Read Samoan Old Version Bible – O LE TUSI PAIA KENESE, 13 Bible Online

KENESE, 13 - Samoan Old Version Bible – O LE TUSI PAIA bible

KENESE, 13

¹Ua alu ae Aperamo nai Aikupito o ia, ma lana avā, ma ana mea uma, o Lota foi faatasi ma ia, e o i le itu i toga.

²Ua mauoa tele lava Aperamo i manu, ma ario, ma auro.

³Ua alu foi o ia i lana malaga nai le itu i toga ua oo i Peteli, i le mea lava sa muai i ai lona fale ie, i le va o Peteli ma Ai;

⁴o le mea na i ai le fata faitaulaga sa na muai faia i lea mea; ua valaau atu ai foi Aperamo i le suafa o Ieova.

⁵O Lota foi, sa la o ma Aperamo, sa ia te ia o mamoe, ma povi, ma fale ie.

⁶Ua le mafai lava ona la mau faatasi i le nuu, auā sa tele lava a laua mea, ua le mafai ai ona la mau faatasi.

⁷Ua femisai foi leoleo o manu a Aperamo ma leoleo o manu a Lota; o ona po foi ia sa mau ai sa Kananā ma sa Perisē i le nuu.

⁸Ona fai atu lea o Aperamo ia Lota, Aua lava ne‘i femisa‘i i taua, po o a taua leoleo manu: auā o le uso i taua.

⁹E le o i ou luma ea le laueleele uma? Se‘i e te‘a ese ma a‘u. Afai e te alu i le itu tauagavale, ona ou alu ai lea i le itu taumatau; a ē alu i le itu taumatau, ona ou alu ai lea i le itu tauagavale.

¹⁰Ua vaavaai Lota, ona ilo atu ai lea e ia i le fanua laugatasi uma ua i ai Ioritana, ua lafulemu uma lava, e oo i Soara, e pei o le faatoaga a Ieova, e pei o le laueleele o Aikupito, a o lei faaumatia e Ieova o Sotoma ma Komoro.

¹¹Ona filifilia lea e Lota mona o le fanua laugatasi uma ua i ai Ioritana; ua aga‘i atu foi Lota i sasae; ona la te‘a eseese ai lea o le tasi ma le tasi.

¹²Ua mau Aperamo i le nuu o Kanana, a o Lota ua mau ia i aai o le fanua laugatasi, ma ua faatuina ai lona fale ie, ua oo atu i Sotoma.

¹³A o tagata o Sotoma ua leaga i latou, ma ua matuā agasala lava i luma o Ieova.

¹⁴Ua fetalai atu foi Ieova ia Aperamo, ina ua te‘a eseese o Lota ma ia, Se‘i e vaavaai ia, ma ilo atu i le mea e te i ai na, i le itu i matu, ma le itu i toga, ma sasae, ma sisifo;

¹⁵auā o le laueleele uma ua e ilo atu nei, ou te foaiina atu mo oe ma lau fanau e faavavau.

¹⁶Ou te faia foi lau fanau e pei o le efuefu o le eleele; afai e mafaia e se tagata ona faitauina o le efuefu o le eleele, ona mafai lea ona faitaulia o lau lava fanau.

¹⁷Ina tulai ia, ina fealualuai i le nuu i lona umi ma lona lautele; auā ou te foaiinaatua mo oe.

¹⁸Ona ave lea e Aperamo lona fale ie, ua alu atu ua mau i aluna o Mamere, o i Heperona lea, ua ia faia foi i lea mea le fata faitaulaga ia Ieova.