Read Samburu Mbolunoto 5 Bible Online

Mbolunoto 5 - Samburu bible

Mbolunoto 5

¹Naitoki adol etii nkaina e tetene e ilo owuon to lorika le nkitoo mbuku naigero mbat pukura are, nepiyaya negama ng'ojitin sapa ta sarmag.

²Nadol lmalaika kitok oata nkitoria eiparu to ltoilo kitok ajo, <<Ng'ae oidim aitai sarmag nebol ana buku?>>

³Naaku meatae te chumata tanaa to nkop tanaa taabori nkop lobo oidim atobolo neisom inia buku.

⁴Nang'asu aichir oleng te mion tankaraki neitu etumi hoo obo oidim atobolo tanaa aisoma.

⁵Naajoki lobo laa laaduo payiani 24, <<Mintoki aichir! Ng'ura, etimiriche Lng'atuny la lmarei le Yuda, ilo le ntalipa e Daudi. Ninye oichiaakino payie eitai sarmag too ng'ojitin pukura sapa naagama, nebol inia mbuku.>>

⁶Kore terichet lorika le nkitoo o ntokitin ong'uan naaichu naatuwuana ng'uesi, te nkiji ee lpayiani kutuaa, nadol Lkuo leker eitache etuwuana lotaraki. Neata mowuarak sapa o nkonyek sapa, naa ninche ltauja sapa ooisiai Nkai ooterewuaki nkop pooki.

⁷Nelo aya mbuku naibung'uta ꞉ilo owuon to lorika le nkitoo ta nkaina e tetene.

⁸Kore ake payie eya mbuku, nenang nkop ꞉nenia tokitin ong'uan naaichu o lpayiani 24 tekue Lkuo leker. Nemeata lemeata ntoki naranyieki naji nkinanta o ncharaan e saabu naatii ntokitin naarropil, naa ninye nkomono ee ltung'ana le Nkai.

⁹Nerany sinkolio ng'ejuk ejo, <<Ikinchiaakino iyie tiniya mbuku nintai sarmag abol, amu iyie etaraki, naa kore to lodo lino, ninyiang'aka Nkai ltung'ana ooing'ua loreren pooki o nkutukie pooki o lochon pooki o nkopi pooki.

¹⁰Nintaa ninche metaa lorere o laitainok la lasar ooisiai Nkai ang. Naa keitoreicho kenya ꞉ninche to nkop.>>

¹¹Naing'oricho naning ltoilo loo lmalaikani ootii mbat pooki e lorika le nkitoo o ntokitin ong'uan naaichu naatuwuana ng'uesi o lpayiani kutuaa. Nemu lolo malaikani nkalupuni o nkalupuni.

¹²Nejo to ltoilo kitok, <<Kore ilo Kuo leker otaraki metua, naa keichiaakino payie eng'amaa ngolon o parakuoicho o ng'eno nagut o nkidimata o nkanyit o nkitoo o nkisisa!>>

¹³Naning ntoki pooki naitayia ꞉Nkai natii chumata o nkop o taabori nkop o te nkeper e mpaso, erany ntoki pooki natii nenia ng'ojitin eisis aajo, <<Metaa ne ilo owuon to lorika le nkitoo o ne Lkuo leker nkisisa o nkanyit o nkitoo o nkidimata, ntarasi o ntarasi!>>

¹⁴Nejo ꞉nenia tokitin ong'uan naaichu, <<Aamin!>> Nenang nkop ꞉lolo payiani 24 aasai Nkai o Lkuo leker.