Read Samoan Old Version Bible – O LE TUSI PAIA KENESE, 18 Bible Online

KENESE, 18 - Samoan Old Version Bible – O LE TUSI PAIA bible

KENESE, 18

¹Ua faaali mai Ieova ia te ia i aluna o Mamere, a o nofo o ia i le faitotoa o lona fale ie i le aoauli;

²ua tepa ae foi o ia ma ilo atu, faauta foi, o loo tutū mai ia te ia tagata e toatolu; ua ia ilo atu, ona momo‘e atu ai lea nai le faitotoa o lona fale ie e faafetaiai ia te i latou, ona ifo toele lea o ia.

³Ua faapea atu foi o ia, Le alii e, afai ua alofaina mai nei a‘u e oe, aua ne‘i e maliu loa ia te au lau auauna;

⁴se‘i aumaia sina vai e mulumulu ai o outou vae, ma outou malolo i lalo o le laau;

⁵ou te au mai foi sina mea e ‘ai ia faamalosi ai o outou loto, ona outou o ai lea; auā o le mea lea ua outou o mai ai i la outou auauna. Ona latou tali mai lea, E te faia lava pei ona e fai mai na.

⁶Ona vave ane lea o Aperaamo i le fale ie ia Sara, ma faapea atu, Ia vave ona ave esea o falaoa, o falaoa lelei, se tolu, ia palu ma fai a‘i ni potoi areto.

⁷Ona momo‘e lea o Aperaamo i lona lafu povi, ua au mai ai le tamai povi, e mu‘amu‘a ma le lelei, ua avatu i le taulealea; ona ia faavave lea ona gaosia.

⁸Ua na ave foi o suāsusu to‘a, ma suāsusu, ma le tamai povi sa gaosia e ia, ua laulauina atu ai i o latou luma; a o ia ua tu ane ia te i latou i lalo o le laau, ona latou aai lea. Ua latou fai atu ia te ia, O fea o i ai lau avā o Sara?

⁹Ona tali mai lea o ia, Faauta, o loo i falē lava.

¹⁰Ona faapea atu lea o ia, Ou te toe foi mai lava ia te oe i lela tausaga; faauta foi, e fanau mai lau avā o Sara o le tama tane. A o faalogologo ane foi o Sara i le faitotoa o le fale ie, sa i ona tua.

¹¹O Aperaamo foi ma Sara ua matutua i laua, ua tele o la tausaga; ua mavae foi ia Sara le tu o fafine.

¹²Ona ‘ata‘ata lemu lea o Sara, ua faapea, Ua ou loomatua, e ia te au ea le fiafia, o la‘u alii foi ua toeaina ia?

¹³Ona fetalai atu lea o Ieova ia Aperaamo, Se a le mea ua ‘ata‘ata ai Sara, o loo faapea, E moni ea, a ou toe fanau o a‘u le loomatua?

¹⁴E iai ea se mea e faigata ia Ieova? O ona po ua tuupoina ou te toe foi mai ai ia te oe, i lela tausaga, e maua mai ai e Sara le tama tane.

¹⁵Ona faafiti mai lea o Sara, ua faapea mai, Ou te lei ‘ata‘ata lava, auā ua fefe ia. Ona tali atu lea o ia, E leai, na e ‘ata‘ata lava.

¹⁶Ona tulai lea o ia tagata nai lea mea, ma faasaga atu i Sotoma; ua latou o foi ma Aperaamo na te molimolia i latou.

¹⁷Ona fetalai ane lea o Ieova, Ou te natia ea ia Aperaamo le mea a ou faia?

¹⁸Auā foi o Aperaamo o le a fai o ia ma tupuga o le nuu tele ma le malosi; e manuia foi ia te ia o nuu uma o le lalolagi.

¹⁹Auā ua ou iloa o ia na te poloai atu i ana fanau ma lona aiga pe a mavae atu o ia; latou te tausia le ala o Ieova, i lo latou fai amiotonu ma faamasinoga, ina ia faataunuuina e Ieova ia Aperaamo le mea na ia fetalai atu ai ia te ia.

²⁰Ona faapea lea a Ieova, O le alaga mai Sotoma ma Komoro ua tele, ma ua matuā tele lava a latou agasala;

²¹o le mea lea ou te alu ifo ai, ia iloa po ua faia lava e i latou e poi o le alaga ua oo mai ai ia te au; afai foi ua leai, ou te iloa lava.

²²Ona tuua lea o lea mea e nei tagata, ua o atu i Sotoma; a o Aperaamo ua tu pea o ia i luma o Ieova.

²³Ona faalatalata atu lea o Aperaamo, ua faapea atu, E te faaumatia ea e ua amiotonu faatasi ma e amio leaga?

²⁴Pe afai o i le aai tagata e toalimagafulu o e amiotouu, e te faaumatia ea a e le faasaoina le nuu ona o le toalimagafulu o e amiotonu o i ai?

²⁵Ia mamao lava ia te oe ona e faia faapea e fasioti i e amiotonu faatasi ma e amio leaga; ma ona faagatusa e amiotonu ma e amio leaga, ia mamao lava lea ia te oe. O le na te faamasinoina le lalolagi uma, e le faia ea e ia le faamasinoga tonu?

²⁶Ona faapea mai lea o Ieova, Afai ou te maua i Sotoma tagata amiotonu e toalimagafulu i le aai, ona ou faasao ai lea o le nuu uma ona o i latou.

²⁷Ona tali atu lea o Aperaamo, ua faapea atu, Faauta mai, o a‘u nei o le efuefu ma le lefulefu, ua ou faamalosi e tautala atu i le Alii;

²⁸afai ua toe toalima e faaatoa ai le toalimagafulu o tagata amiotonu, e te faaumatia ea le aai uma ona o le toalima? Ona tali mai lea a ia, Afai ou te maua ai se toafagafulu ma le toalima ou te le faaumatia lava.

²⁹Ona toe fai atu lea o ia ia te ia, ua faapea atu, Pe afai ua maua ai le toafagafulu e a ea? Ona fetalai mai lea o ia, Afai ou te maua ai le toafagafulu ou te le faia lava ona o i latou.

³⁰Ona fai atu lea a ia, Aua ne‘i toasa mai le Alii, a se‘i ou toe fai atu, Afai ua maua ai se toatolugafulu e a ea? Ona fetalai mai lea o ia, Afai ou te maua ai se toatolugafulu ou te le faia lava.

³¹Ona fai atu lea o ia, Faauta mai, ua ou faamalosi e tautala atu i le Alii, Afai e maua ai se toaluafulu e a ea? Ona fetalai mai lea o ia, Pe a o i ai le toaluafulu ou te le faaumatia lava ona o i latou.

³²Ona fai atu lea o ia Aua ne‘i toasa mai le Alii, a se‘i ou fai atu le toe upu lea, Afai e maua ai se toasefulu e a ea? Ona tali mai lea a ia, Pe a o i ai le toasefulu ou te le faaumatia lava ona o i latou.

³³Ona afio lea o Ieova ina ua faaiu ana fetalaiga ia Aperaamo; ona toe foi lea e Aperaamo i le mea e mau ai.