Read Samoan Old Version Bible – O LE TUSI PAIA KENESE, 33 Bible Online

KENESE, 33 - Samoan Old Version Bible – O LE TUSI PAIA bible

KENESE, 33

¹Ua tepa ae Iakopo ua iloa atu, faauta foi, o Esau ua sau ma tagata e toafa selau ma ia. Ona vavae atu lea e ia o le fanau ia Lea, ma Rasela, ma auauna fafine e toalua.

²Ona tuumua atu lea e ia o auauna fafine ma a laua fanau, ma Lea ma ana fanau e aupito ane i ai, ma Rasela ma Iosefa e aupito mulimuli i laua.

³Ona muamua atu lea o ia ia te i latou, ua faafitu ona ifo toele, ua oo ina latalata atu i lona uso.

⁴Ona momo‘e mai lea o Esau e faafetaiai mai ia te ia, ua fusi ia te ia, ma punou i lona ua, ma feasogi ma ia; ona la fetagisi ai lea.

⁵Ona tepa ae lea o Esau, ua iloa atu fafine ma le fanau; ona faapea mai lea o ia O ai ea i latou na ua ia te oe? Ona tali atu lea o ia, O a‘u fanau ua foaiina mai e le Atua i lona alofa i lau auauna.

⁶Ona faalatalata mai lea o auauna fafine, o i laua ma a la fanau, ona ifo lea o i latou.

⁷Ua faalatalata mai foi Lea ma ana fanau, ua ifo foi i latou; mulimuli ane ona faalatalata mai lea o Iosefa ma Rasela, ua ifo foi i laua.

⁸Ona faapea mai lea o ia, E faapefea lena vao manu ua matou fetaiai? Ona tali atu lea o ia, O au manu ia alofaina ai a‘u e lo‘u alii.

⁹Ona faapea mai lea o Esau, Lo‘u uso e, e tele a‘u nei mea; tuu pea ia au mea ia te oe.

¹⁰Ona tali atu lea o Iakopo, Aua lava, afai e te alofa mai ia te au, ia e talia mai lava la‘u mea alofa; auā o lenei, ua ou iloa atu ou fofoga, e peiseai ua ou iloa atu fofoga o le Atua, ma ua e finagalo malie mai ia te au.

¹¹Ia e talia lava lo‘u alofa ua avatu nei ia te oe; auā ua alofaina a‘u e le Atua, auā foi ua ia te au mea uma; ua ia uunai atu ia te ia, ona talia lea e ia.

¹²Ona faapea mai lea o Esau, Se‘i sauni la tatou malaga, ina tatou o ia, ou te muamua foi ia te oe.

¹³Ona tali atu lea o ia, Ua silafia e lo‘u alii ua faalelavā le fanau, o lafu mamoe foi ma lafu povi ma a latou tama, ua ia te au ia; afai foi e tulituliteteleina i latou i le aso e tasi, ona mamate ai lea o le lafu uma.

¹⁴Ia maliu atu lava lo‘u alii e muamua i lana auauna; a o a‘u, ou te savali lemu e faatatau i manu e muamua ia te au, atoa ma le fanau, seia ou oo atu i lo‘u alii i Seira.

¹⁵Ona faapea mai lea o Esau, Se‘i ou tuuina atu ia te oe ni o matou tagata nei. Ona tali atu lea o ia, Ai se a foi? Ia alofaina a‘u e lo‘u alii.

¹⁶Ona toe foi atu lea o Esau i lea aso i lana malaga i Seira.

¹⁷Ua alu atu foi Iakopo i Sukota, ua fai ai foi lona fale, ua fai ai foi fale apitaga o ana manu; o le mea lea na faaigoaina ai lea mea o Sukota.

¹⁸Ua saogalemu atu foi Iakopo i le aai o Sekema, o i le nuu o Kanana lea, ina ua sau o ia mai Patanarama; ua ia faatuina foi lona fale ie i luma o le aai.

¹⁹Ua ia faatau foi se fasi fanua i le mea sa faatuina ai e ia lona fale ie, nai le fanauga a Hamoro, le tamā o Sekema, i ni tupe e selau.

²⁰Ua ia faatuina foi i lea mea le fata faitaulaga, ua ia faaigoa ai foi o Eleloiisaraelu.