Read Samoan Old Version Bible – O LE TUSI PAIA KENESE, 1 Bible Online

KENESE, 1 - Samoan Old Version Bible – O LE TUSI PAIA bible

KENESE, 1

¹Na faia e le Atua le lagi ma le lalolagi i le amataga.

²Sa soona nunumi le lalolagi ma ua gaogao, sa ufitia foi le moana i le pouliuli; na fegaoioiai foi le Agaga o le Atua i le fogātai.

³Ua fetalai mai le Atua, Ia malamalama; ona malamalama ai lea.

⁴Ua silasila atu le Atua i le malamalama, ua lelei; ona tuu eseese ai lea e le Atua o le malamalama ma le pouliuli.

⁵Ua faaigoa e le Atua le malamalama, O le ao; a ua faaigoa e ia le pouliuli, O le po. O le afiafi ma le taeao o le uluai aso lea.

⁶Ua fetalai mai foi le Atua, Ia i le va o vai le vanimonimo, e va a‘i isi vai ma isi vai.

⁷Ua faia e le Atua le va nimonimo, ua va a‘i vai i lalo o le vanimonimo ma vai i luga o le vanimonimo; i le ua faapea lava.

⁸Ua faaigoa e le Atua le vanimonimo, O le lagi. O le afiafi ma le taeao o le aso lua lea.

⁹Ua fetalai mai foi le Atua, Ia potopoto i le mea e tasi o vai i lalo o le lagi, ia iloa foi le eleele matutu; i le ua faapea lava.

¹⁰Ua faaigoa e le Atua le eleele matutu, O le eleele; a ua faaigoa e ia le faapotopotoga o vai, O le sami; ua silasila atu i ai le Atua, ua lelei.

¹¹Ona fetalai mai lea o le Atua, Ia tupu le vao mu'a mai le eleele, ma le laau afu e tupu ma ona fua, ma le laau e ‘aina ona fua, e fua mai e taitasi ma lona uiga, o ia te ia lava o ona fatu i luga o le eleele; i le ua faapea lava.

¹²Ona tupu mai lea i le eleele le vao mu‘a ma le laau afu e fua mai, e taitasi ma lona uiga, ma le laau e ‘aina ona fua, o ia te ia lava ona fatu, e taitasi ma lona uiga; ua silasila atu i ai le Atua, ua lelei.

¹³O le afiafi ma le taeao o le aso tolu lea.

¹⁴Ua fetalai mai foi le Atua, Ia iai i le vanimonimo o le lagi o mea e malamalama a‘i, e iloga ai le ao ma le po; ia fai foi ma faailoga, ma tau, ma aso, ma tausaga.

¹⁵Ma ia fai ma mea e malamalama a‘i i le vanimonimo o le lagi, e faamalamalama a‘i le lalolagi; i le ua faapea lava.

¹⁶Ona faia lea e le Atua o malamalama tetele e lua; o le malamalama tele e pule i le ao, a o le malamalama itiiti e pule i le po; ua na faia foi fetu.

¹⁷Ua tuu ai e le Atua i le vanimonimo o le lagi e faamalamalama a‘i le lalolagi;

¹⁸e pule foi i le ao ma le po, ma ia iloga ai le malamalama ma le pouliuli; ua silasila atu i ai le Atua, ua lelei.

¹⁹O le afiafi ma le taeao o le aso fa lea.

²⁰Ua fetalai mai foi le Atua, Ia tele ona tutupu mai i le sami o meaola e fetolofi, ia lele foi le manulele i luga o le laueleele i le vanimonimo o le lagi.

²¹Ua faia foi e le Atua o tanimo tetele ma meaola uma e fetolofi, ua tele ona tutupu mai i le sami, e taitasi ma lona uiga, ma manu felelei e taitasi ma lona uiga; ua silasila atu i ai le Atua, ua lelei.

²²Ona faamanuia atu i ai lea e le Atua, ua faapea atu, Ia uluola, ma ia tupu tele, ma ia tumu ai le sami; ia tupu tele foi manu felelei i le laueleele.

²³O le afiafi ma le taeao o le aso lima lea.

²⁴Ua fetalai mai foi le Atua, Ia tutupu meaola mai le laueleele, e taitasi ma lona uiga, o manu vaefa fanua, ma mea fetolofi, ma manu vaefa o le vao, e taitasi ma lona uiga; i le ua faapea lava.

²⁵Ua faia foi e le Atua o manu vaefa o le vao, e taitasi ma lona uiga, ma manu vaefa fanua, e taitasi ma lona uiga, atoa ma mea fetolofi uma i le eleele, e taitasi ma lona uiga; ua silasila atu i ai le Atua, ua lelei.

²⁶Ona fetalai ane lea o le Atua, Ina tatou faia ia o le tagata i lo tatou faatusa, ia foliga ia i tatou; ia pule foi i latou i i‘a i le sami, ma manu felelei, ma manu vaefa, ma le laueleele uma, atoa ma mea fetolofi uma e fetolofi i le eleele.

²⁷Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine.

²⁸Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i i‘a i le sami, ma manu felelei, atoa ma mea ola uma e fetolofi i le eleele.

²⁹Ua fetalai atu foi le Atua, Faauta, ua ou foai atu ia te oulua o laau afu uma e tutupu ma o latou fua o i le fogāeleele uma lava, atoa ma laau uma ua iai le fua o le laau e tupu ma ona fatu; e ia te oulua ia e fai ma mea e ‘ai.

³⁰O manu vaefa uma foi o le vao, ma manu felelei uma, atoa ma mea fetolofi uma i le eleele, o iai le ola, ua ou foai atu i ai o laau afu uma lauolaola e fai ma mea e ‘ai; i le ua faapea lava.

³¹Ua silasila atu le Atua i mea uma ua na faia, faauta foi, ua matuā lelei lava. O le afiafi ma le taeao o le aso ono lea.