Read Samoan Old Version Bible – O LE TUSI PAIA KENESE, 12 Bible Online

KENESE, 12 - Samoan Old Version Bible – O LE TUSI PAIA bible

KENESE, 12

¹Ua fetalai mai Ieova ia Aperamo, Ia tuua e oe o lou nuu, ma tagata o lou nuu, ma le aiga o lou tamā, a e alu atu i se nuu ou te faasino atu ai ia te oe.

²Ou te faia oe ma nuu tele, cu te faamanuia foi ia te oe, ou te matuā faamamaluina lou igoa; e manuia foi oe.

³Ou te faamanuia atu ia te i latou o e faamanuia ia te oe, ou te faamalaia atu foi ia te i latou o e fetuu ia te oe; e manuia foi ia te oe o aiga uma o le lalolagi.

⁴Ona alu ai lea o Aperamo e faapei ona fetalai mai o Ieova ia te ia; na la o foi ma Lota; na alu atu Aperamo nai Karana i lona tausaga e fitugafulu ma le lima.

⁵Ua ave foi e Aperamo lana avā o Sarai, ma Lota le atalii o lona uso, ma o latou oloa uma lava na latou maua, ma tagata na latou maua i Karana; ona latou o atu lea o le a o i le nuu o Kanana; ua oo foi i latou i le nuu o Kanana.

⁶Ua ui atu foi Aperamo i lea nuu ua oo i le mea e i ai Sekema, i le aluna o Morē. Sa i ai sa Kananā i lea nuu i ia ona po.

⁷Ua faaali mai Ieova ia Aperamo, ma ua faapea mai, Ou te foaiina atu lenei lava nuu mo lau fanau; ona faia lea e ia i lea mea o le fata faitaulaga ia Ieova, sa faaali mai o ia ia te ia.

⁸Ua tuua foi e ia lea mea, a e alu atu i le mauga i le itu i sasae o Peteli, ma faatu ai lona fale ie, e i lona itu i sisifo o Peteli, a e i lona itu i sasae o Ai; ua ia faia foi le fata faitaulaga ia Ieova i lea mea, ma ua valaau atu i le suafa o Ieova.

⁹Ua aga atu Aperamo, ma alu atu pea i le itu i toga.

¹⁰Sa i ai foi le oge i lea nuu; ona alu ifo lea o Aperamo i Aikupito e āumau ai; auā sa vale le oge i le nuu.

¹¹Ua latalata ina oo i Aikupito, ona fai atu lea o ia i lana avā o Sarai, Faauta mai ea, ua ou iloa o oe o le fafine lalelei;

¹²a vaai ia te oe tagata Aikupito, ona latou faapea ane lea. O lana avā lena; ona latou fasioti lea ia te au, a e faaolaina oe.

¹³Se‘i e fai atu o lo‘u tuafafine oe, ina ia ou saogalemu ai ona o oe; e ola ai foi a‘u ona o oe.

¹⁴Ua oo foi Aperamo i Aikupito, ona vaaia mai lea e tagata Aikupito o le fafine ua lalelei tasi lava ia.

¹⁵Ua ilo atu foi o ia e alii sa ia Farao, ma ua vivii ia te ia ia Farao; ona avane ai lea o le fafine i le fale o Farao.

¹⁶Ona agalelei atu lea o ia ia Aperamo ona o ia; sa ia te ia foi o mamoe, ma povi, ma asini poa ma auauna tane, ma auauna fafine, ma asini fafine, ma kamela.

¹⁷A ua faatigaina e Ieova o Farao ma lona aiga i mala tetele ona o Sarai le avā a Aperamo.

¹⁸Ona valaau ai lea o Farao ia Aperamo, ua faapea atu, Se a lenei mea ua e faia ia te au? Pe se a le mea na e le ta‘u mai ai ia te au o lau avā ia?

¹⁹O le a le mea na e faapea mai ai, O lo‘u tuafafine ia? Na fai a‘u mao avea o ia e fai ma‘u avā; o lenei foi, faauta, o lau avā lea, ina ave ia, ma lua o.

²⁰Ona poloai atu lea o Farao i ona tagata ia te ia; ona latou tuuina atu ai lea o ia la te o ma lana avā, atoa ma ana mea uma.