Read Samoan Old Version Bible – O LE TUSI PAIA KENESE, 16 Bible Online

KENESE, 16 - Samoan Old Version Bible – O LE TUSI PAIA bible

KENESE, 16

¹A o Sarai le avā a Aperamo, ua le fanau ia ia te ia; sa ia te ia foi le auauna fafine, o le Aikupito, o Akara lona igoa.

²Na fai atu foi Sarai ia Aperamo, Faauta mai ea, ua finagalo Ieova ia ou le fanau; se‘i e alu ane i la‘u auauna fafine; atonu ou te maua ai ni tama ia te ia. Ua usiusitai foi Aperamo i le upu a Sarai.

³O Sarai foi le avā a Aperamo, na ia ave ia Akara, o le Aikupito, o lana auauna fafine, ma tuuina atu ia Aperamo lana tane, e fai mana avā, ina ua mavae o tausaga e sefulu sa nofo ai Aperamo i le nuu o Kanana.

⁴Ona alu ane lea o ia ia Akara, ona to ai lea o ia; ua iloa e ia ua to o ia, ona faaleaogaina lea e ia o lona matai fafine.

⁵Ona fai atu lea o Sarai ia Aperamo, Ia i luga ia te oe lo‘u agaleagaina; o a‘u nei foi, na ou tuuina atu la‘u auauna fafine ia te oe; ua iloa foi e ia ua to o ia, ona faaleaogaina ai lea o a‘u e ia; ia faamasino mai Ieova ia te i taua.

⁶Ona tali mai lea o Aperamo ia Sarai, Faauta, o ia te oe le pule i lau auauna fafine, faitalia lava oe se mea e te faia ia te ia. Ua agaleaga foi Sarai ia te ia, ona sola ese ai lea o ia i ona luma.

⁷Ua maua foi o ia e le agelu a Ieova i le vaipuna i le vao, o le vaipuna i le ala i Sara.

⁸Ona faapea atu lea o ia, Akara e, le anauna a Sarai, maifea oe? O fea ea a e alu i ai? Ona tali mai lea o ia, Ua ou sola mai ia Sarai o lo‘u matai.

⁹Ona faapea atu lea o le agelu a Ieova ia te ia, Ia e foi atu i lou matai ma e faamaulalo atu ia te ia.

¹⁰Ua fetalai atu foi le agelu a Ieova ia te ia, Ou te matuā faatoateleina lava lau fanau, e le mafai lava ona faitau ina ua toatele.

¹¹Ua fetalai atu foi le agelu a Ieova ia te ia, Faauta, ua e to, o le a e fanau mai se tama tane, e te faaigoa foi ia te ia o Isamaeli; auā ua faafofogaina e Ieova lou tiga.

¹²E fai o ia ma tagata e tusa ma le asini o le vao; e fai tagata uma mona fili, e fai foi o ia ma fili o tagata uma; e mau foi o ia i luma o ona uso uma.

¹³Ona faaigoaina lea e ia le suafa o Ieova o le na fetalai mai ia te ia, O oe le Atua le ua faaali mai ia te au; auā ua faapea ana, Ua ou vaai atu ea iinei i tua o loo silasila mai ia te au?

¹⁴O le mea lea ua faaigoaina ai le vaieli, o Pere-laaroi, faauta, o loo i le va o Katesa ma Pareta.

¹⁵Ua fanau mai foi Akara le atalii ia Aperamo; ua faaigoaina foi e Aperamo lona atalii na fanau mai ia Akara, o Isamaeli.

¹⁶O le valu sefulu ma le ono o tausaga o Aperamo na fanau mai ai Akara o Isamaeli le atalii o Aperamo.