Read Samburu Mbolunoto 3 Bible Online

Mbolunoto 3 - Samburu bible

Mbolunoto 3

¹Ningeroki lmalaika le nkanisa natii Sardis ele rerei: <<Inji ejo ilo oibung'uta ltauja sapa le Nkai o lakir sapa, <Kayielo ntoki pooki nitaasa, nayielo ajo iatata nkarn atuwuana looichu kake ituata.

²Enyuoto naa! Entogolo inia kini natelekunye, amu kore abaki inia natelekunye naa ketaa keye. Amu eitu atum asat inchi era naaichiaakino tekue Nkai ai.

³Entaparru naa ndedei naiteng'enaki apa ntae nitang'amatie, embung'a inia nirriididu. Kake kore tanaa minyuotototo, kalotu nitii tana lapurroni nimiyielouu hoo nkata nalotu.

⁴Kake iatata ake lkuti tung'ana ta Sardis leitu eipurpur nkilani enche. Kaairiamariyie ꞉ninche nanu eichopito nankan naaibor amu keichiaakino.

⁵Kore ilo ooisul, naa keichop nankan naaibor. Namaitai aikata nkarna enye to mbuku natii nkarn ee lolo oaata nkichui ee ntarasi. Naa kaibalie tekue Papa lai o tekue lmalaikani lenyena ajo lalai ninye.

⁶Kore ilo oata nkiyok, nchoo ening inia najoki ꞉Ltau Sinyati nkanisani!> >>

⁷Ngeroki lmalaika le nkanisa natii Piladelpia ele rerei: <<Inji ejo ilo oara sinyati nedede, neata lbolet le Daudi. Kore inia natobolo, meata looidim aikeno, naa kore inia naikeno nemeata looidim atobolo.

⁸<Kayielo pooki nitaasa, naa ng'ura, katipika tekue ntae ltim obolo lemeata looidim aikeno. Kayielo ajo keikini ngolon niatata, kake imbung'a rerei lai neitu imikiki nkarna ai.

⁹Ng'ura, kore lbata loo lolo le sinagogi e Chitani, lolo oojo kera lgelunot le Nkai namara, kake kesapicho ake, kareu meotu aairrigokino nkejek inchi. Naa kepuo aayielou aajo kacham ntae.

¹⁰<< <Kore tankaraki nintabaitie inia naitanapa ntae ajoki enting'iri, kairrita sii nanu ntae te inia kata nasaani ltung'ana le nkop pooki.

¹¹Kalotuta asieku, embung'a entirrichaki inia niatata, payie meatae loworu ntae nkopiyia inchi e nkisulata.

¹²Kore ilo ooisul, naitaa lng'ope le nkaji e Nkai ai, nemeing'uaa aikata inie. Naa kaiger te sesen lenye nkarna e Nkai ai o nkarna e lkerenket le Nkai ai oji Yerusalem ng'ejuk odou eing'uaa netii Nkai te chumata. Naitoki sii aiger nkarna ai ng'ejuk.

¹³<< <Kore ilo oata nkiyok, nchoo ening inia najoki ꞉Ltau Sinyati nkanisani!> >>

¹⁴Ngeroki lmalaika le nkanisa natii Laodikea ele rerei: <<Inji ejo ilo oitabaya lekutuk le Nkai, oara loisiligai nedede, naa ninye eimua ntoki pooki naitibirua ꞉Nkai.

¹⁵<Kayielo pooki nitaasa, kayielo ajo mirobibi nimirewuawua. Oi siake duo tanaa nkae nabo itiuu!

¹⁶Kake kore tankaraki imololong, mirobibi, nimirewuawua kanatu ntae to nkutuk ai.

¹⁷Ijoijo ntae, <<Ikibore nikira parakuo, nikiata ntoki pooki, nemeitoki aitoki kiyieu.>> Kake miyielolo aajo irara dorropu, nirara toluti, nirara aisinak, nirara modook, niminchopopo.

¹⁸Naaku kaaitaarriyian ntae payie kinyiang'unyienyie soito oogol nkinyang'a ooimieki nkima metusupata payie iparakuonunu. Enyiang'u nankan naaibor ninchopchop payie menya anyit ntae tankaraki niminchopopo. Enyiang'u sii aitoki lcheni lielielie nkonyek inchi payie idolichoii.

¹⁹<< <Kore nanu, naa kaing'ode, naiteme pooki lacham. Naaku entaa loaata nyuata nirriididu.

²⁰Ng'ura, kaitache to nkutuk e nkaji, naikodikodito, naa kore pooki ng'ae oning ltoilo lai nebol nkutuk e nkaji, najing'u alotu netii, nadaa tenebo o ninye nedaa sii ninye tenebo o nanu.

²¹Naa kore ilo ooisul, naicho newuenie tenebo o nanu to lorika lai le nkitoo, ana naisula nanu nawuon tenebo o Papa lai to lorika lenye le nkitoo.

²²<< <Kore ilo oata nkiyok, nchoo ening inia najoki ꞉Ltau Sinyati nkanisani!> >>