Read Samburu Mbolunoto 8 Bible Online

Mbolunoto 8 - Samburu bible

Mbolunoto 8

¹Kore payie eitai Lkuo leker sarmag e sapa, neji tau te chumata matejo nusu e saa.

²Nadol lmalaikani sapa ooitachoo tekue Nkai, neichori mowuarak sapa.

³Neitoki likae malaika oata ncharaa e saabu napejieki naing'urre narropili alotu neitache tekue lperere la lasar. Neichori ninye naing'urre narropili kitok meitai ana lasar tenebo o nkomono ee sinyat to lperere la lasar le saabu tekue lorika le nkitoo.

⁴Kore mpuro e inia aing'urre narropili natepejoki o nkomono ee sinyat, neiliep te inia charaa naibung'uta ꞉lmalaika alo netii Nkai.

⁵Neitoki lmalaika aya ncharaa napejieki naing'urre narropili, neiput nkima naing'uaa ilo perere la lasar nenang'aki nkop. Nepuku ndarat o nkukurrukurrot o nkiwuang'at o nkikirikiroto e nkop.

⁶Nerretena lolo malaikani sapa ooibung'uta mowuarak sapa.

⁷Nekut lmalaika lekue mowuo. Nebukunye nchan ee soito o nkima nachulare lodo abukokino nkop. Nepejori orati nabo to uni e nkop, nepejori nee lkeek, nepejori noo nkujit.

⁸Nekut aitoki lmalaika le oare mowuo enye. Nenang'akini atua mpaso ntoki sapuk natuwuana ldonyuo le nkima. Neaku orati nabo to uni e nkare lodo,

⁹nemuta orati nabo to uni ee ntokitin naichu e nkare, neitarruori melin orati nabo to uni.

¹⁰Nekut aitoki lmalaika le okuni mowuo enye. Nesulunye lakira sapuk te nkeper e nkai eilu ana lkilang'ilang'et, asulakino orati nabo to uni ee seriak o nkonyek ee nkariak.

¹¹Kore nkarna e ilo akira naa keji Nduaran. Neduaru orati nabo to uni ee nkariak, nemuta ltung'ana kumo oaatamata inia are tankaraki nduaran enye.

¹²Nekut aitoki lmalaika le oong'uan mowuo enye. Neochi orati nabo to uni e ndama o lapa o lakir, neroku. Nemismisu orati nabo to uni e wong'an e parkiji o ne kuarie.

¹³Naitoki adol lmagiro eloito ta ai, naning ebuakita to ltoilo kitok ajo, <<Mutai! Mutai! Mutai too ltung'ana pooki oaamanya nkop, tenening'oi ltoilo loo mowuarak teneoch lmalaikani okuni oong'or.>>