Read Samburu Mbolunoto 15 Bible Online

Mbolunoto 15 - Samburu bible

Mbolunoto 15

¹Nadol te chumata nkae mbae kitok naing'asicho. Etii lmalaikani sapa oaata nkitoria naitemeyie nkop taa mbaa sapa torrok e siedi naa ninche eiting'ie ngoro e Nkai.

²Naitoki adol ntoki nalioo etuwuana mpaso e nkilaas echula o nkima. Neitachoo te nkeper ꞉ltung'ana pooki ooisula taa mbaa e ng'ues torno o nkitanyanyukoto enye o nampa e inia ng'ues naitacheki inia arna. Kore lolo pooki neibung'uta nkinantani naaichoo ꞉Nkai taa nkaik,

³neranyita sinkolio otuwuana otaranya apa laisiaayiani le Nkai oji Musa, aaranyaki Lkuo leker ejo, <<Keikutuaa neing'asicho asat inono, Laitoriani Openy ngolon. Kesipa nedede nkoito inono, Lkinkii loo lochon.

⁴Ng'ae sa limikiurie iyie Laitoriani, neyanyit nkarna ino? Amu iyie ake apeny oara sinyati. Kepuonu ltung'ana loo lochon pooki, nikisai iyie, amu eibalakinyieki pooki ng'ae asat inono e sipata.>>

⁵Kore payie eidip lolo tung'ana aatarany, naitoki adol ajo etoboloki nkaji e Nkai te chumata, inie ng'oji neitodolu netii Nkai.

⁶Nepuku lmalaikani sapa ta nkaji e Nkai oopuoi aaicho mbaa sapa torrok. Neichopito pooki nankan naapuyiapui naaibor, nerrooch ntokitin naatuwuana nkeenita e saabu lgooitie lenche.

⁷Neicho ꞉nabo ee nenia tokitin ong'uan naaichu naatuwuana ng'uesi lolo malaikani pooki sapa ncharaan e saabu naabore ngoro torno e Nkai, inia Ai naichu ntarasi o ntarasi.

⁸Neiput mpuro e nkitoo e Nkai o ngolon enye nkaji e Nkai, metaa meatae loidim atijing'a ana meidipata nenia baa sapa torrok aaima naasita lolo malaikani sapa.