Read Samoan Old Version Bible – O LE TUSI PAIA KENESE, 48 Bible Online

KENESE, 48 - Samoan Old Version Bible – O LE TUSI PAIA bible

KENESE, 48

¹E mulimuli ane foi i ia mea, ua tala atu ia Iosefa, Faauta, ua ma‘i lou tamā; ona ave ai lea e ia ona atalii e toalua, o Manase ma Efaraima.

²Ona ta‘u atu lea ia Iakopo, o loo faapea atu, Faauta, o loo sau ia te oe lou atalii o Iosefa; ona faamalosi lea o Isaraelu, ua nofo i luga i le moega.

³Ona fai atu lea o Iakopo ia Iosefa, Na faaali mai ia te au o le Atua e ona le malosi uma lava i Lusa i le nuu o Kanana, ma na faamanuia mai ia te au.

⁴Na ia fetalai mai ia te au, Faauta, ou te faauluolaina oe, ma ou faatoateleina oe, ou te faia foi oe ma faapotopotoga o nuu; ou te avatu foi lenei nuu i lau fanau pe a mavae atu oe, e fai mo latou e faavavau.

⁵O lenei foi, o ou atalii e toalua na fanau ia te oe i le nuu o Aikupito, a o lei sau o a‘u ia te oe i Aikupito, e o‘u lava i laua, o Efaraima ma Manase, e fai mo a‘u e faapei o Reupena ma Simeona.

⁶O lau fanau foi e te fanaua e mulimuli ane ia i laua, e ou i latou, e ta‘ua i latou i le igoa o latou uso i o la tofi.

⁷O a‘u foi, na ou sau nai Patana, ona oti ai lea o Rasela o latalata ane ia te au i le nuu o Kanana, i le ala ina ua tali oo i Efarata, na ou tanumia o ia i lea mea i le ala i Efarata, o Peteleema lava lea.

⁸Ona iloa atu lea e Isaraelu i atalii o Iosefa, ua faapea ane, O ai ea i laua nei?

⁹Ona tali atu lea o Iosefa i lona tamā, O o‘u atalii lava i laua nei ua foaiina mai ia te au e le Atua i lenei nuu; ona ia fai atu lea, Ina au mai ia ia te au, ou te famanuia ia te i laua.

¹⁰Sa faasegosego foi mata o Isaraelu, auā ua toeaina, sa le mailoa lelei; ona ia faalatalataina lea o i laua ia te ia, ona taufeasogi lea o ia ma i laua, ma na fusi ia i laua.

¹¹Ona fai atu lea o Isaraelu ia Iosefa, Fa ita ou te le toe iloa atu ia te oe, faauta foi ua faailoa mai e le Atua ia te au au fanau.

¹²Ona aumaia lea e Iosefa o i laua nai le va o ona vae, ua ifo toele foi o ia.

¹³Ona avea lea o i laua e Iosefa, o Efaraima i lona lima taumatau e feagai ma le lima tauagavale o Isaraelu, o Manase foi i lona lima tauagavale e feagai ma le lima taumatau o Isaraelu, ona faalatalata atu lea o i laua ia te ia.

¹⁴Ona faaloaloa atu lea e Isaraelu o lona lima taumatau, ma faaee ai i le ulu o Efaraima, a o le uii lava ia; a ua faaee lona lima tauagavale i le ulu o Manase, ua na fai faautauta i ona lima, auā o Manase o le ulumatua lava lea.

¹⁵Ona faamanuia atu lea o ia ia Iosefa ua faapea atu ai, O le Atua lava o le na savali ai i ona luma o‘u tamā o Aperaamo ma Isaako, o le Atua lava o le na fagaina a‘u talu ina fanau o a‘u, ua oo mai lava i le aso nei;

¹⁶o le Agelu lava o le na laveaiina mai a‘u ai le leaga uma lava, ia faamanuia atu lava o ia i tama nei; ia faaigoa foi i ai i lo‘u nei igoa ma igoa o o‘u tamā o Aperaamo ma Isaako, ma ia matuā faatoateleina i laua i le lalolagi.

¹⁷Ua iloa e Iosefa, ua faaee e lona tamā lona lima taumatau i le ulu o Efaraima, ua leaga lea ia te ia, ona sii lea e ia i luga le lima o lona tamā ina ia avea nai le ulu o Efaraima i luga o le ulu o Manase.

¹⁸Ua faapea atu foi Iosefa i lona tamā, Lo‘u tamā e, aua le faapea, auā o le ulumatua lenei; se‘i faaee lou lima taumatau i luga i lona ulu.

¹⁹A ua le mafai lona tamā, ua ia fai mai, Ua ou iloa, lo‘u atalii e, ua ou iloa lava, e avea foi o ia ma nuu, o ia foi lava e faatoateleina; a e peitai e sili lava lona uso aupito itiiti ia te ia, e avea foi ana fanau ma nuu e tele.

²⁰Ona faamanuia lea e ia ia i laua i lea lava aso, ua faapea ane, O oe e fai ai faamanuia e Isaraelu, e faapea, Ia faatusaina oe e le Atua ia Efaraima ma Manase; ua ia tofia Efaraima ia sili ia Manase.

²¹Ona fai atu lea o Isaraelu ia Iosefa, Faauta, o a‘u nei o le a a‘u oti, a e ia te outou pea le Atua, e faafoisia e ia outou i le nuu o outou tamā.

²²O a‘u foi, ua ou avatu ia te oe le tasi tofi e sili i ou uso, o le mea na ou faoa nai le lima o sa Amorī i la‘u pelu ma la‘u aufana.