Read Samburu Mbolunoto 21 Bible Online

Mbolunoto 21 - Samburu bible

Mbolunoto 21

¹Nadol chumata ng'ejuk o nkop ng'ejuk amu eidipa chumata musana o nkop musana aichunye, nemerekure abaki eatae mpaso.

²Nadol aitoki lkerenket sinyati, aa taa lkerenket le Yerusalem ng'ejuk, edou eing'uaa chumata inie netii Nkai, eitibiraki ana nkoliontoi naisikarrieki tankaraki latim le nkiyema enye, neterretene payie eng'amaa lpayian ooyem.

³Naning ltoilo sapuk oipoticho to lorika le nkitoo ejo, <<Kemanya taata Nkai atua ltung'ana lenyena, naa keaku ninye tenebo o ninche. Keaku ninche ltung'ana lenyena naa kebik ninye koon tenebo o ninche, neaku Nkai enche.

⁴Kejut lkiyioi pooki too nkonyek enche, nemeitokini aata katukul lkiye tanaa sina tanaa nkichirata tanaa mion, amu eidipa mbaa e apa aatung'ututari.>>

⁵Nejo ilo owuon to lorika le nkitoo, <<Kaiteng'ejukuto ntokitin pooki!>> Naajoki aitoki nanu, <<Ngero nenia baa natejo taata, amu keisiligai kulo rereii nedede.>>

⁶Naigil ajoki, <<Aidipa ataasa mbaa pooki! Kara nanu Lekue nara Lesiedi, Ng'asunoto o Nkiting'oto. Kaicho pooki oaata nkure nkare naing'uaa lchorro le nkare e nkichui, nemeitoki eitalaki.

⁷Kore inia naa nkichooroto naicho pooki ng'ae ooisul. Kaaku nanu Nkai enye, neaku ninye nkerai ai.

⁸Kake kore ltung'ana gureti o lemeiruk o looitarroitie ate aas asat torrok o loaar ltung'ana metuata o lolo ooboitiere lkulie tung'ana te sesen lamara lpayiani tanaa sii ntomonok enche o lairupok o loaasai nkaitok e sapare o loaasapicho, naa kenang'akini atua lbalbal le nkima napejieki ntoki naji salpa naa ele taa lkiye le oare.>>

⁹Kore lobo loo lolo malaikani sapa oaata ncharaan sapa naabore mbaa torrok e Nkai, nelotu natii naajoki, <<Wou maaitoduaa nkaibartani e Lkuo leker.>>

¹⁰Kore etuwuana kaidetidetita, naanap lmalaika naaya nkeper e ldonyuo kitok oodo oleng. Naaitodol teinie lkerenket sinyati oji Yerusalem edou te chumata eing'uaa inie netii Nkai

¹¹neong te nkitoo e Nkai. Neong ilo kerenket ana soit oipilipil ogol nkinyiang'a, ana soit oji jasipa neong ana nkilaas anaa nkare jirlil.

¹²Neata suntai naado natii ltimito tomon o oare, nemeatae ltim lemerripito lmalaika, neigerokino nkarn ee lmareita tomon o oare le Isirael.

¹³Ketii ltimito okuni loosaen, netii okuni maikope, netii okuni kopikop, netii okuni loontoluo.

¹⁴Kore inia suntai, neitache te nkeper ee soito tomon o oare lo lkitamanyunoto, meata too lolo soito lemeigerokino nkarna nabo ee Lkipaareta tomon o oare lo Lkuo leker.

¹⁵Kore ilo malaika laairorie nanu, neata sobua e saabu naipimichiereki, payie etum aipima neba ilo kerenket o neba ltimito lenyena o neba sunta.

¹⁶Kore ilo kerenket, naa kerisio mbat pukura ong'uan, nerisio nkadoro o lalau, naa kore payie eipim ꞉lmalaika adol neba, netum ajo kilomitani nkalupuni are o ip are[12] nkadoro o lalau.

¹⁷Neitoki aipim, nedol ajo mitai 65[13] nkurruchai e suntai ana neiko ltung'ana anaa lmalaikani tenesaan ntokitin.

¹⁸Kore ntoki naitibirieki suntai naa ntoki naji jasipa, naa kore ntokitin pooki naatii ilo kerenket naa saabu eitibirieki, neong ana nkilaas.

¹⁹Kore soito lo lkitamanyunoto le ilo kerenket, neisikarrieki too mpukunot pooki ee soito oogol nkinyiang'a. Kore soit lekue lo lkitamanyunoto, neisikarrieki to soit ogol nkinyiang'a oji jasipa, kore le oare neisikarrieki ta sapaya, neisikarrieki le okuni ta agate, neisikarrieki le ong'uan te emeralid,

²⁰neisikarrieki le imiet to onis, neisikarrieki le ile ta kanelian, neisikarrieki le sapa te kirisiolait, neisikarrieki le isiet te beril, neisikarrieki le saal to tobas, neisikairrieki le tomon to kirisopires, neisikarrieki le tomon o obo ta jasint, neisikarrieki le tomon o oare ta ametisit.

²¹Kore ltimito pukura tomon o oare naa saen naagol nkinyang'a tomon o oare eitibirieki meata ltim lamara saei obo ogol nkinyang'a eitibirieki. Kore lketiketi lo lkerenket, neitibirieki saabu lemeitoki echulare, oong ana nkilaas.

²²Eitu adol nkaji e Nkai te ilo kerenket amu Laitoriani Nkai Napeny ngolon o Lkuo leker ootijing'a mpaach enye.

²³Nemeyieu ilo kerenket wong'an e ndama tanaa ne lapa, amu nkitoo e Nkai naitoong'ita naa Lkuo leker wong'an enye.

²⁴Kore wong'an e ilo kerenket, naa ninye ebikie lochon pooki, neyau lkinkii parakuoicho enche inie.

²⁵Nemeikeni aikata ltimito lenyena, amu meatae kuarie te inie.

²⁶Naa keyau lochon ntokitin e tipat o parakuoicho ilo kerenket.

²⁷Nemejing aikata ntoki torno, tanaa ilo oas ntabo, tanaa losapicho. Kore loojing ilo kerenket, naa lolo ake oopeny ooigeroki nkarn to mbuku e Lkuo leker natii nkarn ee lolo oaata nkichui ee ntarasi.