Read Samburu Mbolunoto 18 Bible Online

Mbolunoto 18 - Samburu bible

Mbolunoto 18

¹Kore payie eim kuna baa pooki, nadol aitoki likae malaika edou eing'uaa chumata eata nkitoria kitok, neitulu wong'an e nkitoo enye nkop.

²Nebuak to ltoilo sapuk ajo, <<Eidaayie! Eidaayie ilo kerenket sapuk oji Babilon! Etaa ninye nkang ee lairiruani, o ng'oji neisigaki ltauja pooki torrok, neisigaki nkueeny pooki naatolo, neisigaki ng'uesi pooki torrok naatolo neibae,

³amu etamata lochon pooki naichuo e loloito enye, neng'uar aas loloito o ninye. Kore lkinkii le nkop, neas loloito o ninye, netaa lolo ooinyiang'icho nemiricho garsisi tankaraki parakuoicho enye.>>

⁴Naitoki aning likae toilo eipoticho te chumata ejo, <<Ltung'ana lainien, entupuku entung'ai Babilon, payie miasias ng'ok ana ltung'ana le Babilon, nemeiteme ntae Nkai teneiteme ilo kerenket.

⁵Amu eturupate ng'ok enyena ana metabaki chumata, neitu erikino Nkai ntorrok naataasa.

⁶Kore ntorrok pooki naataasa ana ng'oroyieni, talaaki ninye aitaas inia torno nataasa, talaaki inia torno nataasa nkatitin are. Mputaki lkikompe nduaran nkatitin are, nduaran nalang naitaasa ꞉ninye lkulie.

⁷Nchoo ninye sina o lkichirai aiputaki, aitirisioki ilo kar oatama o nkikarra naikarra ajo, <Kara kitok oleng.> Amu kewuon ake eliepunye koon ajo, <Kara nanu nkinkii naitoricho, nawuenita to lorika lai le nkitoo! Mara nanu nkoliai, namatum aikata lkichirai le nkoliai.>

⁸Kore tankaraki inia, keyakini ninye mutai ta mparri nabo, lkiye o lkichirai le nkoliai o lamei. Naa kepejori te nkima, amu kore Laitoriani Nkai naiguanare ninye naa Nkai Napeny ngolon.>>

⁹Kore tenedol lkinkii pooki le nkop oaatama rraa netaasa loloito o ninye mpuro enyeita ninye nkima, nebuak te lkichirai aaichiraki ninye.

¹⁰Neitachoo elakua amu keurie aajo ketum inia mion sapuk natumuto ninye. Nejo, <<Oi Oi, ele kerenket kitok! Oi siake iyie Babilon, iyie lkerenket ogol! Te nkini kata ake dorrop nelotu mutata ino!>>

¹¹Kore ltung'ana le nkop oomir neinyiang'u ntokitin, naa keichir neisinanio tankaraki Babilon amu merekure eatae loinyiang'u ntokitin enche.

¹²Merekure eatae loinyiang'u saabu enche o nkocholai o soito oogol nkinyiang'a o saen naagol nkinyiang'a, nemeatae loinyiang'u nankan enche naapuyiapui o naanyokuoo, naanana o mugiein, nemeatae loinyiang'u nkeek enche naarropil. Nemeatae loinyiang'u masaa enche naateguetunyieki lala loo ltomia o nkeek naagol nkinyiang'a o surutiai o senkei o mpagas.

¹³Nemeatae loinyiang'u mpukunot pooki e ila enche naarropil o naichi e lmusabibu naamati o mpukunot pooki ee ndaki. Nemeatae loinyiang'u nkichu enche o nkerra o mbartan o nkarrin naayiataa ꞉mbartan o ltung'ana.

¹⁴Nejoki lolo oomiricho neinyiang'u ntokitin ilo Kerenket <<Kore ntokitin pooki supati naacham ꞉ltau lino, naa ikitung'aitie. Kore ntokitin inono pooki e rraa o ntokitin naaipilpil nisikarrare, eimina nimintoki aikata adol ntarasi.>>

¹⁵Kore ltung'ana ootimira kuna tokitin netum parakuoicho ta Babilon, naa keitachoo elakua amu keurie aajo ketum inia mion sapuk natumuto ninye. Keichir neisinanio,

¹⁶nebuak aajo, <<Oi Oi, ele kerenket kitok oichopito nankan naapuyiapui o naaibala o mugiein, neisikarrieki ta saabu o too soito oogol nkinyiang'a o taa saen naagol nkinyiang'a!

¹⁷Kore te nkini kata ake dorrop, neichunye parakuoicho ino!>> Kore ltung'ana ooreu melin o loodiraa melin o ltung'ana ooisiaicho tee melin o ltung'ana oomiricho tee melin, neitachoo elakua.

¹⁸Kore payie edol mpuro ta Babilon enyeita nkima, nebuak aajo, <<Eitu taa aikata edoli lkerenket kitok otuwuana ele!>>

¹⁹Neisuaaki ate nkulupo nkuechi aaitodolu sina lenche, nebuak aaichir neisinanio ejo, <<Oi Oi, ele kerenket kitok. Kore pooki oodiraa melin aapuo aainyiang'u ntokitin, neaku parakuo tankaraki garsisicho enye. Eji kore te nkini kata ake dorrop, nelotu mutata enye!

²⁰Kake ting'idai iyie nachumata tankaraki ninye! Enting'idata ntae sinyat lenyena o Lkipaareta o loibonok le Nkai! Amu etudung'oka ꞉Nkai Babilon nkiguana tankaraki mbaa torrok naaitaasa ntae.>>

²¹Nerrapu ꞉lmalaika kitok soit sapuk owuana soit oitamanari aaidong'ie nkano, nenang'aki atua mpaso nejo, <<Nejia eikoni tenenang'ieki Babilon nkop to ngoro aar aaichu, nemeitokini aikata aadol ntarasi.

²²Meatae ltung'ani aikata oitoki aning ltung'ana eochito nkinantani o larriyiak le ranyare o lakutak loo ndulen o lakutak loo mowuarak taatua iyie. Nemeatae ltung'ana oocheticho tanaa laguetak arriyiak ooitokini aatum taatua iyie. Nemeitokini aikata aaning ltoilo lo ltinka oidong'ichiereki taatua iyie.

²³Meitoki aikata ltaa ailu taatua iyie. Nemeitokini aikata aaning loyemicho tanaa nayemi taatua iyie. Amu kore apa ltung'ana linono ooinyiang'icho nemiricho, naa keikutuaa apa aalang ltung'ana pooki le nkop, netopong'ori lochon le nkop pooki tankaraki nkurupore ino.

²⁴Kore taatua ninye netumi lodo loo loibonok le Nkai o sinyat lenyena o lkulie tung'ana pooki oaataraki to nkop.>>