Read Samoan Old Version Bible – O LE TUSI PAIA KENESE, 42 Bible Online

KENESE, 42 - Samoan Old Version Bible – O LE TUSI PAIA bible

KENESE, 42

¹Ua iloa e Iakopo ua i Aikupito saito, ona fai atu ai lea o Iakopo i ona atalii, Se a le mea tou te fevaaiai ai?

²Ua na fai atu foi, Faauta, ua ou faalogo e i ai saito i Aikupito; ia outou o ifo i ai, ma faatau mai ai ma tatou, ina ia tatou ola ai, a e aua le oti.

³Ona o ifo ai lea o uso o Iosefa o toatinoagafulu e faatau saito i Aikupito.

⁴A o Peniamina le uso o Iosefa, na le auina ia e Iakopo faatasi ma ona uso, auā na faaea o ia, ina ne‘i oo ia te ia se mea leaga.

⁵Na o foi atalii o Isaraelu e faatau faatasi ma e na o e faatau; auā na i ai le oge i le nuu o Kanana.

⁶Ua pule foi Iosefa i le nuu, o ia lava na faatau atu i tagata uma o le nuu; ona o mai lea o uso o Iosefa, ua latou ifo toele ia te ia.

⁷Ua vaai atu Iosefa i ona uso, ona iloa lea o i latou, a ua fai ia faatagata ese o ia ia te i latou, ma ua tautala faasiasia ia te i latou, ua fai atu ia te i latou, Maifea outou? Ona latou tali mai ai lea, Matou te o mai i le nuu o Kanana e faatau mea e ‘ai.

⁸Ua iloa lava e Iosefa ona uso, a ua latou le iloa o ia.

⁹Ona manatua lea e Iosefa o ana miti na fai ia te i latou; ua na fai atu foi ia te i latou, O tagata agaga outou, ua outou o mai lava e vaavaai i se mea e saogofie ai le nuu.

¹⁰Ona latou tali mai ai lea, Le alii e, e leai lava, o le o mai nei au auauna e faatau i mea e ‘ai.

¹¹O i matou uma o atalii o le tagata e toatasi, e faamaoni lava i matou, e le ni tagata agaga au anauna.

¹²A ua na fai atu ia te i latou, E leai lava, a e peitai ua outou o mai i le fia iloa se mea e saogofie ai le nuu.

¹³Ona latou fai mai ai lea, O au auauna o le uso e toasefulu ma le toalua i matou, o atalii o le tagata e toatasi i le nuu o Kanana; faauta foi, o ona po nei o i ai le uii ma lo matou tamā, a o le tasi ua leai.

¹⁴Ona fai atu ai lea o Iosefa ia te i latou, O le upu lava lea na ou fai atu ai ia te outou o loo faapea, O outou o tagata agaga.

¹⁵O le mea nei e iloa ai lo outou faamaoni, O loo soifua Farao, tou te le o ese i le mea nei se‘i ilo a e sau iinei lo outou uso aupito itiiti.

¹⁶Ina auina atu ia so outou na te amia lo outou uso, a e noanoatia outou ina ia tofotofo ai a outou upu po ua moni a outou; a e afai e leai, o loo soifua Farao, e moni o tagata agaga lava outou.

¹⁷Ona ia tuu le ia te i latou faatasi i le fale puipui i aso e tolu.

¹⁸O le aso tolu foi ua fai atu ai Iosefa ia te i latou, Ia faia e outou le mea nei tou te ola ai; auā o a‘u ou te mata‘u i le Atua.

¹⁹Afai e faamaoni outou, ia noanoatia so outou uso i le fale puipui, a e o pea ia outou e ave saito i le oge o outou aiga.

²⁰Ia outou au mai foi ia te au lo outou uso aupito itiiti, ona faamaonia ai lea a outou upu, ona outou le oti ai lea. Ua faapea foi ona latou faia.

²¹Ona latou fetautalatalai ai lea, E moni lava, ua tatou sala ona o lo tatou uso, na tatou iloa le puapuaga o lona loto, ina ua aioi mai o ia ia te i tatou, a e tatou te lei mafafai lava; o le mea lea ua oo mai ai ia te i tatou lenei puapuaga.

²²Ona tali atu ai lea o Reupena ia te i latou, ua faapea atu, Ou te lei fai atu ea ia te outou, faapea, Aua ne‘i outou agaleaga atu i le tama, a ua outou le faalogo mai lava? Faauta foi, ua tauia mai lona toto.

²³A ua latou le iloa ua lagona e Iosefa a latou upu; auā na ia te i latou ma ia lē faamatala upu.

²⁴Ona alu ese lea o ia ia te i latou, ma tagi; ua toe foi atu ia te i latou, ua tautala ma i latou, ua na ave ese foi Simeona ia te i latou, ua noanoa ia te ia i o latou luma.

²⁵Ona poloai ai lea o Iosefa e faatutumu i a latou taga i saito, ma ia toe avatu a latou tupe ia taitasi i lana taga, ia avatu foi ia te i latou ni oso mo la latou malaga. Ua faapea ona faia e ia ia te i latou.

²⁶Ua latou faaee saito i a latou asini, ona latou o ese ai lea i lea mea.

²⁷Ua tatala foi e le tasi lana taga e fafaga lana asini i le mea e moe ai, ona iloa ai lea e ia o ana tupe, faauta, ua i le gutu o lana taga.

²⁸Ona fai atu ai lea o ia i ona uso, Ua toe au mai a‘u tupe, faauta foi, e i ai lava i la‘u taga. Ona segia ai lea o latou mauli ua atuatuvale, ua faapea ane le tasi i le tasi, Pe se a lenei mea ua faia e le Atua ia te i tatou?

²⁹Oua latou oo atu ai lea ia Iakopo lo latou tamā i le nuu o Kanana, ua latou tala atu ia te ia i mea uma na oo ia te i latou, ua faapea atu,

³⁰Ua tautala faasiasia mai ia te i matou le tagata e aliitai le nuu, ma na masalo mai o tagata agaga i matou.

³¹Ona matou fai atu ai lea ia te ia, Matou te faamaoni lava; e le ni tagata agaga i matou.

³²O le uso e toasefulu ma le toalua i matou, o atalii o lo matou tamā; o le tasi ua leai, a o le uii, o i ai i ona po nei ma lo matou tamā; i le nuu o Kanana.

³³Ona fai mai ai lea ia te i matou le tagata e aliitai le nuu, O le mea lea ou te iloa ai e faamaoni outou, tuu mai ia so outou uso ia te au, ma ave mea e ‘ai i le oge o outou aiga, i le outou o ai;

³⁴a e au mai ia te au lo outou uso e aupito itiiti, ona ou iloa ai lea e faamaoni outou, e le ni tagata agaga; ona ou tuu atu ai lea o lo outou uso ia te outou, ona outou faatau lea i le nuu.

³⁵Ua latou saai foi a latou taga, faauta foi, ua taitasi le tagata ma laua ofuofu tupe i lana taga; ua iloa e i latou ma lo latou tamā a latou ofuofu tupe, ona latou fefefe ai lea.

³⁶Ona fai atu ai lea o lo latou tamā o Iakopo ia te i latou, Ua outou ave ese a‘u fanau ia te au; o Iosefa ua leai, o Simeona ua leai; o le a outou ave ese foi ia Peniamina; o ia mea uma ou te leaga ai.

³⁷Ona fai mai ai lea o Reupena i lona tamā, ua faapea mai, Ia e fasiotia o‘u atalii e toalua pe afai ou te le au mai o ia ia te oe. Tuu mai ia o ia ia te au, ou te toe au mai o ia ia te oe.

³⁸A ua ia fai atu, Tou te le o ifo ma lo‘u atalii; auā na oti lona uso, na o ia lava e toe, pe a oo se mea leaga ia te ia i le ala o le a outou o ai, ona outou aveina ifo lea o‘u lauulu sinā i le tuugamau ma le faanoanoa.