Read Samoan Old Version Bible – O LE TUSI PAIA II. SAMUELU, 24 Bible Online

II. SAMUELU, 24 - Samoan Old Version Bible – O LE TUSI PAIA bible

II. SAMUELU, 24

¹Ua toe tupu le toasa o Ieova ia Isaraelu; ona ia faaalu atu lea ia Tavita ia te i latou, ua faapea, Alu ia, ina faitau ia Isaraelu ma Iuta.

²Ua fai ane le tupu ia Ioapo lē pule i ‘au sa ia te ia, Ia e fealuai i itu aiga uma o Isaraelu, e pau mai i Tanu, e pau mai i Peresepa, ma faitau le nuu, ina ia ou iloa lona atoa o le nuu.

³Ua fai mai Ioapo i le tupu, Ia faaopoopoina e Ieova lou Atua i le nuu, e tusa ma i latou lava ia taisāutuaselau, ma ia silasila i ai fofoga o lo‘u alii le tupu; a e peitai po o le a le mea ua finagalo ai lo‘u alii le tupu i lenei mea?

⁴A ua tuu faiaina Ioapo ma e pule i ‘au i le fetalaiga a le tupu; ona alu atu lea o Ioapo ma e pule i ‘au nai luma o le tupu e faitau i le nuu o Isaraelu.

⁵Ua latou sopoia atu Ioritana, ua to lauapi i Aroeru i le itu i toga o le aai, o loo i le moa o le alia o Kato, e feagai ma Iasaru.

⁶Ona oo lea i latou i Kiliata, ma le nuu o Tate-atesa; ona latou oo atu lea i Tanu-iana ma faataamilo ai i Saitonu.

⁷Ona latou oo lea i le ‘olo o Turo, ma aai uma o sa Hevī ma sa Kananā; ona latou o atu lea i le itu i toga o Iuta i Peresepa.

⁸Ua latou feoai i le nuu uma lava; ua uma masina e iva ma aso e luafulu, ona oo mai lea o i latou i ierusalema.

⁹Ona avatu lea e Ioapo le tau aofai o le nuu i le tupu; sa i Isaraelu e valu selau o afe o tagata malolosi e na fai pelu; a o tagata o Iuta ua lima selau o afe i latou.

¹⁰Ona tuia lea o le loto o Tavita ina ua uma ona faitauina o le nuu; ua fai ane Tavita ia Ieova, Ua ou matuā agasala lava i le mea ua ou faia; o lenei, Ieova e, ia e faamagaloina lau auauna ai la‘u amioletonu, auā ua ou matuā faavalea.

¹¹Ona tulai lea o Tavita i le taeao; ua oo mai le afioga a Ieova ia Kato le perofeta le tagata vasi a Tavita, ua faapea,

¹²Alu ia, ma fai atu ia Tavita, O loo faapea ona fetalai mai o Ieova, E tolu mea ou te tuuina atu ia te oe; e te filifili se mea e tasi o ia mea ou te faia lava ia te oe.

¹³Ona alu atu lea o Kato ia Tavita, ma ta‘u atu ai ia te ia, ua faapea atu ia te ia, Ou te faaooina mai ea ia te oe le oge e fitu tausaga i lou laueleele; pe tolu ni masina e te sola ai i luma o e ita mai, o tuliloa i latou ia te oe; pe tolu aso o le faamai i lou nuu? O lenei, ia e silasila, ma e iloa, se a se upu ou te foi ma a‘u i le na auina mai a‘u.

¹⁴Ua fai mai Tavita ia Kato, Ua ou matuā fememeai lava; ia ou paū atu i le aao o Ieova, auā e tele lona alofa mutimuti vale; a e aua ou te paū i lima o tagata.

¹⁵Ona tuu mai lea e Ieova le faamai ia Isaraelu, e afua mai i le taeao, e oo i le aso na atofa; ua oti ai le nuu, e pau mai i Tanu, e pau mai i Peresepa e fitu sefulu o afe o tagata.

¹⁶Ona faaloaloa atu lea e le agelu o lona lima i Ierusalema ina ia faaumatia ai; ona salamo ai lea o Ieova ona o le malaia, ma ua fetalai ane i le agelu na faaumatia ai le nuu, Soia; o lenei, taofi ia o lou lima. Sa lata ane le agelu a Ieova i le mea e soli ai saito a Aruna le sa Iepusē.

¹⁷Ua fai atu Tavita ia Ieova, ina ua na iloa le agelu na fasia le nuu, ua faapea atu, Silasila mai, o a‘u nei lava le agasala, o a‘u foi le amioletonu; a o nei mamoe, se a se mea ua latou faia? Ia oo mai lou aao ia te au ma le aiga o lo‘u tamā.

¹⁸Ona alu ane lea o Kato ia Tavita i lea aso; ua fai mai ia te ia, Ia e maliu ae, ma e faia se fata faitaulaga ia Ieova i le mea e soli ai saito a Aruna le sa Iepusē.

¹⁹Ona alu ae lea o Tavita, e pei ona fai mai ai Kato, e tusa ma le poloaiga a Ieova.

²⁰Ona vaavaai mai ai lea o Aruna, ua na iloa atu le tupu ma ana auauna o loo o ae ia te ia; ona alu atu lea o Aruna, ua ifo toele i le tupu.

²¹Ua fai mai Aruna, O le a le mea ua maliu mai ai lo‘u alii le tupu i lana auauna? Ona fai atu lea o Tavita, Ou te sau e faatau mai ia te oe le mea e soli ai saito, e fai ai se fata faitaulaga ia Ieova, ina ia taofia le faamai ai le nuu.

²²Ona fai mai lea o Aruna ia Tavita, Ave pea ia, ma ia fai ai taulaga o lo‘u alii le tupu i mea ua e finagalo i ai; silasila mai ia, o povi ia o fai a‘i taulaga mu, ma mea e soli a‘i saito, atoa ma amo a povi e fai ma fafie.

²³O mea uma nei na foai mai Aruna le tupu i le tupu; ua fai mai foi Aruna i le tupu, Ia finagalo alofa mai Ieova lou Atua ia te oe.

²⁴Ona fai atu lea o le tupu ia Aruna, Aua lava; ou te faatau mai pea ia te oe i le tau; ou te le fai taulaga ia Ieova lo‘u Atua i taulaga maua fua. Ona faatau mai lea e Tavita le mea e soli ai saito, atoa ma povi i sekeli ario e limagafulu.

²⁵Ona faia lea e Tavita i lea mea o le fata faitaulaga ia Ieova; ua fai ai taulaga mu ma taulaga faafetai. Ona faafofoga lea o Ieova i le tatalo mo le nuu, ma na taofia le faamai ia Isaraelu.