Read Samoan Old Version Bible – O LE TUSI PAIA KENESE, 31 Bible Online

KENESE, 31 - Samoan Old Version Bible – O LE TUSI PAIA bible

KENESE, 31

¹Ua faalogo foi o ia i upu a atalii o Lapana, ua faapea ane, Ua aveesea e Iakopo o mea uma na i lo tatou tamā; o mea foi sa i lo tatou tamā ua maua ai e ia lena tamaoaiga uma.

²Ua ilo atu foi e Iakopo mata o Lapana, faauta foi, ua le fiafia mai ia te ia pei o anamua.

³Ua fetalai mai foi Ieova ia Iakopo, Ina toe foi atu ia i le nuu o ou tamā, ma lou aiga, ou te i ai foi ia te oe.

⁴Ua aami foi e Iakopo Rasela ma Lea, la te o mai ia te ia i le vao i lona lafu.

⁵Ua faapea atu foi o ia ia te i laua, Ua ou iloa nei o mata o lo oulua tamā, ua le fiafia mai ia te au pei o anamua; a o le Atua o lo‘u tamā ua ia te au ia.

⁶Ua oulua iloa foi ua ou auauna i lo oulua tamā i lo‘u malosi uma lava.

⁷Ua faa‘ole‘ole mai foi lo oulua tamā ia te au, ua faasefulu ona feliuai e ia o lo‘u totogi; a ua le tuuina atu e le Atua ia leaga ai a‘u ia te ia.

⁸A faapea mai o ia, O manu ilaila solo o lou totogi lea, ona fananau mai lea o manu uma i e ilaila solo; a faapea mai o ia, O e tusitusi o lou totogi lea, ona fananau mai lea o manu uma i e tusitusi.

⁹O lea ua aveeseina ai e le Atua o manu a lo oulua tamā, ma ua foaiina mai ia te au.

¹⁰Na oo foi i ona po e ofi ai manu, na ou vaai atu i la‘u miti, faauta foi, o manu poa e na feosofi i luga o manu, ua tusitusi, ma ilaila solo, ma pulepule i latou.

¹¹Ua faapea mai foi le agelu a le Atua ia te au i la‘u miti, Iakopo e; ona ou tali atu lea, O a‘u lenei.

¹²Ona faapea mai lea o ia, Ina vaai atu ia, ma e iloa atu, o manu poa uma e feosofi i luga o manu e tusitusi, ma ilaila solo, ma pulepule i latou; auā ua ou vaai i mea uma lava ua faia e Lapana ia te oe.

¹³O a‘u o le Atua o Peteli, o le mea na e uuina ai le maa e fai ma faailoga, o le mea na e tauto ai le tautoga ia te au; o lenei, ina tulai ia, ina e tuua ia o lenei nuu, a e foi atu i le nuu o lou aiga.

¹⁴Ona tali mai lea o Rasela ma Lea, ua faapea mai ia te ia, E ai ea se toe vaegāoloa po o se tofi mo i maua i le aiga o lo maua nei tamā?

¹⁵E le ua avea ea i maua ma tagata ese ia te ia? Auā ua faatauina i maua e ia, ua matuā faaumatia foi e ia a maua ario.

¹⁶O le oloa uma foi ua aveeseina e le Atua na i lo maua tamā, o a maua ia, ma a maua fanau; o lenei, o mea uma ua fetalaia mai e le Atua ia te oe, ina faia ia o lea.

¹⁷Ona tulai lea o Iakopo, ua ia faatietie foi ona atalii ma ana avā i luga o kamela;

¹⁸ua ia aveesea foi ana manu uma, ma ana oloa uma ua na maua, o manu na maua e ia, na na maua i Patanarama, o le a alu i lona tamā o Isaako i le nuu o Kanana.

¹⁹Ua alu foi Lapana e sele fulufulu o ana mamoe; ua gaoi foi e Rasela o tupua o lona tamā.

²⁰Ua sola faagaoi Iakopo ia Lapana le Suria, auā na ia le ta‘u atu ia te ia o le a sola ia.

²¹Ua sola lava ia, ma ana mea uma; ua ia tulai, ma laasia i le vaitafe, ma aga‘i atu i le mauga o Kiliata.

²²Ua oo i le aso tolu ona ta‘u atu ai lea ia Lapana, ua sola Iakopo.

²³Ona latou o lea ma ona uso, ua tuliloa ia te ia i aso e fitu; ona maua atu lea ia te ia i le mauga o Kiliata.

²⁴Na afio ane foi le Atua ia Lapana le Suria i le miti i le po, ua faapea mai ai ia te ia, Ia oe, ne‘i e tautala ia Iakopo i se lelei po o se leaga.

²⁵Ua maua atu foi e Lapana o Iakopo. Sa faatuina foi e Iakopo lona fale ie i le mauga; ua faatuina foi e Lapana ma ona uso o latou fale i le mauga o Kiliata.

²⁶Ua fai atu Lapana ia Iakopo, Se a lena mea ua e faia, ina ua e sola faagaoi ia te au, ma ua e au mai o‘u afafine faatagataotaua?

²⁷Se a le mea na e sola faalilolilo ai, ma e alu faagaoi ai ia te au; ma e le ta‘u mai ia te au, ia ou tuuina atu foi oe ma le olioli, ma pese, ma le topa, ma le kitara;

²⁸ma e le tuu mai ia te au se‘i matou taufeasogi ma o‘u atalii ma o‘u afafine? O lenei, ua e faavalea ina ua e faia lenei mea.

²⁹E mafai ia te au ona faaoo ia te outou se leaga; a ua fetalai mai le Atua o lo outou tamā ia te au i le po anapo, ua faapea mai, Ia oe, ne‘i e tautala ia Iakopo i se lelei po o se leaga.

³⁰O lenei foi, ua e fia alu lava, auā ua e matuā manao i le aiga o lou tamā; a o le a le mea ua e gaoi ai i o‘u atua?

³¹Ona tali mai lea o Iakopo ia Lapana, ua faapea mai, Na ou sola ina ua ou fefe; auā na ou faapea, ina ne‘i e fao ou afafine ia te au.

³²O le e te maua ua i ai ou atua, aua le ola ia; ia e silasila i luma o tatou uso nei i āu mea ua i te au, ma e ave e oe. Auā ua le iloa e Iakopo ua gaoia e Rasela.

³³Ona ulufale atu lea o Lapana i le fale ie o Iakopo, ma le fale foi o Lea, atoa ma fale o auauna fafine e toalua, a ua le maua e ia. Ona sau lea o ia nai le fale o Lea, ma ulufale atu i le fale o Rasela.

³⁴Na ave foi e Rasela tupua, ma tuu ai i le nofoa o le kamela, ua ia nofo ai foi i o latou luga. Ua suesue foi e Lapana i le fale uma, a ua le maua.

³⁵Ua fai mai foi o ia i lona tamā, Aua ne‘i toatamai lo‘u alii iua ua le mafai ona ou tulai i ou luma; auā o loo ia te au le uiga o fafine. Ua ia sailiili lava, a ua le maua tupua.

³⁶Ona ita lea o Iakopo, ua ia finau atu ia Lapana; ua fai atu Iakopo ia Lapana, ua faapea atu, Se a lo‘u leaga? Se a la‘u agasala ina ua e matuā tulituliloa mai ai ia te au?

³⁷O lenei, ua uma ona e suesue i a‘u mea uma, o ifea se mea o mea uma a lou aiga ua e maua? Tuu mai ia iinei i luma o o‘u uso ma ou uso, ina ia latou faamasino mai ia te i taua.

³⁸E luafulu tausaga na ou i ai ia te oe; ua le papā au mamoe fafine ma au ‘oti fafine, ua ou le ‘ai foi i mamoe poa o lou lafu.

³⁹O le na saeia ou te lei avatua ia te oe; na ou tauia lava; o le na gaoia i le ao po ua gaoia i le po na e sue mai ia te au.

⁴⁰Na faapea ai a‘u; na puapuagatia a‘u i le vevela i le ao, ma le maalili i le po; na le iloa foi sina moe e o‘u mata.

⁴¹Ua faapea ona i ai a‘u i lou aiga i ona tausaga e luafulu; na ou auauna ia te oe i tausaga e sefulu ma le fa mo ou afafine e toalua, a e ono foi tausaga mo au manu ia; ua faasefulu foi ona e feliuai lo‘u totogi.

⁴²Ana le ia te au le Atua o lo‘u tamā, o le Atua o Aperaamo, ma le ua mata‘u i ai Isaako, po ua e aufuaina mai lava a‘u. Ua silafia e le Atua lo‘u puapuaga ma le galuega a o‘u lima, i le ua ia aoai atu ia te oe i le po anapo.

⁴³Ona tali mai lea o Lapana ia Iakopo, ua faapea mai, O fafine nei o o‘u afafine ia, o tama nei foi o o‘u atalii ia, o manu nei foi o a‘u manu ia, o mea uma foi ua e iloa atu nei o a‘u lava ia mea; o o‘u afafine nei foi, se a se mea ou te faia ia te i laua i le aso nei, po o a la fanau ua fananau ai i laua?

⁴⁴O lenei, sau ia, ina fai ia sa ta mavaega; ia fai foi lea ma molimau ia te i taua.

⁴⁵Ona tago lea o Iakopo i le maa, ma faatu ai e fai ma faailoga.

⁴⁶Ua fai atu foi Iakopo i ona uso, Ina faapotopoto mai ia o maa; ona au mai lea e i latou o maa, ma fai ai le faupuega; ona latou aai ai lea i luga o le faupuega.

⁴⁷Ua faaigoa ai e Lapana o Ikasetuta; a ua faaigoa ai e Iakopo o Kaleta.

⁴⁸Ua fai atu foi e Lapana, E fai lenei faupuega ma molimau ia te i taua i le aso nei; o le mea lea na faaigoa ai lona igoa o Kaleta;

⁴⁹ma Mesepa, auā na faapea ana, Ia silasila mai Ieova ia te i taua, pe a ta te‘a eseese o oe ma a‘u.

⁵⁰Afai e te agaleaga atu i o‘u afafine, pe faaopoopo i o‘u afafine nisi au ava, ua leai se tagata ia te i taua, faauta mai ea, o le Atua e sisila ia ia te i taua ma oe.

⁵¹Ua faapea atu foi Lapana ia Iakopo, Faauta mai, o lenei faupuega, faauta mai foi, o lenei faailoga, ua ou faatuina ia te i taua;

⁵²ia fai lenei faupuega ma molimau, ia fai foi lenei faailoga ma molimau, ou te le laasia atu lenei faupuega ia te oe, e te le laasia mai foi lenei faupuega ma lenei faailoga ia te au, e fai ai se mea leaga.

⁵³O le Atua o Aperaamo, o le Atua foi o Nakori, o le Atua o lo laua tamā, ia faamasino mai o ia ia te i taua. Ona tauto ai lea o Iakopo i lē ua mata‘u i ai lona tamā o Isaako.

⁵⁴Ona fasi lea e Iakopo ni manu i le mauga, ua fai atu foi i ona uso e o mai e aai; ona latou aai ai lea, ua latou nonofo pea foi i le mauga i lea po.

⁵⁵Ona tulai lea o Lapana i le taeao lava, ma taufeasogi ma ona atalii ma ona afafine, ua ia faamanuia atu foi ia te i latou; ona alu lea o Lapana ma toe foi atu i lona nuu.