Read Samburu Mbolunoto 7 Bible Online

Mbolunoto 7 - Samburu bible

Mbolunoto 7

¹Kore aitoki, nadol lmalaikani oong'uan eitachoo too lmaawuen pukura oong'uan le nkop, eibooyo siwuo laa mbat pukura ong'uan payie mekut nkop tanaa mpaso tanaa lkeek.

²Naitoki adol likae malaika oing'uaa neiliepunyie ndama eata masaa e Nkai naapikie lminchire ltung'ana lenyena. Nebuaaki ꞉ilo malaika lolo oong'uan ooichooki ngolon naarie nkop o mpaso ejo,

³<<Emiar aaitarruoo nkop tanaa mpaso tanaa lkeek ana maidipa aatipik lminchire le Nkai ang nkomomi ee laisiaayiak lenyena.>>

⁴Naajokini nchere kore siana ee lolo ootipikaki nkomomi lminchire le Nkai, naa 144,000. Kore lolo tung'ana naa lmareita pukura 12 le Isirael eing'uaa.

⁵Meata lmarei lemeing'uaa 12,000, eing'uaa Yuda o Rruben o Gad o Acha o Napitali o Manase o Simion o Lawi o Isakar o Sebulon o Yosep o Benjamin.

⁹Kore aitoki payie eich nenia baa, nadol lturrur kitok, lemeata ltung'ani oidim aikena, eing'uaa nkopi pooki o loreren pooki o lochon pooki o nkutukie pooki naairori, eitachoo tekue lorika le nkitoo o tekue Lkuo leker. Neichopito pooki nkilani naaibor, neibung'uta sura e lcheni oji ltunkai taa nkaik enche.

¹⁰Nebuakita to ltoilo sapuk ejo, <<Kore njeunoto, naa ne Nkai ang nawuon to lorika le nkitoo, o Lkuo leker!>>

¹¹Neitachoo lmalaikani pooki aaigilu lorika le nkitoo o lpayiani kutuaa 24 o ntokitin ong'uan naaichu naatuwuana ng'uesi, nenang nkop tekue lorika le nkitoo nesai Nkai,

¹²nerany aajo, <<Aamin! Metaa nkisisa o nkitoo o ng'eno nagut o nache o nkanyit o ngolon o nkidimata ne Nkai ang ntarasi o ntarasi! Metaa nejia.>>

¹³Naajoki lpayian obo kitok loo lolo 24, <<Akua tung'ana kulo ooichopito nkilani naaibor? Naa aji eing'uaa?>>

¹⁴Najoki, <<Lkitok lai, iyie oyielo.>> Naajoki, <<Kore kulo tung'ana, naa lolo ooing'uaa ilo sina kitok. Neituko nkilani enche meiborra to lodo lo Lkuo leker.

¹⁵Naaku, inia payie eitachoo ninche tekue lorika le nkitoo. Neisiaai ninye kuarie o parkiji ta nkaji enye. Naa kore ilo owuon to lorika le nkitoo naa keigilu ninche arrip.

¹⁶Meigil aikata ninche aatum sumach, nemetir aikata nkure. Menya aikata ndama ninche, tanaa edal nkirewuaj enye.

¹⁷Amu kore ilo Kuo leker oitache tankalo lorika le nkitoo, ninye oaku Lchekut lenche nerikoki ninche lchorroi le nkare naichu. Naa kejut Nkai pooki kiyioi too nkonyek enche.>>