Read Samoan Old Version Bible – O LE TUSI PAIA KENESE, 19 Bible Online

KENESE, 19 - Samoan Old Version Bible – O LE TUSI PAIA bible

KENESE, 19

¹Ua oo atu agelu e toalua i Sotoma i le afiafi, a o nofo Lota i le faitotoa o Sotoma; ua ilo atu e Lota, ona tulai lea e faafetaiai ia te i laua; ona ifo toele lea o ia;

²ua fai atu foi o ia, Alii e, faauta mai, se‘i oulua afe mai i le fale o la oulua auauna, ma tofa ai, se‘i mulumulu foi o oulua vae; i le ala usu ai la oulua malaga. Ona tali mai lea o i laua, Soia, auā ma te momoe pea i fafo.

³Ona pulunaunau atu lava lea o ia ia te i laua; ona la o ane lea ma ia, ma ulufale atu i lona fale; ona saunia lea e ia o le mea e ‘ai ma i laua, ma ua tunu areto e le faafefetoina, ona la aai ai lea.

⁴A o lei taooto i laua ua siomia le fale e tagata o lea aai, o tagata lava o Sotoma, o taulelea atoa ma toeaina, o le nuu uma lava mai itu uma;

⁵ua latou valaau ia Lota, ua faapea atu, O ifea ea tagata na o mai ia te oe i le po nei? Tuu mai ia i laua ia te i matou nei, ina ia matou iloa i laua.

⁶Ona ulufafo lea o Lota i le faitotoa ia te i latou, ua pupuni le faitotoa i ona tua,

⁷ua faapea atu, O‘u uso e, aua lava tou te agaleaga.

⁸Faauta mai, o ia te au o‘u afafine e toalua, e lei iloa tane e i laua; se‘i ou tuuina mai i laua ia te outou, e faitalia lava outou ia te i laua; a o na tagata, aua tou te faia se mea ia te i laua, auā o le mea lava lea na o mai ai lalo ifo o lo‘u fale.

⁹Ona faapea mai lea o i latou, Alu ese ia; ua faapea ane foi i latou, Ua sau lena tagata e taase, a o le a fai o ia ma faamasino; o lenei, o le a sili le leaga matou te faia ia te oe a e itiiti ia te i laua. Ua latou matuā fetuleni mai lava ia Lota, ma ua faalatalata mai e sofai i le faitotoa.

¹⁰A ua fetagofi atu ia tagata ia Lota, ua au mai i le fale o i ai i laua, ona la pupuni lea o le faitotoa.

¹¹A o tagata sa i le faitotoa o le fale, ua la faatauaso ia te i latou o tama atoa ma e matutua; ona lailoa ai lea o i latou i saili le faitotoa.

¹²Ona fai atu lea o ia tagata ia Lota, O ai ea nisi o lou aiga o iinei? O se tane a sou afafine, po o sou atalii, po o sou afafine, atoa ma i latou uma e ua ia te oe o i le aai, ina ave ese ia i le mea nei;

¹³auā o le a ma faaumatia lenei mea, auā ua tele lo latou alaga i luma o Ieova; ua aauina mai foi i maua e Ieova e faaumatia ai.

¹⁴Ona alu atu lea o Lota, ma tautala atu i tane a ona afafine, o e ua fai avā i ona afafine, ua faapea atu, Ina tutū ia, ina outou o ese i lenei mea, auā o le a faaumatia e Ieova lenei aai. A o ia ua pei se tagata faianaga i le manatu o tane a ona afafine.

¹⁵Ua malama e le taeao ona nanati lea o agelu ia Lota, o loo faapea atu, Ina tulai ia, ave lau avā ma ou afafine e toalua, o loo iinei, ina ne‘i malaia oe i le sala a le aai.

¹⁶Ua faatuatuai o ia, ona fetagofi lea o ia tagata i lona lima, ma le lima o lana avā, ma lima o ona afafine e toalua, ina ua alofaina o ia e Ieova; ua la ta‘ita‘i atu foi ia te ia, ma tuu atu ia te ia i tua o le aai.

¹⁷Ua ta‘ita‘iina i latou e i laua i tua, ona faapea atu lea o ia, Ina sola ia e te ola ai, aua e te tepa i tua, aua foi e te tu i se mea o le fanua laugatasi; a ia sola lava i le mauga ina ne‘i malaia oe.

¹⁸Ona tali mai lea o Lota ia te i laua, Le Alii e, aua lava;

¹⁹faauta mai, ua alofagia lau auauna e oe, ua e faateleina mai foi lou alofa ua e alofa mai ai ia te au, i lou faaola mai ia te au; ou te le lavā sola i le mauga, ne‘i maua a‘u i le leaga, i le ou oti ai.

²⁰Faauta mai ea, o le aai le la e lata mai, ou te sola i ai, o si aai itiiti foi lea; se‘i ou sola ane i ai, e le o si aai itiiti ea? Ona ola ai lea o a‘u.

²¹Ona faapea atu lea o ia, Faauta, ua ou talia foi lou manao i lena mea, ou te le faaumatia lena aai ua e fai mai ai.

²²Ina e sola atu ia i ai, ia vave; auā ou te le mafaia ona fai o se mea seia e oo atu i ai. E i ai ona faaigoa ai o lea aai o Soara.

²³Ua alu ae le la i luga o le lalolagi ina ua oo Lota i Soara.

²⁴Ona faatotō faaua ifo lea e Ieova i Sotoma ma Komoro o le teio ma le afi mai ia Ieova mai le lagi;

²⁵na ia faaumatia o ia lava aai, ma le fanua laugatasi uma, ma i latou uma sa mau i ia aai, atoa ma mea na tutupu i le eleele.

²⁶Ua tepa i tua lana avā sa mulimuli atu ia te ia, ona liua lea o ia ma tupua masima.

²⁷Ua ala usu Aperaamo i le taeao i le mea sa tu ai o ia i luma o Ieova;

²⁸ua ia vaai atu i Sotoma ma Komoro, ma le fanua laugatasi uma, ua ilo atu faauta foi, ua alu ae le asu o le nuu e pei o le asu o se umu.

²⁹Ua faaumatia e le Atua o aai o le fanua laugatasi, ona manatua lea e le Atua o Aperaamo, ma ona auina o Lota ai le malaia, ina o faaumatia e ia o aai sa mau ai Lota.

³⁰Ua alu ae foi Lota nai Soara, ona mau ai lea o ia i le mauga, faatasi ma ona afafine e toalua; auā ua fefe o ia i mau i Soara; ua mau foi i le ana, o ia ma ona afafine e toalua.

³¹Ona fai atu lea o lē matua i le itiiti, Ua toeaina lo taua tamā, e leai foi se tane i le nuu e sau ia te i taua e pei o le masani a le lalolagi uma.

³²Sau ia, se‘i ta faainua lo ta tama i le uaina, ona tatou taooto ai lea ma ia, ina ia tutupu ai ia te i taua ni fanau ai lo ta tamā.

³³Ua faainua e i laua lo la tamā i le uaina i lea lava po; ona alu ane ai lea o lē matua, ma la taooto ma lona tamā; a ua le iloa e ia ona taoto o ia, ma ona toe tulai.

³⁴Ua oo i le taeao, ona fai atu ai lea o lē matua i le itiiti, Faauta mai, o anapo na ma taooto ai ma lo ta tamā; se‘i ta toe faainu ia te ia i le uaina i le po nanei, i le e alu ane ai foi lua te taooto ma ia, ina ia tutupu ai ia te i taua ni fanau ai lo ta tamā.

³⁵Ua la toe faainua foi lo la tamā i le uaina i lea po, ona tulai ane lea o le itiiti, ma la taooto ma ia; ua le iloa foi e ia ona taoto o ia, ma ona toe tulai.

³⁶Ona totō ai lea o afafine e toalua o Lota, i lo la tamā.

³⁷Ua fanau e lē matua o le tama tane, ma ua faaigoa ia te ia, o Moapi; o ia o le tupuga o sa Moapī; ua oo mai i nei ona po.

³⁸O le itiiti foi, na fanau o ia o le tama tane, ma ua faaigoa ia te ia o Pename; o ia o le tupuga o le fanauga a Amoni ua oo mai i nei ona po.