Read Samburu Mbolunoto 17 Bible Online

Mbolunoto 17 - Samburu bible

Mbolunoto 17

¹Kore lobo laa laaduo malaikani sapa ootubukokita nkop ngoro e Nkai natii ncharaan enche sapa, nelotu natii naajoki, <<Wou ene, maitoduaa nkiguana nadung'okini inia milayoi yieloti nawuon tankalo nkariak.

²Netoboitiere ꞉lkinkii pooki le nkop aasie loloito, neitemera ꞉ninye ltung'ana pooki le nkop te loloito enye.>>

³Naanap nanu ꞉ilo malaika ta Ltau Sinyati naaya lkees, nadol te inie ng'oroyieni nawuon te nkeper e ng'ues torno mugie naata te sesen lenye pooki nkarn naadek Nkai, neata nkuechi sapa o mowuarak tomon.

⁴Kore inia ng'oroyieni, neichopito nkila mugie o nanyiekie o masaa e sikar e saabu o nee soito oogol nkinyiang'a o saen naagol nkinyiang'a. Kore ta nkaina enye, neibung'uta nkikompe e saabu nabore ntaboi o ntorrok e loloito enye.

⁵Neigeri to nkomom enye nkarna nemeitoki nayielo neji, <<Lkerenket kitok le Babilon, opukunyie milayoni o ntabo e nkop.>>

⁶Nadol ajo ketemere inia ng'oroyieni tankaraki lodo loo sinyat le Nkai, lolo oaataraki tankaraki limunoto e Yeso. Naing'asia oleng.

⁷Naajoki ilo malaika, <<Aanyo payie ing'asia? Kaaliki kipirte e mbae naisudoro e ana ng'oroyieni o ne ng'ues torno nanapita ninye naata nkuechi sapa o mowuarak tomon.

⁸Kore inia ng'ues nitoduaa, keichu apa kake merekure taata eichu. Ketaa payie eiliepu to lodo le nkop nelo meidakieki katukul. Naa kore ltung'ana pooki oaamanya nkop, lolo leitu eigeri nkarn enche to mbuku e nkichui ee ntarasi apake payie eitamanyuni nkop, neing'asia tenedol inia ng'ues torno amu keichu apa ang'as nemerekure eichu taata, kake keitoki alotu.

⁹<<Keyiere taa niata ng'eno nagut ta ana bae. Kore nkuechi sapa, neipirita ndonyuo sapa naawuenita inia ng'oroyieni, neipirita sii nenia kuechi lkinkii sapa.

¹⁰Kore imiet, neidipa aatuata, neitoricho taata lobo, newuon elotu le siedi, naa kore tenelotu, neichori meitoreicho te nkini kata.

¹¹Kore inia ng'ues torno naichu apa ang'as tekue, naa ninye lkinkii le isiet oirukurukore laaduo kinkii sapa, naa keidakieki sii ninye.

¹²Kore mowuarak tomon nitoduaa neipirita lkinkii tomon lewuon eitu eng'asu aaitoreicho, kake keichori nkitoria meitoreicho nkata kini ana lkinkii tenebo o inia ng'ues torno.

¹³Kore ninche, naa kenya nabo aaicho ngolon o nkitoria enche inia ng'ues.

¹⁴Kerare ninche o inia ng'ues Lkuo leker, kake kemir ninche ꞉Lkuo leker. Kemir amu kera ninye Laitoriani laa laitoriak, nera Lkinkii loo lkinkii naa kore lolo ooirukurukore ninye naa lolo ooipoto netegelua ꞉Nkai, neisiligai te ninye.>>

¹⁵Naajoki aitoki lmalaika, <<Kore nkariak naawuenita naduo milayoi, naa ltung'ana o lturrurri loo ltung'ana o lochon o ltung'ana loo nkutukie pooki.

¹⁶Kore naaduo mowuarak tomon o naduo ng'ues torno, neibaii inia milayoi. Neoru ninye ntokitin enyena pooki, nechurt metaa meata nkila. Nenya nkiri e inia ng'oroyieni neinuaaki nkima metumuta.

¹⁷Amu Nkai naichoo ninche meitabai nayieu ninye, aanya nabo aaicho ngolon o nkitoria enche inia ng'ues torno ana metabai pooki natejo Nkai.

¹⁸Kore inia ng'oroyieni nitoduaa, naa ilo kerenket kitok oitore ꞉lkinkii lenyena lkinkii loo lochon pooki le nkop.>>