Read Samoan Old Version Bible – O LE TUSI PAIA KENESE, 41 Bible Online

KENESE, 41 - Samoan Old Version Bible – O LE TUSI PAIA bible

KENESE, 41

¹Ua mavae tausaga e lua, ona fai ai lea o le miti a Farao; faauta foi, ua tu ia i le auvai o le vaitafe.

²Faauta foi, ua o ae i le vaitafe povi e fitu tino lelei ma le pepeti, ua latou aai foi le vaofalī.

³Faauta foi, o isi povi e fitu ua tino leaga ma le paeee ua mulimuli ona o ae ia te i latou i le vaitafe, ua latou tutū i tafatafa o isi povi i le auvai o le vaitafe.

⁴Ua aai foi e povi tino leaga ma le paeee i povi e fitu ua tino lelei ma le pepeti.

⁵Ona ala mai lea o Farao. Ua toe moe foi o ia, ona fai ai lea o le isi ana miti; faauta foi, o ‘au saito e fitu ua tutupu mai i le ‘au e tasi, ua soona puputa ma le tino lelei mai.

⁶Faauta, ua muliai tutupu ia te i latou o ‘au saito e fitu e tino leaga ma le mamae i le matagi mai sasae.

⁷Ua ‘aina foi e ‘au saito tino leaga o ‘au saito e fitu e tino lelei ma le matutua. Ona ala mai ai lea o Farao; faauta, o le miti lava.

⁸Ua oo i le taeao, ona atuatuvale ai lea o lona loto, ona amiami ai lea i taulāitu uma o Aikupito, atoa ma tagata popoto uma na i ai. Ona tala atu ai lea e Farao o lana miti ia te i latou; a e leai se na te faamatalaina mai ia Farao.

⁹Ona fai mai ai lea o le ua sili i e tautu uaina ia Farao, ua faapea mai, Ou te manatua i le aso nei lo‘u sese.

¹⁰Na toasa mai Farao i ana auauna, ua tuu atu ai ia te au ia leoleoina i le fale o le alii e pule i le ‘au e faafeao, o a‘u nei atoa ma le ua sili i e fai mea e ‘ai.

¹¹Ona fai ai lea o a ma miti i le po e tasi, o a‘u lava ma ia, ua taitasi ma fai lana miti e tusa ma le faamatalaga.

¹²Na matou i ai foi ma le tasi taulealea, o le Eperu, o le auauna a le alii e pule i le ‘au e faafeao, na ma tala atu ia te ia, ona faamatala mai ai lea e ia ia te i maua o a ma miti, o le tagata ma lana miti na ia faamatala mai.

¹³Na taunuu lava faapei ona ia faamatala mai ia te i maua; na na faafoi ia te au i lo‘u faiva, a ua na faatautau ia te ia.

¹⁴Ona feau atu lea e Farao, ua aami ia Iosefa, ua faavaevave foi ona latou au mai ia te ia ai le lua, ua na tafi i lana ‘ava, ma sui ona ofu, ona alu atu ai lea ia Farao.

¹⁵Ona fai mai ai lea o Farao ia Iosefa, Ua fai la‘u miti, a e leai se na te faamatalaina mai ia te au; ua ou faalogo foi i le tala ia te oe, pe a e faalogo i se miti e te iloa ona faamatalaina.

¹⁶Ona tali atu ai lea o Iosefa ia Farao, ua faapea atu. E le o a‘u, a o le Atua na te avatu se tali lelei ia Farao.

¹⁷Ona tala mai ai lea e Farao ia Iosefa, Faauta, o la‘u miti na a‘u tu ai i le auvai o le vaitafe.

¹⁸Faauta foi, na o ae i le vaitafe o povi e fitu e tino lelei ma le pepeti, na latou aai i le vaofalī.

¹⁹Faauta foi, e mulimuli ia te i latou ona o ae o isi povi e fitu e matuā tino leaga lava ma le paeee, ou te le iloa lava ni e faapea ona leaga i le nuu uma o Aikupito;

²⁰na ‘aina foi e povi tino leaga ma le paeee o povi pepeti e fitu na muamua.

²¹Ua oo i o latou manava, a e le iloa lava po ua oo i o latou manava, a e peitai ua tino leaga pea faapei o anamua. Ona ou ala ai lea.

²²Faauta foi, na ou iloa i la‘u miti na fua mai o ‘au saito e fitu i le ‘au e tasi, e soona puputa ma le tino lelei mai.

²³Faauta, na mulimuli ona tutupu mai ia te i latou o isi ‘au saito e fitu e laiti, e tino leaga, ma le mamae i le matagi mai sasae.

²⁴Ona folo ai lea e ‘au saito tino leaga o ‘au saito lelei e fitu. Na ou talaina atu foi i le au taulāitu, a e leai se na te mafaia ona faamatalaina mai ia te au.

²⁵Ona fai atu ai lea o Iosefa ia Farao, E tau faatasi faalepo a Farao; ua faaali atu ai e le Atua ia Farao o le mea o le a na faia.

²⁶O povi lelei e fitu, o tausaga ia e fitu, o ‘au saito lelei e fitu, o tausaga foi ia e fitu; e tasi lava le faalepo.

²⁷O povi foi e fitu e paeee ma le tino leaga na mulimuli ona o ae ia te i latou, o tausaga ia e fitu; o ‘au saito foi e fitu e leaga ma le mamae i le matagi mai sasae, o tausaga oge ia e fitu.

²⁸O le upu lava lea ua ou fai atu ai ia Farao, ua faaali atu e le Atua ia Farao o le mea o le a na faia.

²⁹Faauta, o le a oo mai tausaga e fitu e matuā tele ai le mau i le nuu uma o Aikupito.

³⁰Ona muliai oo mai ai lea o tausaga oge e fitu, e galo ai le mau uma lava i le nuu o Aikupito; e faaumatia ai le nuu i le oge.

³¹E le toe iloa foi le mau i le nuu ona o le oge e mulimuli i ai; auā e velavela lava ia.

³²Na foi faalua mai le faalepo ia Farao; auā o le mea ua matuā faamauina e le Atua, e vave foi ona faataunuu mai e le Atua.

³³O lenei, ia saili e Farao se tagata mafaufau ma le poto, ma ia tofia o ia e pule i le nuu o Aikupito.

³⁴Ia fai lea mea e Farao, ia tofia foi matai i le nuu, ma ia avae lona lima o fua o le fanua o Aikupito i tausaga mau e fitu.

³⁵Ia latou faaputu foi i le mea e ‘ai uma i ia tausaga lelei o le a oo mai, ma ia tuu ai saito i le pule a Farao, ma ia latou teua mea e ‘ai i aai.

³⁶E fai foi lea mea e ‘ai ma mea e teu mā le nuu i tausaga e fitu o le oge e i ai i le nuu o Aikupito, ina ia le fano le nuu i le oge.

³⁷Ua lelei foi lea upu i le manatu o Farao ma le manatu o ana auauna uma.

³⁸Ona fai ane ai lea o Farao i ana auauna, Pe tatou te maua ea se tusa ma lenei tagata, o le ua i ai le Agaga o le Atua?

³⁹Ona fai mai ai lea o Farao ia Iosefa, Ua faaali atu e le Atua lea mea uma ia te oe; o le mea lea e leai ai se tusa ma oe i le mafaufau ma le poto.

⁴⁰E te pule oe i lo‘u aiga, o lau lava upu foi e pulea ai lo‘u nuu uma, na o le nofoālii ou te sili ai ia te oe.

⁴¹Ona fai mai ai lea o Farao ia Iosefa, Faauta mai, ua ou tuu atu ia te oe le pule i le nuu uma o Aikupito.

⁴²Ona to ese ai lea e Farao lana mama i lona lima, ua tuu mai i le lima o Iosefa, ua na faaofu foi ia te ia i ofu ie vavae, ua faaasoa foi le filifili auro i lona ua;

⁴³ua na faatietie foi ia te ia i le lua o ona nofoa faataavalevale, ona latou alalaga lea i ona luma, Ifo ia. Ua na tuu atu foi ia te ia le pule i le nuu uma o Aikupito.

⁴⁴Ua fai mai foi Farao ia Iosefa, O a‘u o Farao, e le sii e se tasi lona lima po o lona vae e aunoa ma oe i le nuu uma o Aikupito.

⁴⁵Ua faaigoa foi e Farao ia Iosefa o Sapenapaenea; ua avane foi ia te ia o Asenati e fai mana avā, o le afafine ia o Potifere le ositaulaga i Onu; ona alu atu ai lea o Iosefa i le nuu uma o Aikupito.

⁴⁶O le tolugafulu foi o ona tausaga na tu ai Iosefa i luma o Farao le tupu o Aikupito. Ona alu atu ai lea o Iosefa nai luma o Farao, ua ui ane i le nuu uma o Aikupito.

⁴⁷Ua pesi tele mai le fua o le fanua i tausaga mau e fitu.

⁴⁸Ona ia faaputuina ai lea o mea e ‘ai uma i tausaga e fitu na i ai i le nuu o Aikupito, ua na tuuina atu le mea e ‘ai i aai; o le mea e ‘ai o le fanua na vagavagaia le aai na ia tuuina atu i totonu o lea lava aai.

⁴⁹E tele lava saito na faaputuina e Iosefa pei o le oneone i le sami, ua iu ina tuua o le faitau, auā ua le masino lava.

⁵⁰Na fanaua foi e Iosefa ona atalii e toalua a o lei oo mai tausaga oge, na fanau ai ia te ia e Asenati le afafine o Potifere le ositaulaga i Onu.

⁵¹Ua faaigoa e Iosefa lana ulumatua o Manase, auā ua faapea ane ia, Ua faia e le Atua ina ia galo ia te au lo‘u tiga uma atoa ma le aiga uma o lo‘u tamā.

⁵²Ua ia faaigoa foi i le aupito ane i ai, o Efaraima, ua faapea ane ia, Auā ua faauluolaina a‘u e le Atua i le nuu na puapuagatia ai a‘u.

⁵³Ua mavae foi le fitu o tausaga mau na i le nuu o Aikupito.

⁵⁴Ona amata ai lea ona oo mai o tausaga e fitu o le oge, faapei ona fai atu ai o Iosefa; ua i ai foi le oge i nuu uma, a o le nuu uma o Aikupito sa i ai mea e ‘ai.

⁵⁵Ua mātelaina le nuu uma o Aikupito, ona alalaga mai ai lea o le nuu ia Farao i le mea e ‘ai; ona fai atu ai lea o Farao i tagata uma o Aikupito, Ia outou o atu ia Iosefa; o le mea e fai atu ai o ia ia te outou, ia outou faia.

⁵⁶Ua i ai foi le oge i le nuu uma, ona tālai ai lea e Iosefa o mea uma na faaputuina ai saito, ma na faatau atu i tagata Aikupito; sa velavela foi le oge i le nuu o Aikupito.

⁵⁷Ua o mai foi nuu uma i Aikupito e faatau saito ia Iosefa; auā sa velavela le oge i nuu uma lava.