Read Samburu Mbolunoto 14 Bible Online

Mbolunoto 14 - Samburu bible

Mbolunoto 14

¹Naitoki aing'oricho, nadol Lkuo leker eitache to ldonyuo le Sion, tenebo o ltung'ana 144,000 eigero nkarna enye o nkarna e Papa lenye too nkomomi.

²Naning ltoilo oing'uaa chumata otuwuana nkuroto ee nkariak e naiurraur o ndarat e nkukurrukurroto. Inji etuwuana ilo toilo ana ltoilo loo ltung'ana oochito nkinantani enche.

³Nerany ninche sinkolio ng'ejuk tekue lorika le nkitoo le Nkai o tekue naaduo tokitin ong'uan naaichu naatuwuana ng'uesi o tekue lolo payiani kutuaa. Meatae ltung'ani oidima ateyielo ilo sinkolio mara ake lolo tung'ana 144,000 ooitejewuaki to nkop.

⁴Kore ninche naa ltung'ana leitu eitarruoo ate aasai nkulie aitok, kake keirukurukore Lkuo leker ng'oji pooki nechomo. Keinyieng'uaki ninche taatua ltung'ana, ana ltung'ana lekue oichori Nkai o Lkuo leker.

⁵Neitu aikata etumieki sapare, amu kera ltung'ana lemeata nakurrieki.

⁶Naitoki adol likae malaika eloito te nkeper e nkai, eata lomon supati laa ntarasi, nemeata ajo meliki ltung'ana pooki le nkop aa ltung'ana loo nkopi pooki o loreren pooki o ltung'ana loo nkutukie pooki o lochon pooki le nkop.

⁷Nebuak ilo malaika ajo, <<Eyanyita Nkai, nimbalunyienyie aajo keikitok, amu etabawua nkata e nkiguana enye. Entasai ilo laa ninye oitibira keper o nkop o mpaso o nkariak pooki naaruko.>>

⁸Kore payie eidip ilo malaika lekue achomo, neitoki likae aliooi nebuak ajo, <<Eidaayie ilo kerenket sapuk oji Babilon! Amu ninye oitamata lochon pooki naichuo e loloito enye.>>

⁹Neitoki likae malaika aliooi eidipa laaduo malaikani oare aatung'ututari. Nebuakita ajo, <<Kore pooki ng'ae osai ng'ues torno o nkitanyanyukoto enye, neata lminchire to nkomom o nkaina enye,

¹⁰meata ajo megorokino ꞉Nkai neiteme oleng, netuwuanai ltung'ani oatamata naichuo nadua nemeituchula natubukoka ꞉Nkai lkikompe. Kore lolo tung'ana, neitemei tekue lmalaikani sinyat o Lkuo leker, te nkima o ntoki naji salpa[7].

¹¹Kore nkima naiteme ninche, neilu ntarasi o ntarasi. Naa kore ꞉lolo oaasai ng'ues torno o nkitanyanyukoto enye, neata lminchire le nkarna enye, nemeyeng'iyeng'a kuarie o parkiji te mion enche.

¹²Naaku keyiere payie eng'iri sinyat le Nkai sina oitami, lolo taa ooning nkitanapat e Nkai neibung nkurukoto e Yeso.>>

¹³Naning taa ltoilo oing'uaa chumata ejo, <<Ngero kuna baa: Emayiana lolo ooye etii atua Laitoriani, ang'asu taata nelo kue.>> Nejo Ltau le Nkai, <<Ee kedede inia, meitoki ninche aaimaa siaai lenche ogol, amu kore ꞉mbaa supati naataasa neijipaa ninche.>>

¹⁴Nadol aitoki nkidis naibor o ltung'ani otuwuana Nkerai e ltung'ani ewuenita te inia kidis. Kore te nkue enye neata nkopiyia e saabu e nkitoo, neibung'uta lpanka odung'ieki nkano ta nkaina enye.

¹⁵Neitoki likae malaika apuku eing'uaa nkaji e Nkai nati chumata, nebuaaki laduo likae owuenita te nkidis ajoki, <<Mbung'a lpanka lino odung'ieki nkano, ning'asu ndung'ore amu keo inia nadung'i to nkop, naa nkata e ndung'ore enche taata.>>

¹⁶Neyuk ꞉ilo owuenita te nkeper e nkidis lpanka lenye odung'ieki nkano nedung, nebosu ndung'ore to nkop.

¹⁷Naitoki adol likae malaika epuku eing'uaa nkaji e Nkai nati chumata, eata aitoki ninye lpanka opi odung'ieki nkano.

¹⁸Nepuku aitoki likae malaika tankalo lperere la lasar opejieki naing'urre narropili, ilo laa ninye oitore nkima e ilo korror la lasar, neipot laduo malaika oata lpanka opi odung'ieki nkano to ltoilo sapuk ajoki, <<Taasichiere lpanka lino opi odung'ieki nkano, nturrurru sura naabore lturrurri loo lng'anayio lo lmusabibu to nkop pooki, amu keoto pooki.>>

¹⁹Neyuk ilo malaika lpanka lenye odung'ieki nkano aimie nkeper e nkop, nedung'u lturrurri laa lng'anayio lo lmusabibu to nkop, nenang'aki ng'oji neironyieki lmusabibu ana nkitodolunoto e ngoro kitok e Nkai.

²⁰Nepurdi lolo musabibuni ta aulo e lkerenket, neruko lodo to ng'oji neironyieki lmusabibu aaku sere nagut nabaki sosiom le mbarta, nenang'ari matejo kilomitani 300.