Read Samoan Old Version Bible – O LE TUSI PAIA KENESE, 39 Bible Online

KENESE, 39 - Samoan Old Version Bible – O LE TUSI PAIA bible

KENESE, 39

¹Ua ave ifo Iosefa i Aikupito, ua faatauina ia e Potifara le auauna sili a Farao, o le pule i le ‘au e faafeao, o le tagata Aikupito, ai lima o sa Isamaelī, na latou avatu ai o ia i lea mea.

²Sa i ai Ieova ia Iosefa, o le tagata manuia lava ia; sa i le fale o lona alii o le Aikupito.

³Ua iloa e lona alii ua ia te ia Ieova, o mea uma foi sa na faia ua faamanuia e Ieova i lona lima.

⁴Sa alofagia Iosefa e ia, ua ia auauna ia te ia, ua na tofia ai o ia e pule i lona aiga, o mea uma foi sa ia te ia ua tuu atu i lona lima.

⁵E afua mai i ona aso na ia tofia o ia e pule i lona aiga ma ana mea uma, na faamanuia ai e Ieova le aiga o le Aikupito ona o Iosefa, na manuia ia Ieova ana mea uma i le fale atoa ma le fanua.

⁶Ua ia tuu ana mea uma i le lima o Iosefa, ua na le iloa sana mea na o le mea e ‘ai sa ‘ai ai o ia. Sa aulelei le tino o Iosefa, ma ona mata e lalelei ia.

⁷E mulimuli ane i nei mea, ua tepa ane le faletua o lona alii ia Iosefa, ua fai mai, Ta te momoe.

⁸A e le mafai o ia, ma ua fai atu i le faletua o lona alii, Faauta, e le iloa e lo‘u alii se mea ua ia te au i le fale, o ana mea uma foi ua ia tuu mai i lo‘u lima.

⁹E leai se sili ia te au i le fale nei, ua na le taofi sina mea ia te au, ua na o oe, auā o oe lona faletua; pe faapefea ona ou faia lenei mea leaga tele ma ou agasala ai i le Atua?

¹⁰Ua tautala o ia ia Iosefa i lea aso ma lea aso, a e le faalogo o ia ia te ia ina ia la momoe faatasi ma ia, pe nofo faatasi ma ia.

¹¹Ua oo i le tasi aso, ua alu atu ai o ia i le fale e fai ai lana galuega, e leai se tasi tagata o le aiga sa i le fale.

¹²Ona tago atu lea o ia i lona ofu, o loo faapea, Ta te momoe; ona tuu lea e ia o lona ofu i lona lima ua sola, ua alu i fafo.

¹³Ua iloa e ia ua tuu lona ofu i lona lima, ma ua sola i fafo,

¹⁴ona valaau atu lea o ia i tagata o lona aiga, ua fai atu ia te i latou, ua faapea, Faauta, ua ia au mai ia te i tatou le tagata Eperu e ula ia i tatou; na sau ia ia te au ma te momoe ma ia, ona ou alaga lea ma le leo tele;

¹⁵ona faalogo lea o ia ua ou leo tele ma alaga, ona tuua lea e ia lona ofu ia te au, ua sola, ua alu i fafo.

¹⁶Ua teu lona ofu e ia seia sau lona alii i lona fale.

¹⁷Ona tautala atu lea o ia ia te ia i nei upu, o loo faapea, Na sau ia te au le auauna Eperu na e au mai ia te i matou, e ula mai ia te au.

¹⁸Ona ou leo tele ai lea ma ou alaga, ona tuu lea e ia o lona ofu ia te au, a e sola ia i fafo.

¹⁹Ua faalogo lona alii i upu a lana avā sa tautala ai ia te ia, o loo faapea, Ua faia nei mea ia te au e lau auauna; ona ita tele ai lea o ia.

²⁰Ua tago atu lona alii ia Iosefa, ua tuu ia te ia i le fale puipui, o le mea ua fusifusia ai e ua fusifusia e le tupu; sa i ai o ia i le fale puipui.

²¹Sa ia Iosefa Ieova, ua ia alofa ia te ia, ua na faatupuina le alofa o le alii o le fale puipui ia te ia.

²²Ua tuu atu e le alii o le fale puipui i le pule a Iosefa o e na fusifusia uma sa i le fale puipui; o mea uma na latou faia i lea mea, o ia lava na faia.

²³E lei vaavaai le alii o le fale puipui i se mea e tasi ua i lana pule; auā sa ia te ia Ieova, o mea foi sa na faia ua faamanuia lea e Ieova.