Read Samoan Old Version Bible – O LE TUSI PAIA KENESE, 9 Bible Online

KENESE, 9 - Samoan Old Version Bible – O LE TUSI PAIA bible

KENESE, 9

¹Ua faamanuia atu e le Atua ia Noa ma ona atalii, ma ua faapea atu ia te i latou, Ia outou fanafanau, ma ia uluola, ma ia tumu le lalolagi ia te outou.

²O le mata‘u ia te outou ma le fefe ia te outou e oo i manu vaefa uma o le lalolagi, ma manu felelei uma, ma mea uma e feoai i le eleele, atoa ma i‘a uma o le sami; ua tuuina atu ia i o outou lima.

³O mea ola uma e feoai, e a outou ia e fai ma mea e ‘ai; ua ou foaiina atu ma outou o mea uma, e pei o laau afu e tupu lauolaola.

⁴A o le aano o manu o i ai le ola, o lona toto foi lea, aua tou te aai ai.

⁵E moni lava, ou te taui atu lo outou toto o lo outou ola; ou te tauiatua i manu uma; o le tagata foi, ou te taui atu le ola o le tagata i le tagata lona uso.

⁶O se na te faamaligiina le toto o le tagata, e faamaligiina lona lava toto e le tagata; auā o le faatusa o le Atua na fai ai e ia le tagata.

⁷O outou foi, ia outou fanafanau, ma ia outou uluola; ia outou tuputupulaiina i le lalolagi, ma ia outou uluola ai.

⁸Ua fetalai atu foi le Atua ia Noa, ma ona atalii faatasi ma ia, o loo faapea atu,

⁹Faauta foi, o a‘u, ou te faatumauina la‘u feagaiga ma outou, ma a outou fanau pe a mavae outou;

¹⁰atoa foi ma mea ola uma o ia te outou, o manu felelei, o manu vaefa fanua, ma manu o le vao uma o ia te outou, o mea uma ua ulufafo i le vaa e oo i manu uma o le lalolagi.

¹¹Ou te faatumauina lava la‘u feagaiga ma outou; e le toe faaumatia lava mea ola uma i le vai o se lolo; e leai foi se toe lolo e faaumatia ai le lalolagi.

¹²Ua fetalai atu foi le Atua, O le faailoga lenei o le feagaiga ou te faia ma outou, atoa ma mea ola uma o ia te outou, e autupulaga lava;

¹³ua ou tuuina la‘u nuanua i le ao, e fai ma faailoga o le feagaiga a le lalolagi ma a‘u.

¹⁴A ou faamalumaluina ifo le lalolagi i se ao, ma ua iloa le nuanua i le ao;

¹⁵ona ou manatua lea o la‘u feagaiga ua ou osia ma outou, ma mea ola eseese uma lava; e le toe avea le vai ma lolo e faaumatia ai mea ola uma.

¹⁶E i ai foi le nuanua i le ao, ou te vaai foi i ai, e manatua ai le feagaiga e faavavau ua osia e a‘u o le Atua ma mea ola eseese uma lava o i le lalolagi.

¹⁷Ua fetalai atu le Atua ia Noa, O le faailoga lenei o le feagaiga ua ou faatumauina e a‘u ma mea ola uma o i le lalolagi.

¹⁸O atalii foi nei o Noa e na ulufafo i le vaa, o Semu, ma Hamo, ma Iafeta; o Hamo foi o le tamā ia o Kanana.

¹⁹O atalii nei e toatolu o Noa; o i latou foi na āina solo ai le lalolagi uma.

²⁰Ona amata lea e Noa ona galue i le eleele, ua ia fai foi le tovine.

²¹Ua inu foi o ia le uaina, ma ua onā ai; ua le lavalavā foi o ia i lona fale ie.

²²Ona ilo atu lea e Hamo le tamā o Kanana le le lavalavā o lona tamā, i le ua ta‘uina atu e ia i ona uso e toalua i fafo.

²³Ona fetagofi lea o Semu ma Iafeta i le ofu, ma faaee ai i o la tau‘au, ma la savavali tuumuli i tua, ma ufiufi ai le le lavalavā o lo la tamā; ua faasaga ese foi o laua mata, ua le ilo atu foi e i laua le le lavalavā o lo la tamā.

²⁴Ua ala Noa i lana uaina, ua iloa foi e ia le mea ua faia ia te ia e lona atalii aupito itiiti;

²⁵ona fai ane lea o ia, E malaia Kanana; e matuā fai o ia ma pologa i ona uso.

²⁶Ua fai ane foi o ia, Ua faafetaia Ieova le Atua o Semu; e fai foi Kanana mona pologa.

²⁷E faalauteleina Iafeta e le Atua, e mau foi o ia i fale ie o Semu; e fai foi Kanana mona pologa.

²⁸Na ola foi Noa talu mai le lolo i tausaga e tolu selau ma le limagafulu.

²⁹O aso uma foi o Noa e iva selau ma le limagafulu, o ona tausaga ia; ona oti ai lea.