Read Samoan Old Version Bible – O LE TUSI PAIA KENESE, 2 Bible Online

KENESE, 2 - Samoan Old Version Bible – O LE TUSI PAIA bible

KENESE, 2

¹Ua uma lava ona faia o le lagi ma le lalolagi, atoa foi ma mea uma o iai.

²Ua faauma e le Atua i le aso fitu lana galuega na faia e ia; ona malolo ai lea o ia i le aso fitu i lana galuega uma na faia e ia.

³Ona faamanuia atu lea e le Atua i le aso fitu, ma na faasaina ai; auā na malolo ai o ia i lana galuega uma lava na faia e le Atua ma na saunia.

⁴O le tala lenei i le lagi ma le lalolagi ina o faia ia, i le aso na fai ai e Ieova le Atua le lalolagi ma le lagi.

⁵A o leai lava ni vaoiti uma o le fanua i le laueleele, ua le tutupu foi laau afu uma o le fanua; auā e lei faatotōina le ua e Ieova le Atua i le eleele, ua leai foi se tagata e galue i le laueleele.

⁶A ua alu ae le ausa i le eleele, ua sūsū ai le fogāeleele uma.

⁷Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola, ona avea ai lea o le tagata ma tagata ola.

⁸Ua faia foi e Ieova le Atua o le faatoaga i Etena i sasae; ona ia tuuina lea i lea mea o le tagata na na faia.

⁹Ua faatutupuina foi e Ieova le Atua i le fanua o laau uma e matagofie i le vaai, e lelei foi pe a ‘aina; ma le laau o le ola i totonu o le faatoaga, ma le laau e iloa ai le lelei ma le leaga.

¹⁰Na tafe atu foi le vaitafe mai Etena e faasūsū ai le faatoaga, ona ala eseese ai lea, ua avea ma vaitafe e fa.

¹¹O le igoa o le tasi o Pisona; e faataamilomilo lea i le nuu uma o Havila, e i ai auro;

¹²e lelei foi auro o lea nuu; e iai petala ma maa soama.

¹³O le igoa foi o lona lua o vaitafe o Kaiona; e faataamilomilo lea i le nuu uma o Kuso.

¹⁴O le igoa foi o lona tolu o vaitafe o Hitekelu; e tafe atu lea i sasae i Asuria. O lona fa o vaitafe o Eufirate lea.

¹⁵Ua ave foi le tagata, e Ieova le Atua, ma ua tuu ia te ia i le faatoaga i Etena e galue ai ma leoleo ai.

¹⁶Ua fetalai atu foi Ieova le Atua i le tagata, o loo faapea atu, O laau uma o i le faatoaga e te ‘ai ai.

¹⁷A o le laau e iloa ai le lelei ma le leaga, aua e te ‘ai ai; auā o le aso e te ‘ai ai e te oti ai lava.

¹⁸Ua fetalai mai foi Ieova le Atua, E le lelei ina toatasi o le tagata; ou te faia sona fesoasoani e tatau ma ia.

¹⁹Na faia e Ieova le Atua i le eleele o manu vaefa uma lava, ma manu felelei uma lava; na ia aumaia ia Atamu ia iloa pe ni a ni igoa na te faaigoa ai; o le igoa ua faaigoaina ai e Atamu i meaola uma o lona igoa lea.

²⁰Ona faaigoaina atu lea e Atamu o igoa i manu vaefa fanua uma, ma manu felelei, atoa ma manu vaefa uma o le vao; a o Atamu, e lei maua se fesoasoani e tatau ma ia.

²¹Ua faamoegaseina o Atamu e Ieova le Atua, i le ua moe lava; ona toina lea e ia le tasi ona ivi asoaso, ma na faasoo ane le aano e sui a‘i.

²²O le ivi asoaso foi na toina e Ieova le Atua ia Atamu ua na fai a‘i le fafine, ona ia aumaia lea o ia ia Atamu.

²³Ona faapea ai lea o Atamu, O le ivi lava lenei o o‘u ivi, ma le aano o o‘u aano; e ta‘ua o ia o le fafine, auā na toina atu o ia ai le tane.

²⁴O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi.

²⁵Sa le lavalavā i laua o Atamu ma lana avā, a ua le mamā lava.