Read Samburu Mbolunoto 22 Bible Online

Mbolunoto 22 - Samburu bible

Mbolunoto 22

¹Naaitoki ꞉lmalaika aitodol sere naing'uaa nkare e nkichui, naong ana nkilaas nerukunyie eing'uaa lorika le nkitoo le Nkai o lo Lkuo leker,

²nenang'ari aim nkiji e lketiketi le ilo kerenket. Kore lkokuno pukura le inia sere, netii lcheni le nkichui.[14] Neiu lng'anayio nkatitin tomon o oare, meata lapa lemeiu lng'anayio. Kore mbene ilo cheni naa lmairo oichiunyie ltung'ana lbaa.

³Nemeatae ldeket oichori metijing'a ilo kerenket, keti ilo kerenket lorika le nkitoo e Nkai o Lkuo leker, neisiaai Nkai ꞉laisiaayiak lenyena.

⁴Kedol ꞉ninche nkomom e Nkai, neigeri nkarna enye too nkomomi enche.

⁵Nemeatae kuarie te inie, nemeyieu ꞉ninche wong'an e ltaa tanaa ne ndama, amu Laitoriani Nkai oaku wong'an enche. Naa keitoreicho ninche ntarasi o ntarasi.

⁶Naajoki ꞉lmalaika, <<Kore kulo rereii pooki litining'o, naa keisiligai nedede. Naa kore Laitoriani Nkai, ilo oicho loibonok lenyena Ltau Sinyati, ninye oirriwua lmalaika lenye meitoduaa laisiaayiak lenyena nenia baa nemeata ajo measai ta nkata nemeodo.>>

⁷Kejo Yeso, <<Entining pooki, kalotuta asieku! Emayiana lolo ooning neibung rereii le naibon e ana buku.>>

⁸Nanu koon Yoana otining'o nadol kuna baa pooki. Naa kore payie aaidip atining'o nadol nenia baa pooki, narriaa tee nkejek asai ilo malaika laaitoduaa nanu ana.

⁹Kake naajoki lmalaika, <<Mias inia! Laisiaayiani ake le Nkai ara nanu, Nkai aisiaai atuwuana ake iyie o lalachera linono oaara loibonok le Nkai o lolo pooki ooning neibung rereii le ana buku. Nkai ake apeny tasayia!>>

¹⁰Munuk naibon e ana buku too ltung'ana, amu etaa kebau nkata nabaya.

¹¹Kore ilo torno, nchoo elo kue eas ntorrok, kore ilo aitarruoni, nchoo elo kue aaku laitarruoni, kore loosipat nchoo elo kue eas sipat, nincho ilo sinyati elo kue eaku sinyati.

¹²Nejo Yeso, <<Ng'ura, kalotuta asieku! Naata laata, payie alaaki ltung'ani pooki nairirikino inia nataasa.

¹³<<Kara nanu Lekue nara Lesiedi, Ng'asunoto o Nkiting'oto.>>

¹⁴Emayiana lolo ooituko nkilani enche metusupata, payie etum sipata naimie ltimito aajing ilo kerenket nenya lng'anayioi lo lcheni oata nkichui nemeiting.

¹⁵Kake ta aulo e ilo kerenket apa etung'ayieki ltung'ana ootuwuana ldein tee nkichoni enche o lairupok o lolo ooboitiere lkulie tung'ana te sesen lamara lpayiani tanaa sii ntomonok enche o loaar ltung'ana metuata o loaasai nkaitok e sapare o pooki ng'ae oacham atasapicho.

¹⁶<<Nanu Yeso oirruaaka ntae lmalaika lai meichoo nkanisani kulo rereii. Kara nanu le ntanai o le ntalipa e Daudi, nara Lakira oilu le siran.>>

¹⁷Kejo Ltau le Nkai o nkaibartani e Lkuo leker, <<Wou, Laitoriani Yeso!>> Nchoo lolo pooki ooning inia ejo, <<Wou!>> Kore pooki oaata nkure neyieu nkare namat, wootu entamat nkare naata nkichui nemeitoki eitami.

¹⁸Kaitemioki pooki ng'ae oning rereii le naibon e ana buku, nchere kore ake payie eponiki ltung'ani mbae ana buku, neponiki ninye ꞉Nkai mbaa torrok naaigero ta ana buku.

¹⁹Naa kore ake aitoki teneitai ltung'ani rereii ta ana buku e naibon e Nkai, neoru ꞉Nkai ninye sipata nanyayie lng'anayio lo lcheni le nkichui o sipata najing'ie lkerenket sinyati ana naigero ta ana buku.

²⁰Kejo Yeso, ilo oitai limunoto ee kuna baa, <<Ee kedede, kalotuta asieku.>> Metaa nejia, wou Laitoriani Yeso!

²¹Metaa munyani e Laitoriani Yeso tenebo o ntae pooki.