Read Samoan Old Version Bible – O LE TUSI PAIA KENESE, 50 Bible Online

KENESE, 50 - Samoan Old Version Bible – O LE TUSI PAIA bible

KENESE, 50

¹Ona faapaū atu lea o Iosefa i fofoga o lona tamā, ua tagi ai i ona luga, ma sogi ia te ia.

²Ona poloai lea o Iosefa i ana auauna fomai ia latou atualala i lona tamā; ona atualalaina lea o Isaraelu e fomai.

³Ua atoa ona aso e fagafulu, auā o loo faapea ona faaatoa o aso o e ua atualalaina; ua tagi foi Aikupito ia te ia e fitugafulu ona aso.

⁴Ua mavae aso na taufaitagi ai, ona fai atu lea o Iosefa i le aiga o Farao, o loo faapea atu, Afai ua outou alofa mai ia te au, ia faapea ona outou fetalai ane ia Farao;

⁵Na fai mai lo‘u tamā ia te au ou te tauto atu ia te ia, ua faapea mai, Faauta, o a‘u nei o le a a‘u oti; o le tuugamau na ou elia mo‘u i le nuu o Kanana, o le mea lava lea e te tanumia ai a‘u; o lenei, se‘i tuu mai ia a ou alu ae e tanu i lo‘u tamā, ona ou foi mai lava lea.

⁶Ona fai mai lea o Farao, Ina alu ae ia, ma tanu lou tamā, pei ona e tauto atu ia te ia.

⁷Ona alu ae lea o Iosefa ina ia tanu lona tamā; na o ae foi faatasi ma ia o auauna uma a Farao, o toeaina o lona aiga, ma toeaina uma lava o le nuu o Aikupito;

⁸atoa ma le aiga uma o Iosefa, ma ona uso, ma le aiga o lona tamā, na o tama iti, ma lafu mamoe ma povi, na tuua ia e i latou i le nuu o Kosena.

⁹Na o ae foi faatasi ma ia o nofoa faataavalevale ma e tietie i solofanua, sa matuā toatele lava.

¹⁰Ua latou oo i le fale e soli ai saito o Atatu, o loo i tala atu i Ioritana; ona latou taufaitagitu‘i ai lea i le tagitu‘i matuā tele lava; ua fai ai le faanoanoa ona o lona tamā e fitu ona aso.

¹¹Ua iloa foi e na nonofo i le nuu o Kanana le faanoanoa i le fale e soli ai saito o Atatu, ona faapea ane lea o i latou, O le faanoanoa lenei o Aikupito e matuā tele; o le mea lea ua ta‘ua ai lea mea Apelamisarima, o loo i tala atu o Ioritana.

¹²Ua faia e ona atalii ia te ia, e faapei ona ia fetalai atu ia i latou.

¹³Auā ua ave ia e ona atalii i le nuu o Kanana, ma latou tanumia o ia i le ana i le fanua o Makapelu, na faatauina mai e Aperaamo, atoa ma le fanua, e fai ma tuugamau mai ia Eferona o le sa Hetī, o loo i luma o Mamere.

¹⁴Ona foi atu lea o Iosefa i Aikupito, o ia, ma ona uso, ma i latou uma o e na o ae ma ia e tanu i lona tamā, ina ua uma ona tanu o lona tamā.

¹⁵Ua iloa e uso o Iosefa ua oti lo latou tamā, ona faapea ai lea, Anei e faalotoloto mai Iosefa ia i tatou, ma na matuā taui mai ia te i tatou o mea leaga uma na tatou faia ia te ia.

¹⁶Ona latou avatu lea o le feau ia te ia, ua faapea atu, Na poloai mai lou tamā, ina o le maliu o ia, ua faapea mai,

¹⁷Ia faapea ona outou fai atu ia Iosefa, Ou te aioi atu ia te oe, ia e faamagaloina le agaleaga a ou uso ma la latou agasala, auā na latou agaleaga atu lava ia te oe; o lenei, matou te aioi atu, ia e faamagaloina le agaleaga a auauna nei a le Atua o lou tamā. Ona tagi lea o Iosefa i a latou upu ia te ia;

¹⁸ua o atu foi ona uso, ma faapauu i ona luma, ma fai atu i latou ia te ia, Faauta, o au auauna i matou nei.

¹⁹Ona fai mai lea o Iosefa ia te i latou, Aua ne‘i outou matatau; pe la o a‘u o le sui o le Atua.

²⁰A o outou, na fai togafiti e outou ia leaga ai a‘u; a o le Atua, na finagalo ia ia iu i le lelei, ina ia oo ina faaolaina o le nuu e toatele, pei ona taunuu ai i ona po nei.

²¹O lenei, aua ne‘i matatau outou; o a‘u nei ou te tausi lava ia te outou ma a outou fanau; ona faamatalaloto mai lea o ia ia te i latou, ma tautala lelei mai ia te i latou.

²²Sa nofo foi Iosefa i Aikupito, o ia atoa ma le aiga o lona tamā; o le ola o Iosefa ua selau ma le sefulu o tausaga;

²³sa iloa foi e Iosefa le fanau a Efaraima ua oo i le tupulaga e tolu; o le fanau foi a Makiro o le atalii lea o Manase na sapasapaia i luga o tulivae o Iosefa.

²⁴Ona fai atu lea o Iosefa i ona uso, O a‘u nei o le a a‘u oti; a o le Atua, e asiasi mai lava o ia ia te outou, ma aveina ae outou ai le nuu nei i le nuu na tauto ai o ia ia Aperaamo, ma Isaako, atoa ma Iakopo.

²⁵Ona fai atu ai lea o Iosefa ia tauto mai le fanauga a Isaraelu, ua faapea atu, E asiasi mai lava le Atua ia te outou; tou te avae foi o‘u ivi ai le mea nei.

²⁶Ona oti lea o Iosefa ina ua atoa ona tausaga e selau ma le sefulu; na atualalaina foi o ia e i latou, ma tuu i le atolaau i Aikupito.