Read Samoan Old Version Bible – O LE TUSI PAIA II. SAMUELU, 19 Bible Online

II. SAMUELU, 19 - Samoan Old Version Bible – O LE TUSI PAIA bible

II. SAMUELU, 19

¹Ona ta‘uina atu lea ia Ioapo, Faauta, o loo tagi ma faanoanoa le tupu ia Apisaloma.

²Ona avea lea o le manumalo i lea aso ma mea e faanoanoa ai i le nuu uma; aua ua faalogo le nuu i le aso, ua faapea, Ua tiga le tupu ona o lona atalii.

³Ua o faagaoi le nuu i lea aso i le aai, e pei ona e faagaoi le nuu ua masiasi ina ua sosola i le taua.

⁴Ua ufiufi e le tupu ona fofoga; ua alaga foi le tupu ua leo tele, Lo‘u atalii Apisaloma e! Apisaloma lo‘n atalii e, lo‘u atalii e!

⁵Ona ulufale atu lea o Ioapo i le tupu, ua fai atu, Ua e faamaina i le aso nei o au auauna uma lava, e ua laveai ia te oe i lenei aso, ma ou atalii, atoa ma ou afafine, ma ou faletua, ma au palake,

⁶ina ua e alofa i e ‘ino‘ino ia te oe, ma e ‘ino‘ino i e alofa ia te oe; auā ua e faaali mai i lenei aso, e leai sou manatu i ni alii ma auauna; auā ua ou iloa i lenei aso, ana ola Apisaloma, a e oti i matou uma i le asō, po ua lelei lea ia te oe.

⁷O lenei, tulai ia, ma e maliu atu, ma faamatalaloto i au auauna; auā ou te tauto ia Ieova, afai e te le maliu atu, e leai se tasi lua te nonofo i le po nanei; e sili ona leaga lea ia te oe i mea leaga uma ua oo ia te oe talu ona e taulealea e oo i le aso nei.

⁸Ona tulai lea o le tupu, ma nofo i le faitotoa; ua latou faailoa atu i le nuu uma, na faapea, Faauta, o loo nofo le tupu i le faitotoa; ona o mai lea o le nuu uma i luma o le tupu. A o Isaraelu, ua taitasi ma sola i lona fale ie.

⁹Sa i ai i le nuu uma le finauga i itu aiga uma o Isaraelu, ua faapea, Na laveai le tupu ia i tatou, ai lima o e ita mai ia i tatou, ua laveai foi o ia ia i tatou ai lima o Filisitia, a o lenei, ua sola o ia ai le nuu ona o Apisaloma;

¹⁰o Apisaloma foi na tatou faauuina e pule ia i tatou, ua oti o ia i le taua; o lenei o le a le mea tou te le tautalatala ai e faafoisia mai le tupu?

¹¹Ona aauina atu lea nisi e Tavita le tupu ia Satoka ma Aviata o faitaulaga, ua faapea, Lua te tautala atu i toeaina o Iuta, ia faapea, O le a le mea e tau mulimuli ai outou ona faafoisia o le tupu i lona fale? Auā ua oo lava i le tupu i lona fale le fetalaiga a Isaraelu uma.

¹²O‘u uso outou, o‘u ivi ma o‘u aano lava outou; o le a lava le mea e tau mulimuli ai outou ona faafoisia o le tupu?

¹³Lua te fai atu foi ia Amase, E le o o‘u ivi ma o‘u aano lava oe? Ia faapea ona faia e le Atua ia te au, ma ia faapea ona faopoopo i ai, pe afai e le fai oe ma pule i ‘au i o‘u luma i aso uma e sui a‘i Ioapo.

¹⁴Ua ia faauai mai loto o tagata uma o Iuta pei o se tagata e toatasi; ua latou feau mai i le tupu, Ina foi mai ia oe ma au auauna uma.

¹⁵Ona toe foi ai lea o le tupu, ua oo i Ioritana; ona o mai lea o Iuta i Kilikala e faafetaiai i le tupu, e sopoia atu Ioritana ma le tupu.

¹⁶Ua faataalise Semi le atalii o Kira, le sa Peniaminā, le Pauri, ona alu ifo o ia faatasi ma tagata o Iuta e faafetaiai ia Tavita le tupu,

¹⁷ma tagata e toaafe faatasi ma ia mai Peniamina; atoa ma Sipa le auauna a le aiga o Saulo, ma ona atalii e toasefulu ma le toalima, ma ana auauna e toaluafulu faatasi ma ia; ua latou sopoia atu Ioritana i luma o le tupu.

¹⁸Ua alu ane le vaa e tautuu ai le aiga o le tupu, ma fai mea ua finagalo i ai o ia; ona faapaū lea o Semi le atalii o Kira i luma o le tupu, ina ua sopoia atu e ia Ioritana.

¹⁹Ua ia fai mai foi i le tupu, Aua le tauia mai la‘u agasala e lo‘u alii; aua le manatu foi i le mea na agaleaga ai lau auauna i le aso na afio mai ai lo‘u alii le tupu mai Ierusalema ina ne‘i faalotoloto i ai o le tupu.

²⁰Auā ua iloa e lau auauna ua ou agasala lava au; silasila mai foi, ua ou sau, ua ou muamua mai i le aiga o Iosefa uma lava, ou te alu ifo e faafetaiai i lo‘u alii le tupu.

²¹Ona tali ane ai lea o Apisai le tama a Seruia, ua faapea ane, E le o le mea lava lea ea, o le a oti ai Semi? Auā na ia fetuu i le ua faauuina e Ieova.

²²Ona fai atu lea o Tavita, O le a ea la oulua na ia te au, o oulua le fanau a Seruia? Auā e fai oulua ma e faalavelave mai ia te au i lenei aso; e fasiotia ea se tasi i le aso nei i Isaraelu? Auā e le ua ou iloa ea, o a‘u lava le tupu o Isaraelu i le aso nei?

²³Ona fai atu lea o le tupu ia Semi, E te le oti oe; ua tauto ai foi le tupu ia te ia.

²⁴Ua alu ifo foi Mefiposeta le atalii o Saulo e faafetaiai i le tupu, na ia le teua ona vae, ua le teua foi lana ‘ava, ma ona ofu ua na le taia talu mai le aso ua alu atu ai le tupu, e oo i le aso na sau ai ma le filemu.

²⁵Ua alu atu o ia i Ierusalema e faafetaiai i le tupu; ona fai atu lea o le tupu ia te ia, Mefiposeta e, se a le mea na ta le o ai ma a‘u?

²⁶Ua fai mai o ia, Lo‘u alii e le tupu, na pelogia au e la‘u auauna; auā na fai ane lau auauna, Ou te faanofoaina le asini mo a‘u, ou te tietie ai, ma ou alu atu i le tupu; auā ua pipili lau auauna.

²⁷Ua tuua‘iina fua lau auauna i lo‘u alii le tupu; a e tusa lo‘u alii le tupu ma se agelu a le Atua; o lenei, fai ia se mea e te finagalo i ai;

²⁸auā sa leai se tasi i le aiga uma o lo‘u tamā, na o tagata e tatau ona oti i luma o lo‘u alii le tupu, a ua e tofia lau auauna faatasi ma e aai i lau lava laoai; se a sa‘u mea e toe tatau ai ona ou toe tagi atu ai i le tupu?

²⁹Ona fai atu lea o le tupu ia te ia, Se a le mea e te toe fai mai ai i au mea? ua ou fai atu, o oe ma Sipa lua te vaeluaina le fanua.

³⁰Ua fai mai Mefiposeta i le tupu, Ave pea ia mea uma lava mā ia; tau ina ua oo mai lo‘u alii le tupu ma le manuia i lona fale.

³¹O Pasili foi le Kiliata, ua alu ifo o ia nai Rokeli; ua la sopoia atu Ioritana, ma le tupu ina ia momoli ia te ia i Ioritana.

³²Ua matuā toeaina lava Pasili, ua valugafulu ona tausaga; o ia lava na fagaina le tupu ina o nofo o ia i Maanaima, auā o le alii tele lava o ia.

³³Ona fai atu lea o le tupu ia Pasili, Ta te o ma a‘u, ta te mafuta faatasi ma a‘u i Ierusalema.

³⁴A ua fai mai Pasili i le tupu, E fia ni aso o tausaga o lo‘u olaga o totoe, ta te o ae ai ma oe le tupu i Ierusalema?

³⁵Ua valugafulu o‘u tausaga i lenei aso; e iloa ea e a‘u se lelei ma se leaga? E lagona ea e lau auauna ni a‘u mea e ‘ai ma ni a‘u mea e inu? Ou te toe lagona ea le leo o tane pepese ma fafine pepese? Se a le mea e toe faatiga ai lo‘u alii le tupu e lau auauna?

³⁶E momoli faaitiiti atu e lau auauna i le tupu i Ioritana; se a foi le mea e taui mai ai e le tupu i lena taui tele?

³⁷Se‘i toe foi lau auauna, se‘i ou oti i lo‘u nuu e latalata ane i le tuugamau o lo‘u tamā ma lo‘u tina. Silasila foi o lau auauna o Kimeama, e alu atu o ia ma lo‘u alii le tupu, e te faia ia te ia se mea e te finagalo i ai.

³⁸Ona fai atu lea o le tupu, Ma te o atu ma Kimeama; ou te faia foi ia te ia se mea e te loto i ai; o mea uma foi e te fai mai ai ia te au ou te faia lava mo oe.

³⁹Ona sopoia atu lea e le nuu uma i Ioritana; ua alu atu ai foi le tupu, ona feasogi lea o le tupu ma Pasili, ma ua faamanuia ia te ia; ona toe foi lea o ia i lona nuu.

⁴⁰Ona alu atu lea o le tupu i Kilikala, o Kimeama foi na la o ma ia. O le nuu uma o Iuta na latou o ma le tupu, atoa ma le vaeluagalemu o le nuu o Isaraelu.

⁴¹Faauta foi, o tagata uma o Isaraelu, na o mai i latou i le tupu, ua latou fai mai i le tupu, O le a le mea na faagaoi ai ia te oe e o matou uso, o tagata o Iuta, ma ua latou au mai le tupu ma lona aiga i Ioritana, atoa ma tagata uma o Tavita faatasi ma ia?

⁴²Ona tali atu lea o tagata uma o Iuta i tagata o Isaraelu, Auā ma te aiga ma le tupu; o le a le mea e te ita ai i lenei mea? Ua matou ‘aina ea ni mea a le tupu? Po ua aumai e ia se alofa ia i matou?

⁴³Ona tali atu lea o tagata o Isaraelu i tagata o Iuta, ua faapea atu, E sefulu o‘u itu aiga i le tupu; e sili foi Tavita ia te au, a e itiiti ia te oe; o le a lava le mea ua e faaletaualoa ai a‘u, ma ua le muai ta‘u mai ia te au, e faafoisia mai lo‘u tupu? Ua sili ona mamafa le upu a tagata o Iuta i le upu a tagata o Isaraelu.