Kore kenya payie eidip aaitai limunoto enche, nerasaki ninche ꞉ng'ues torno naing'uaa lodo le nkop, nerare, nemir near metuata.

⁸Kore seseni lenche neperioo te lkereri sapuk le ilo kerenket kitok, laa ninye apa etecheyieki Laitoriani lenche. Kore ilo kerenket, naa keitorno ana Sodom tanaa Misiri.

⁹Kore tee mperot uni o nusu, neing'or ltung'ana loo lochon pooki o loreren pooki o loo nkutukie pooki o nkopi pooki seseni lenche eperi, nemit eyae aanukaa.

¹⁰Kore ltung'ana oaamanya nkop neng'ida edaa neranyicho, neichooro nkichoorot tankaraki lkiye loo lolo oibonok oare ooitemeito ltung'ana le nkop.

¹¹Kake kore eima mperot uni o nusu, nekutaki ꞉Nkai ninche nkichui, neinyuototo aaitachoo, neibung ꞉ngureticho sapuk lolo pooki ootoduaa.

¹²Nening lolo oibonok oare ltoilo obuak eing'uaa chumata ejoki, <<Eiliepu ootu ene!>> Neiliep aapuo chumata te nkidis, eing'orita lmang'ati lenche.

¹³Kore ake te inia kata neoch nkikirikiroto torno ilo lkerenket near motua e tomon e ilo kerenket. Nemuta ltung'ana 7,000, naa kore leitu eye, neiputukuny nerrep Nkai e chumata.

¹⁴Neidip mutai e are torno naitemicho atung'ututari, kake kelotuta nkae e uni torno asieku!

¹⁵Nekut lmalaika le sapa mowuo enye, naning ltoilochi oobuak eing'uaa chumata ejo, <<Kore nkitoria e ana kop netaa nkitoria e Laitoriani o Kristo lenye, naa keitore ninye ntarasi o ntarasi.>>

¹⁶Kore lolo payiani kutuaa tikitam o ong'uan oowueni too lorikan lenche le nkitoo tekue Nkai, nenang nkop too nkomomi nesai Nkai,

¹⁷ejo, <<Ikincho iyie nache, Laitoriani Nkai Napeny ngolon, Iyie otii taata niti apake, amu intodolua nkitoria ino, nitang'asua aitoreicho.

¹⁸Ketogorete ltung'ana loo lochon, kake ketogore sii Nkai, nebau nkata naiguanareki ltung'ana pooki apa ootuata. Netabawua nkata nilak laisiaayiak linono, lolo oibonok linono, o lolo sinyat linono, lolo ooyanyit nkarna ino, lkunini o lkutuaa. Neyewuo nkata payie intarruoo lolo ooitarruoo nkop.>>

¹⁹Neboli nkaji e Nkai te chumata, nelioi sanduku le sotua te inie. Nepuku teinie nkiwuang'at o ndarat o nkukurrukurroto o nkirikiroto e nkop o nchan ee soito sapuki.