Read Samoan Old Version Bible – O LE TUSI PAIA KENESE, 34 Bible Online

KENESE, 34 - Samoan Old Version Bible – O LE TUSI PAIA bible

KENESE, 34

¹Ua alu atu Tina le tama teine a Lea, sa fanau mai e ia ia Iakopo, e maimoa i fafine o le nuu.

²Ua iloa foi o ia e Sekema le atalii o Hamoro, o lo sa Hivī, o le tamaalii o le nuu, ua ia ta‘ita‘i foi ia te ia, ua la momoe, ua ia faaleaga ia te ia.

³Ua matuā manao o ia ia Tina le afafine o Iakopo, ua loto lava i le teine, ua tautala foi ma le alofa lava i le teine.

⁴Ua fai atu foi Sekema i lona tamā o Hamoro, ua faapea atu, Ia e maua mai lenei teine e fai ma‘u avā.

⁵Ua lagona foi e Iakopo, ua faaleagaina e ia Tina lona afafine; o ona atalii foi sa i le vao i latou ma ana manu, ona faalologo ai lea o Iakopo seia latou o mai.

⁶Ua sau foi Hamoro le tamā o Sekema ia Iakopo e tautala ma ia.

⁷Ua o mai foi atalii o Iakopo mai le vao ina ua latou faalogo i ai; ua tiga foi i latou, ua matuā ita lava, ina ua faia e ia le mea leaga ia Isaraelu, ina ua la momoe ma le afafine o Iakopo; auā o le mea lea e le tatau lava ona fai.

⁸Ua tautala mai foi Hamoro ia te i latou, ua faapea mai, O lo‘u atalii o Sekema, o loo ua manao tele lava o ia i lo outou teine; se‘i outou tuu mai ia o ia ia te ia e fai mana avā.

⁹Ia fetaiai o tatou gafa, ma au mai o outou afafine mā matou, a e avatu o matou afafine mā outou.

¹⁰Tatou te mau foi ma i matou; faitalia outou i le laueleele; tou te mau ai, ma fefaatauai ia, ma ia outou mau fanua i ai.

¹¹Ua faapea mai foi Sekema i lona tamā ma ona tuagane, Ia alofagia mai a‘u nei e outou; o mea foi tou te fai mai ai ia te au, ou te avatu lava.

¹²Ta‘u mai ia ni oloa ia tele lava ma ni mea alofa, ou te avatu lava mea tou te fai mai ai ia te au; a ia tuu mai lava le teine ia te au e fai ma‘u avā.

¹³Ona tali atu lea o atalii o Iakopo ia Sekema ma Hamoro lona tamā ma le pepelo, ua tautala atu ai, ina ua faaleagaina e ia o Tina lo latou tuafafine;

¹⁴ua faapea atu ia te i laua, Matou te le mafaia lena mea ona avatua o lo matou tuafafine i se tagata ua le peritomeina; auā e fai ma luma lea mea ia i matou;

¹⁵e tasi lava le mea matou te usiusitai ai ia te outou; pe afai tou te faapei o i matou, ia peritomeina o outou tane uma;

¹⁶ona matou avatua lea o matou afafine ia te outou, o outou afafine foi matou te au mai ai mā matou, tatou te mau foi ma outou, e avea foi i tatou ma nuu e tasi.

¹⁷A e afai tou te le usiusitai mai ia te i matou, ia peritomeina outou, ona matou au mai ai lea o lo matou teine, ma matou o.

¹⁸Ua lelei foi a latou upu i le manatu o Hamoro ma Sekema le atalii o Hamoro.

¹⁹Ua le faatuai foi le taulealea ona faia o lea mea, auā na fiafia o ia i le afafine o Iakopo; sa sili foi lona agafaatamaalii i tagata uma o le aiga o lona tamā.

²⁰Ona o ai lea o Hamoro ma Sekema lona atalii i le faitotoa o la la aai, ua tautala atu i tagata o la la aai, ua faapea atu,

²¹O tagata ia ua filemu i latou ia te i tatou; o lenei, ia latou mau i le nuu, ma fefaatauai ai; auā o le laueleele, faauta, ua lautele lava ia, e mafai ona latou mau ai; ia tatou au mai o latou afafine e fai ma a tatou avā, ia tatou avatu foi o tatou afafine e fai ma a latou avā.

²²E tasi le mea e mafai ai ia tagata ona usiusitai mai ia te i tatou ia mau ai ma i tatou, ia fai ma nuu e tasi, ia peritomeina o tane uma o ia i tatou, e pei ona peritomeina o i latou.

²³O a latou mea, ma a latou oloa, ma a latou manu uma, e le fai ea ma a tatou ia? Tau ina tatou usiusitai ia te i latou, ona mau lea o i latou ma i tatou.

²⁴Ua usiusitai foi ia Hamoro ma lona atalii o Sekema o i latou uma e na o atu i le faitotoa o lana aai; na peritomeina foi o tane uma, o i latou uma e na o atu i le faitotoa o lana aai.

²⁵Ua oo foi i le aso tolu, ina ua malosi i latou, ona tago lea e atalii e toalua o Iakopo, o Simeona ma Levi, o tuagane o Tina, taitasi i lana pelu, ona ulu atu lea i le aai ma le le mata‘u, ma fasioti i tane uma.

²⁶Ua la fafasi foi ia Hamoro ma lona atalii o Sekema i le pelu, ua ave foi ia Tina ai le fale o Sekema, ma latou o.

²⁷Ua o atu foi atalii o Iakopo i e na fasia, ma latou vete le aai, auā na latou faaleagaina lo latou tuafafine.

²⁸Ua latou avea foi a latou mamoe, ma a latou povi, ma a latou asini, ma mea sa i le aai, ma mea sa i le fanua, ma a latou oloa uma,

²⁹o latou tama iti uma foi, ma o latou fafine ua latou avea faatagataotaua, ua latou vetea foi mea uma lava sa i fale.

³⁰A ua fai atu Iakopo ia Simeona ma Levi, Ua oulua faatiga mai ia te au, e inosia ai a‘u e i latou o e mau i le nuu, o sa Kananā ma sa Perisē; o i tatou nei foi ua toaitiiti, e faapotopoto faatasi i latou e laga mai ia te au, ma fasioti ia te au, e faaumatia foi a‘u, o a‘u atoa ma lo‘u aiga.

³¹Ona faapea lea o i laua, E faapea ea ona fai o ia i lo matou tuafafine e peiseai o se fafine talitane?