Read Samburu Mbolunoto 4 Bible Online

Mbolunoto 4 - Samburu bible

Mbolunoto 4

¹Kore payie eich nenia baa pooki, nadol ltim obolo te chumata, naning laduo toilo otuwuana le mowuo aairorie ajoki, <<Liapu wou ene, payie aaitodol inia nemeata ajo measai too mperot naapuonu.>>

²Kore ake te inia kata etuwuana kaidetidetita to ngolon e Ltau Sinyati, naa ng'ura, nadol lorika le nkitoo owuenitae etii chumata.

³Kore ilo owuenita ilo orika le nkitoo neipilpil ana soito oogol nkinyang'a ooji jasipa o kanelian. Neigilu ilo orika le nkitoo siomo oyiana soit ogol nkinyang'a oji emeralid.

⁴Kore ilo orika le nkitoo, neigilu lkulie orikan le nkitoo 24 oowuenita lpayiani kutuaa 24. Neichopito pooki nankan naaibor neata nkopiyiani e saabu e nkitoo.

⁵Kore te ilo orika le nkitoo nepuku nkiwuang'at o ndarat o nkukurrukurrot. Neiluta aitoki tekue ilo orika le nkitoo lkilang'ilang'eta sapa, kore lolo naa ltauja sapa ooisiaita Nkai.

⁶Kore tekue ilo orika le nkitoo, netuwuana ana mpaso e nkilaas, naong ana nkare jirlil. Kore taa mbat pooki e lorika le nkitoo, netii ntokitin ong'uan naaichu naatuwuana ng'uesi naabore nkonyek mbata ekue o ne oriong.

⁷Kore inia toki naichu ekue, netuwuana lng'atuny, netuwuana ne are larami le nkiteng, kore ne uni neata nkomom natuwuana no ltung'ani, naa kore no ong'uan netuwuana lmagiro oloito ta ai.

⁸Naa kore tee nenia tokitin ong'uan naaichu naatuwuana ng'uesi, meata nemeata nkaipupo ile naabore nkonyek mbat pooki, aatii atua, netii oriong. Nemegira kuarie o parkiji merany aajo, <<Sinyati, sinyati, sinyati era, Laitoriani Nkai Napeny ngolon, ilo otii apa, netii taata, naa ninye olotu kenya.>>

⁹Naa kore ake nkata pooki naicho ꞉nenia tokitin ong'uan naaichu ilo owuon to lorika le nkitoo neichu ntarasi o ntarasi, nkisisa o nkanyit o nache,

¹⁰nenang nkop ꞉lpayiani kutuaa 24 tekue ilo obik ntarasi o ntarasi nesai ninye. Neitai nkopiyiani enche e nkitoo aaiteper tekue ilo orika le nkitoo nejo,

¹¹<<Ikinchiaakino iyie, Laitoriani Nkai ang, payie ing'amaa nkisisa o nkanyit o ngolon. Amu iyie oitibira ntokitin pooki, naa ketii taata, neitibiraki apa tankaraki iyie oyieu netii.>>