Read Samoan Old Version Bible – O LE TUSI PAIA II. SAMUELU, 2 Bible Online

II. SAMUELU, 2 - Samoan Old Version Bible – O LE TUSI PAIA bible

II. SAMUELU, 2

¹Mulimuli ane ua fesili atu Tavita ia Ieova, ua faapea atu, Ou te alu ae ea i se tasi aai o Iuta? Ua fetalai mai ai Ieova ia te ia, Ina alu ae ia. Ua fai atu Tavita, O le fea aai ou te alu ae i ai? Ona fetalai mai lea o ia, o Heperona.

²Ona alu ae lea o Tavita i ai, o ia atoa ma ana avā e toalua, o Ainoama le Isereelu, ma Apikaila le avā a Napalu le Karamelu.

³O ona tagata foi sa ia te ia na o ae i latou ma Tavita, e taitasi ma lona aiga; ua latou nonofo i aai o Heperona.

⁴Ua o mai tagata o Iuta, ma latou faauu ia Tavita i lea mea e fai ma tupu o le aiga o Iuta. Ua ta‘u atu foi ia Tavita, ua faapea, O tagata Iapese-Kiliata na latou tanu ia Saulo.

⁵Ona aau atu lea e Tavita le sāvali i tagata o Iapese-Kiliata, ua faapea atu i ai, Ia manuia outou mai ia Ieova, auā na faapea ona outou agalelei i lo outou alii o Saulo; na outou teuteu foi ia te ia.

⁶O lenei, ia agalelei faamaoni Ieova ia te outou; o a‘u foi, ou te taui atu ia te outou lenei mea lelei, ina ua outou faia lenei mea.

⁷O lenei, ia outou lima malosi, ia fa foi ma tagata totoa; auā ua maliu lo outou alii o Saulo; a ua faauuina a‘u e le aiga o Iuta e fai ma tupu ia te i latou.

⁸A o Apineru le atalii o Neru lē pule i ‘au sa ia Saulo, ua na ave ia Isoposeta le atalii o Saulo, ua la o atu ma ia i Maanaima.

⁹Ua ia faia o ia ma tupu o Kiliata, ma sa Asurī, ma Isereelu, ma Efaraima, ma Peniamina, atoa ma Isaraelu uma lava.

¹⁰Ua fagafulu tausaga o Isoposeta le atalii o Saulo ina o fai o ia ma tupu o Isaraelu, na pule foi o ia i tausaga e lua; na o le aiga o Iuta sa mulimuli atu i latou ia Tavita.

¹¹O le faitau o aso sa fai ma tupu Tavita i Heperona i le aiga o Iuta, ua fitu ona tausaga ma masina e ono.

¹²Ua o atu Apineru le atalii o Neru, ma auauna o Isoposeta le atalii o Saulo nai Maanaima i Kipeona.

¹³Ua o atu foi Ioapo le tama a Seruia, ma auauna a Tavita, ua latou fetaiai i le vailepa o Kipeona; ua nonofo i lalo, o i latou nei i le tasi itu o le vailepa, a o i latou ia i le tasi itu o le vailepa.

¹⁴Ua fai mai Apineru ia Ioapo, Se‘i tulai taulelea, ia taaalo i o tatou luma; ua fai atu Ioapo, Ina latou tulai ia.

¹⁵Ona tulai lea, ma o atu e toasefulu ma le toalua e na faitauina o sa Peniaminā, o auauna a Isoposeta le atalii o Saulo; ma le toasefulu ma le toalua o auauna a Tavita.

¹⁶Ua faatau ‘u‘u o latou ulu, ona faatau tutu‘i ai lea o latou itu i a latou pelu; ua oti faatasi ai i latou. Ua igoa ai lea mea, O le fanua o e malolosi, o loo i Kipeona.

¹⁷Sa matuā tele lava le taua i lea aso; na tulia Apineru ma tagata o Isaraelu i luma o auauna a Tavita.

¹⁸Sa i ai tama tane e toatolu a Seruia, o Ioapo, ma Apisai, ma Asaelu; sa māmā vae o Asaelu pei se sevi o le vao.

¹⁹Ua tuliloa e Asaelu ia Apineru, ua le ‘alo ai o ia i le itu taumatau po o le itu tauagavale i lona mulimuli atu ia Apineru.

²⁰Ua tepa Apineru i ona tua, ona fai mai lea o ia, O oe ea o Asaelu? Ua fai atu o ia, O a‘u lenei.

²¹Ona fai mai lea o Apineru ia te ia, Ina ‘alo ia i le itu taumatau po o le itu tauagavale, ma e pue se tasi taulealea, ma ave ana auupega māu, A ua le mafai Asaelu ona alu ese ia le mulimuli ia te ia.

²²Ona toe fai mai lea o Apineru ia Asaelu, Soia e te mulimuli mai ia te au; ou te fasioti i se a ia te oe? Ona faapefea lea ona ma toe feiloai ma Ioapo lou uso?

²³A ua le mafai ia te ia ona ‘alo ese; ona tutu‘i lea e Apineru ia te ia i le muli o le tao i lona manava, ua ati le tao i lona tua; ona paū ai lea o ia, ua oti i lea lava mea; o i lato uma ua oo i le mea na paū ai Asaelu ma oti ai, ua tutū ai i latou.

²⁴A ua tulituliloa Ioapo ma Apisai ia Apineru; ua goto le la ina ua latou oo atu i le mauga o Ama, o loo i luma o Kia i le ala i le vao o Kipeona.

²⁵Ua faapotopoto atu foi le fanauga a Peniamina ia Apineru, ua fai ma ‘au e tasi; ona tutū lea o i latou i le tumutumu o le tasi mauga.

²⁶Ona valaau lea o Apineru ia Ioapo, ua faapea mai, E saga ‘ai pea ea le pelu? E te le iloa ea e iu ina oona? E te fai atu ea afea i le nuu, ia foi i latou aua le mulimuli atu i o latou uso?

²⁷Ua fai atu Ioapo, O loo soifua le Atua, ana e le fai mai, po ua taitasi ma alu ae le nuu i le taeao ai le mulimuli atu i o latou uso.

²⁸Ona ili lea o le pu e Ioapo, ua tutū mai ai le nuu uma, ua le toe tulituliloa ia Isaraelu, ma ua le toe tau.

²⁹O Apineru ma ona tagata, ua savavali i latou i le eleele laugatasi ua ao lava lea po; ua latou sopoia atu Ioritana, ma ui ane i Pitirona uma, ona oo atu lea o i latou i Maanaima.

³⁰A ua foi atu Ioapo nai le tuliloaga o Apineru, ua ia faapotopotoina le nuu uma; o auauna a Tavita e lei i ai o tagata e toasefulu ma le toaiva, atoa ma Asaelu.

³¹A o auauna a Tavita na latou fāsia sa Peniaminā ma tagata o Apineru e toatolu galau ma le toaonogafulu ua oti.

³²Ua latou avae ia Asaelu, ma tanu ia te ia i le tuugamau o lona tamā o i Peteleema; ua atoa le po o savavali Ioapo ma ona tagata, ua aoina i latou i Heperona.