Read Samburu Mbolunoto 19 Bible Online

Mbolunoto 19 - Samburu bible

Mbolunoto 19

¹Kore payie eidip ilo malaika kitok airoro, naning ltoilo otuwuana lo lturrur kitok te chumata ebuak ajo, <<Meisisi Laitoriani![10] Kore njeunoto o nkitoo o ngolon naa Nkai ang eing'uaa.

²Kedede nkiguana enye nesipa, netudung'oka inia milayoi kitok nkiguana, inia naitarruoyie nkop ta sayiata ee nkaitok e sapare. Etudung'oka ꞉Nkai ninye nkiguana aitalaku laisiaayiak lenyena oaatara metuata.>>

³Neitoki ltoilo otuwuana la laduo turrur kitok abuak ajo, <<Meisisi Laitoriani! Meyegari aikata mpuro nailiapu te Babilon!>>

⁴Nenang nkop inia kata laaduo payiani kutuaa 24 o naaduo tokitin ong'uan naaichu naatuwuana ng'uesi, aasai Nkai ewuon to lorika lenye le nkitoo. Nebuak aajo, <<Aamin! Meisisi Laitoriani!>>

⁵Naning ltoilo to lorika le nkitoo ejo, <<Esisa Nkai ang, ntae laisiaayiak lenyena pooki ooyanyit ninye, ltung'ana kunini o lkutuaa!>>

⁶Naitoki aning ltoilo otuwuana ltoilo loo ltung'ana kumo oobuakita, tanaa nkuroto ee nkariak e naiurraur tanaa ndarat e nkukurrukurroto ojo, <<Meisisi Laitoriani! Amu kore Laitoriani Nkai ang, naa Nkai Napeny ngolon neitoricho.

⁷Mating'idata pooki nikichipa, nikincho ninye nkanyit! Amu etabawua nkata e nkiyema e Lkuo leker, neitanapa inia nayemi koon.

⁸Eichoo ꞉Nkai ninye nanka supat napuyiapui naibor meichopo.>> Amu kore nanka napuyiapui keitacheki asat supati ee sinyat le Nkai.

⁹Naajoki lmalaika, <<Ngero ana: Emayiana lolo ooitoomonoki ta latim le nkiyema e Lkuo leker!>> Naajoki aitoki, <<Kedede kulo rereii le Nkai.>>

¹⁰Narriakino nkejek enyena asai, kake naajoki, <<Mikisai nanu! Kara ake nanu laisiaayiani le Nkai otuwuana iyie o lalachera linono oaata limunoto e Yeso. Nkai ake apeny tasayia! Amu kore ltau le naibon e Nkai naa keibalie neyanyit Yeso.>>

¹¹Naitoki adol chumata etobole, naa ng'ura, eti mbarta naibor naitache teinie, naa kore lowuenita keji nkarna Loisiligai neji aitoki Lodede naa ndedei easichere tenedung nkiguana o tenenya larrabal o lmang'ati lenyena.

¹²Kore nkonyek enyena, neilu ana nkima nailu, netii nkopiyiani kunini e nkitoo kumo nkue enye. Netii nkarna naigerokino naa ninye ake openy oyielo kipirte enye.

¹³Neimulmulakino nkila naitodokaki atua lodo, neji nkarna naipotieki, Rerei le Nkai.

¹⁴Kore njorin pooki e chumata neirukurukore ninye edirita mbartan naaibor, neichopito nkilani naaibor supati naapuyiapui.

¹⁵Neimu nkutuk enye lalem opi laa ninye earie lochon. Keitore ꞉ninye ninche to sobua e senkei, naa keruko lodo ana naruko nkare ee lng'anayio lo lmusabibu teneironyi, eitodolu inia ngoro e Nkai Napeny ngolon.

¹⁶Kore nkarna naigero te nkila o te nkupes enye naa ana: <<Lkinkii loo lkinkii o Laitoriani laa laitoriak.>>

¹⁷Nadol aitoki lmalaika oitache ta ndama, ebuaakita lmotonyi pooki oopuo ta ai ajoki, <<Wootu, enturrurrunyie tankaraki ndaata sapuk naitayia Nkai,

¹⁸payie itumtum aatam nkiri ee lkinkii o lkutuaa loo sikarini o ltung'ana kutuaa o mbartan o ltung'ana oodir mbartan aareu o nkiri ee ltung'ana pooki, rrindiki o lamara rrindiki, lkunini o lkutuaa.>>

¹⁹Nadol napa ng'ues torno o lkinkii pooki le nkop o njorin enche, eiturrurrunyie aanya larrabal o ilo odirita mbarta naibor o njore enye.

²⁰Kake neibung'i inia ng'ues torno tenebo o loiboni le sapare oataasa mbaa kutuaa naaing'asicho tekue inia ng'ues. Kore nenia baa e nking'asia, netasapie ltung'ana pooki ootipikaki lminchire le inia ng'ues, lolo oaatasayia nkitanyanyukoto enye. Nenang'akini eichu inia ng'ues torno o loiboni le sapare mpaso e nkima nailu to ntoki naji salpa[11].

²¹Kore nkulie jorin enche pooki, nemut ꞉ilo odirita mbarta ta lalem opi opuku to nkutuk enye. Neitiemu lmotonyi ate tee nkiri enche.