Read Samoan Old Version Bible – O LE TUSI PAIA KENESE, 6 Bible Online

KENESE, 6 - Samoan Old Version Bible – O LE TUSI PAIA bible

KENESE, 6

¹Ua oo ina amata ona faatoateleina o tagata i le fogāeleele, ma ua fanauina e i latou o afafine,

²ona vaavaai lea o atalii o le Atua i afafine o tagata, ua lalelei lava i latou; ona fai avā ai lea o i latou i fafine uma ua latou loto i ai.

³Ona fetalai ane lea o Ieova, E le faavavau ona finau o lo‘u Agaga ma tagata, auā ua na o tagata i latou; a o latou aso e selau ma le luafulu o tausaga ia.

⁴Sa i le lalolagi i ia ona aso o tagata maualuluga; e faapea foi i ona tua mai, ina ua o ane o atalii o le Atua i afafine o tagata, ma ua fananau ai ia te i latou, o tagata malolosi ia ma le ta‘ua anamua.

⁵Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.

⁶Ua salamo foi Ieova ina ua faia e ia tagata i le lalolagi, ma ua tiga ai lona finagalo.

⁷Ona fetalai ane lea o Ieova, Ou te soloieseina i le fogāeleele tagata na ou faia; o tagata, ma manu vaefa, ma mea fetolofi, atoa ma manu felelei; auā ua ou salamo ina ua ou faia i latou.

⁸A o Noa, ua alofagia o ia e Ieova.

⁹O le tala lenei ia Noa; o Noa o le tagata amiotonu ia ma le sao i e tupulaga ma ia; sa la feooai o le Atua ma Noa.

¹⁰Ua fanaua foi e Noa ona atalii e toatolu, o Semu, ma Hamo, ma Iafeta.

¹¹Ua leaga lava le lalolagi i luma o le Atua, ma ua tumu le lalolagi i le saua.

¹²Ua silasila mai le Atua i le lalolagi, faauta foi, ua leaga lava; auā o tagata uma ua leaga ia i latou a latou amio i le lalolagi.

¹³Ua fetalai atu le Atua ia Noa, Ua oo mai i o‘u luma le iuga o tagata uma; auā ua tumu le lalolagi i le saua ona o i latou; faauta foi, o a‘u lava, ou te faaumatia i latou atoa ma le lalolagi.

¹⁴Ia e faia se vaa mo oe i le laau o le kofa; e te faia ni ana i le vaa, e te puluti ai foi i le liu ma tua i pulu.

¹⁵Ia faapea foi ona e faia; e tolu selau o kupita o le umi lea o le vaa, e limagafulu o kupita lona lautele, e tolugafulu o kupita foi lona maualuga.

¹⁶E te faia se faamalama i le vaa, o le kupita foi e te faaumaina i luga; e te faia foi se faitotoa o le vaa i lona itu; e te faia ni ona fogavaa, o le aupito i lalo, ma lona lua, ma lona tolu.

¹⁷Faauta, o a‘u foi, ou te faaooina atu le lolo i luga o le laueleele, e faaumatia ai mea ola uma ua i ai le mānava o le ola o i lalo o le lagi; e faauma ai le ola o mea uma i le lalolagi.

¹⁸A e ou te faatumauina la‘u feagaiga ma oe; e te ulu atu foi i le vaa, o oe, ma ou atalii, ma lau avā, atoa ma avā a ou atalii faatasi ma oe.

¹⁹E te ave i le vaa mea ola ia tailua i mea uma, ia faaolaina faatasi ma oe; ia i ai le manu poa ma le manu fafine;

²⁰o manu felelei e taitasi ma lona uiga, ma manu vaefa e taitasi ma lona uiga, o mea fetolofi uma o i le eleele e taitasi ma lona uiga, ia tailua ona o atu ia te oe i mea uma, ia faaolaina.

²¹O oe foi e te ave ma oe ni mea e ‘ai i mea uma e ‘aina, e te faaputuina ia te oe; e fai foi ma mea e ‘ai mā oe atoa ma i latou.

²²Na faia foi e Noa e faapei ona poloai atu ai le Atua ia te ia i mea uma, sa faapea lava ona fai e ia.