Read Samoan Old Version Bible – O LE TUSI PAIA KENESE, 28 Bible Online

KENESE, 28 - Samoan Old Version Bible – O LE TUSI PAIA bible

KENESE, 28

¹Ona valaau atu ai lea o Isaako ia Iakopo, ua na faamanuia ia te ia, ma fai atu ia te ia, ua faapea atu i ai, Aua e te fai avā i se fafine o Kanana.

²Tu ia i luga, ina alu i Patanarama, i le aiga o le tamā o lou tinā, o Petueli, ma ia e fai avā ai i se afafine o Lapana le tuagane o lou tinā.

³Ia faamanuia ia te oe e le Atua e ona le malosi uma lava, ia uluola oe ia te ia, ia faatoateleina oe e ia, ma ia avea oe ma faapotopotoga o nuu;

⁴ia na avatu foi ia te oe le manuia o Aperaamo, o oe lava ma au fanau faatasi ma oe; ina ia fai mou tofi le nuu ua e āumau ai, na foaiina mai ai e le Atua ia Aperaamo.

⁵Ua auina atu Iakopo e Isaako; ona alu atu ai lea o ia i Patanarama ia Lapana le atalii o Petueli le Suria, le tuagane o Repeka le tinā o Iakopo ma Esau.

⁶Ua iloa e Esau ua faamanuia e Isaako ia Iakopo, ma auina atu ia te ia i Patanarama, e fai avā ai, o lana faamanuia foi ia te ia na ia fai atu ai ia te ia, ua faapea atu, Aua e te fai avā i se fafine o Kanana;

⁷ma ua faalogo Iakopo i lona tamā ma lona tinā, ma ua alu atu i Patanarama;

⁸ua iloa foi e Esau ua leaga fafine o Kanana i le manatu o lona tamā o Isaako;

⁹ona alu ai lea o Esau ia Isamaeli ma fai avā ia Maalata le afafine o Isamaeli, le atalii o Aperaamo, le tuafafine foi o Nepaiota, e faaopoopoina ai i avā na ia te ia.

¹⁰Ona tuua lea e Iakopo o Peresepa, a e alu i Karana.

¹¹Ua oo i le tasi mea, ua moe ai, auā ua goto le la; ua ia ave foi ni maa nai lea mea, ua fai mona aluga, ua taoto ai i lea mea.

¹²Ua fai lana miti; faauta foi, o le apefai ua faatuina i le eleele, ua oo lona iu i le lagi; faauta foi, o agelu a le Atua ua a‘ea‘e ma ifoifo ai.

¹³Faauta foi, ua tu ai Ieova i ona luga, ua fetalai mai, O a‘u o Ieova le Atua o Aperaamo lou tamā, ma le Atua o Isaako, o le fanua e te taoto ai ou te avatu ai ia te oe ma au fanau;

¹⁴e avea foi au fanau pei o le efuefu o le eleele, e faasalalauina solo foi oe i sisifo, ma sasae, ma le itu i matu, atoa ma le itu i toga, o oe foi ma au fanau e manuia ai aiga uma o le lalolagi.

¹⁵Faauta foi, ou te i ai ia te oe, ou te tausi foi ia te oe i mea uma e te alu i ai, ou te toe faafoisia mai oe i le nuu nei; auā ou te le tuua oe, seia ou faia le mea ua ou fai atu ai ia te oe.

¹⁶Ona ala lea o Iakopo na moe, ua ia faapea E moni lava e i ai Ieova i le mea nei, a e ou te lei iloa.

¹⁷Ua fefe ai o ia, ua faapea, O le mea matautia lava lenei, e le se mea ese lenei, na o le fale lava o le Atua, o le faitotoa lava lenei o le lagi.

¹⁸Ua tulai Iakopo i le taeao lava, ua tago i le maa na ia aluga ai, ua faatuina ai ma faailoga, ua liligi ifo i ona luga le suāuu.

¹⁹Ua ia faaigoa lea mea o Peteli, sa muai faaigoaina lea aai o Lusa.

²⁰Ona faia lea e Iakopo lana tauto, ua faapea atu, Afai e ia te au le Atua, ma tausi ia te au i lenei ala ou te alu ai, ma foai mai mea e ‘ai ou te ‘ai ai, ma ofu ou te ofu ai,

²¹ina ia ou toe foi ma le manuia i le aiga o lo‘u tamā, ona fai ai lea o Ieova mo‘u Atua;

²²o lenei maa foi, ua ou faatuina ma faailoga, e fai lea ma fale o le Atua; o mea uma foi e te foai mai ia te au ou te avatu lava ia te oe mea e sefulu a‘i.