Read Samburu Mbolunoto 16 Bible Online

Mbolunoto 16 - Samburu bible

Mbolunoto 16

¹Naitoki aning ltoilo sapuk oing'uaa nkaji e Nkai te chumata ejoki laaduo lmalaikani sapa, <<Enchom entubukoki nkop ngoro e Nkai natii nenia charaan sapa.>>

²Nelo lmalaika lekue, nebukoki nkop ngoro e Nkai natii ncharaa enye. Nepuku ng'oldonyot torrok to pooki ng'ae oata lminchire le inia ng'ues torno netasayia nkitanyanyukoto enye.

³Nebukoki ꞉lmalaika le oare ngoro e Nkai natii ncharaa enye mpaso, neibelekenya nkare e mpaso aaku lodo atuwuana lodo lo ltung'ani otua. Neye ntoki pooki natii atua mpaso.

⁴Nebukoki aitoki lmalaika le okuni ngoro e Nkai natii ncharaa enye seriak o nkonyek ee nkariak, neaku lodo.

⁵Naning lmalaika oitore nkariak ejo, <<Ira iyie Nkai e sipata, nira Nkai natii taata nitii apake nira sinyati, amu intabayie inia goro ino.

⁶Amu keibukoitie ꞉ltung'ana torrok lodo loo sinyat o loo loibonok le Nkai, neiteme ꞉Nkai ninche aicho lodo metamata[8] amu inia nairirikino.>>

⁷Naning ltoilo oing'uaa lperere la lasar ejo, <<Kedede ira iyie Nkai Napeny ngolon, naa kore nkiguana ino naa kedede nesipa.>>

⁸Nebukoki lmalaika le oong'uan ngoro e Nkai natii ncharaa enye ndama, neichori ndama ngolon napejie ltung'ana te nkirewuaj nairewua oleng.

⁹Nepeji ltung'ana te inia nkirewuaj nairewua, nedek ꞉lolo tung'ana nkarna e Nkai naa ninye naitore inia torno namuticho. Kake kore eyia, neany eirriidu ng'ok enche, nemeisis Nkai tankaraki nkitoo enye.

¹⁰Nebukoki aitoki lmalaika le imiet ngoro e Nkai natii ncharaa enye lorika le nkitoo le naduo ng'ues torno, nejing naimin atua nkitoria enye. Neony ꞉ltung'ana le nkitoria enye lala te mion,

¹¹nedek Nkai e chumata tankaraki mion o ng'oldonyot enche. Kake kore ake abaki eyia eitu eirriidu asat enche torrok.

¹²Nebukoki aitoki lmalaika le ile ngoro e Nkai natii ncharaa enye sere kitok naji Yuparet, neitoi nkare enye aitibiraki nkoitiei lkinkii ooing'uaa neiliepunyie ndama.

¹³Nadol lairiruani okuni ootuwuana ntuaan epuku too nkutukie e inia meu o ne inia ng'ues torno o ne loiboni le sapare.[9]

¹⁴Kore lolo naa lairiruani oaas mbaa kutuaa naaing'asicho. Kepuo netii lkinkii pooki le nkop aaiturrurru meotu ng'oji nenyayie larrabal, aarare Laitoriani te inia parri kitok e Nkai Napeny ngolon.

¹⁵<<Ng'ura! Kalotu meitiekini ana lapurroni. Emayiana ilo owuon erripicho neata nkilani enyena naaichop payie melo ake meichopo nenya anyit.>>

¹⁶Neiturrurru ꞉lairiruani larikok pooki o sikarini lenche loo njorin to ng'oji neji to nkutuk ee Lburania Amagedon.

¹⁷Nebukoki ꞉lmalaika le sapa ngoro e Nkai natii ncharaa enye siwuo, naning ltoilo kitok ta nkaji e Nkai te chumata eing'uaa lorika le Nkai le nkitoo ejo, <<Etaase!>>

¹⁸Nepuku nkiwuang'at o ndarat o nkukurrukurroto o nkikirikiroto kitok oleng e nkop, neitu aikata edoli pee eji etijing'a ltung'ani nkop.

¹⁹Nebaa aoro ilo kerenket kitok aaku oarat uni, neurori sii lkerenketi kutuaa pooki le nkop. Neparru ꞉Nkai Babilon, ilo kerenket sapuk neisimaki metamata ngoro enye nabore ncharaa.

²⁰Kore lkuran pooki le nkare neimis, nemeitokini hoo aadol ldonyuo.

²¹Nebukunyie nchan ee soito te nkeper e nkai, naa kore nkirochi ee lolo soito naa matejo lkiloii 40, neurokino ltung'ana le nkop. Nedek ꞉ltung'ana Nkai tankaraki nara inia chan ee soito torno oleng.