Read Samoan Old Version Bible – O LE TUSI PAIA KENESE, 17 Bible Online

KENESE, 17 - Samoan Old Version Bible – O LE TUSI PAIA bible

KENESE, 17

¹O le iva sefulu ma le iva o tausaga o Aperamo, na faaali mai ai Ieova ia Aperamo, ua faapea mai foi ia te ia, O a‘u o le Atua e o‘u le malosi uma lava; ia e savali i o‘u luma, ma ia sao lau amio.

²Ta te osia le feagaiga ma oe, ou te matuā faatoateleina lava au fanau.

³Ona faapaū fao lea o Aperamo; ona fetalai mai lea o le Atua ia te ia, ua faapea mai,

⁴O a‘u nei, ou te fai atu, faauta, o ia te i taua le feagaiga, e fai foi oe ma tupuga o nuu e tele.

⁵E le toe valaauina lou igoa o Aperamo, a o le a igoa oe o Aperaamo, auā ua ou faia oe ma tupuga o nuu e tele.

⁶Ou te matuā faauluolaina oe, ou te faia oe ma tupuga o nuu; e tupuga mai foi ia te oe o tupu.

⁷Ou te faatumauina foi o la ta feagaiga ma oe, ma lau fanau, i a latou tupulaga, pe a mavae atu oe, e fai ma feagaiga e faavavau; ia fai a‘u ma Atua ia te oe ma au fanau pe a mavae atu oe.

⁸Ou te foai foi ia te oe, ma au fanau, pe a mavae atu oe, o le nuu o loo e āumau ai, o le nuu uma lava lea o Kanana, e fai mo latou e faavavau; e fai foi a‘u mo latou Atua.

⁹Ua fetalai mai foi le Atua ia Aperaamo, A o oe, ia e tausi i la ta feagaiga, o oe, ma lau fanau, i a latou tupulaga, pe a mavae atu oe.

¹⁰O la tatou feagaiga lenei ma onutou, atoa ma lau fanau, pe a mavae atu oe, tou te tausia; e peritomeina tane uma o ia te outou.

¹¹Tou te peritomeina foi pa‘u o outou tino, e fai ai foi ma faailoga o la tatou feagaiga ma outou.

¹²O le ua valu ona po o ia te outou ia peritomeina ia, o tane uma i a outou auga tupulaga; o le ua fanau i le aiga, ma le ua faatauina mai i tupe i tagata ese uma lava, e le o sau fanau ia.

¹³Ia peritomeina lava o le ua fanau i lou aiga, ma le ua faatauina i au tupe; e i o outou tino la tatou feagaiga o le feagaiga e faavavau.

¹⁴A o le tane foi ua le peritomeina, o le ua le peritomeina i le pa‘u o lona tino e vavaeeseina lea tagata i lona nuu; ua tuumavaega ia i le feagaiga.

¹⁵Ua faapea mai foi le Atua ia Aperaamo, O Sarai lau avā, aua e te toe valaauia lona igoa o Sarai, a o Sara o lona igoa lea.

¹⁶Ou te faamanuia foi ia te ia, ma ou foaiina atu foi se atalii mo oe mai ia te ia; ou te faamanuia lava ia te ia, e fai foi o ia ma tupuga o nuu; e tupuga mai foi ia te ia o tupu o nuu.

¹⁷Ona faapaū fao lea o Aperaamo, ua ‘ata‘ata, ma faapea ifo i lona loto, E fanau mai ea se atalii i le tagata ua selau ona tausaga? O Sara foi e fanau ea ia ua iva sefulu ona tausaga?

¹⁸Ua faapea atu foi Aperaamo i le Atua, E, ou te manao ia ola Isamaeli i ou luma!

¹⁹Ua fetalai mai le Atua, E moni lava, e fanau mai sou atalii ia Sara lau avā, e te faaigoa foi ia te ia o Isaako; ou te faatumauina foi la ma feagaiga ma ia, atoa ma ana fanau, pe a mavae atu o ia, o le feagaiga e faavavau.

²⁰I le ma Isamaeli foi, ua ou faalogo ai ia te oe; faauta, ua ou faamanuia ia te ia, ou te faauluola ia te ia, ou te matuā faatoateleina lava; e fanaua foi e ia o alii e toasefulu ma le toalua; ou te fai foi o ia ma tupuga o le nuu tele.

²¹A e peitai o la‘u feagaiga ou te faatumauina lea ia Isaako, o le a fanau mai e Sara ia te oe i le faapenei lava i le tausaga atali.

²²Ua faaiu foi e ia o la la tautalaga ma ia, ona afio ae lea o le Atua nai ia Aperaamo.

²³Ona tago lea e Aperaamo i lona atalii o Isamaeli, ma i latou uma na fananau i lona aiga, atoa ma i latou uma na faatauina i ana tupe, o tane uma lava i le aiga o Aperaamo, ma ua peritomeina e ia o pa‘u o latou tino i lea lava aso, e pei ona fetalai mai ai le Atua ia te ia.

²⁴O le iva sefulu ma le iva o tausaga o Aperaamo na peritomeina ai o ia i le pa‘u o lona tino.

²⁵A ua sefulu ma le tolu tausaga o lona atalii o Isamaeli ina ua peritomeina ai o ia i le pa‘u o lona tino.

²⁶O lea lava aso e tasi na peritomeina ai Aperaamo ma lona atalii o Isamaeli;

²⁷o tane uma foi i lona aiga, e na fananau mai i le aiga, atoa ma e na faatauina i tupe i tagata ese, na peritomeina i latou faatasi ma ia.